- مسير
مسیر ورځپاڼې د سولې بین الافغاني مذاکراتو په تړاو اټکل کړی، چې دا ځل به خبرې بیا هم د تېر په شان سړې، له لانجو ډکې، اوږدې او بې خونده وي.
د لېکوال په وینا، افغان حکومت او طالبان په داسې وخت کې بیا خبرې پیلوي چې د امریکا او طالبانو د هوکړې پر بنسټ د ټولو امریکایي ځواکونو وتلو ته پنځه میاشتې وخت پاتې دی.
ورځپاڼې دا پوښتنه هم مطرح کړې که په دې پنځو میاشتو کې بین الافغاني توافق ونه شي، څه پېښېدلی شي؟
د لېکوال په اند دا وېره زیاته ده، چې له یوه اړخه به جګړه لا زیات زور واخلي او له بله اړخه به د سولې خبرې زیاتې جنجالي شي چې په باور یې طالبان به د نظامي بریا په فکر کې شي، امریکایان به د سولې لپاره فشار کم کړي او د هند او ایران په ګډون د ولسمشر غني ځینې متحدین به د حکومت تر شا ودرېږي او په دې سره به افغانستان یوې بلې خونړۍ جګړې ته ولاړ شي.
- هېواد
هېواد دولتي ورځپاڼې د سولې لپاره دوهم پړاو مذاکراتو پیلیدو ته په اشارې لیکلي دغه خبرې په داسې حال کې پيلېدونکې دي، چې په افغانستان کې د رسنيوو، مدني ټولنې، بشري حقونو، حقوقي فعالينو او د ديني عالمانو په ګډون د ولس د سر سړيوو، هدفي وژنو زور اخيستی دی.
ورځپاڼې په افغانستان کې د امريکايي ځواکونو د وياند سوني ليجټ له خوا له طالبانو د هغو بريدونو د درېدو د غوښتنې په اړه هم ليکلي چې دا ډله يې مسووليت نه مني.
لیکوال دغو څرګندونو په تړاو ويلي چې په اصل کې امريکا دې ته اړ شوې، چې د سولې پروسې د بريا لپاره فشار راوړي، يعنې که طالبان جګړه يا بريد کوي، نو ځواب به ورکوي او په مقابل کې به يې د افغان ځواکونو ملاتړ کېږي.
لیکوال همدارنګه ټینګار کړی، چې دغه حالت ته په کتو اړتيا ده، چې د سولې مذاکرات بريالي شي او د دې لپاره يو بل ته د غاښ چيچلو پر ځای، په خبرو کې قناعت ورکړي او دا قناعت د افغانانو لپاره د تل پاتې او باعزته سولې لامل شي.
- هشت صبح
هشت صبح ورځپاڼې د نن ورځې په سرمقاله کې د کابل د ککړې هوا او د تنفسي ناروغیو زیاتېدو څخه اندېښنه ښودلې ده.
د لیکوال په وینا کومې ژمنې او خبرې چې تېر کال کېدلې تمه وه، چې سږکال د کابل د هوا ککړتیا کمه شي خو په خبره یې اوس ښکاري چې دغه ژمنې یو نه دي شوي، د کابل هوا نوره هم ککړه شوې او وژونکي حالت ته رسیدلې ده.
وړاندې په سر ليکنه کې راغلي، دامهال د تنفسي ناروغیو شمیر مخ په زیاتېدو دی او که پام ورته ونه شي دا حالت به له ډیرو کابل مېشتو قرباني واخلي.
