کابل چاپ ورځپاڼو په نننیو خپلو ګڼو کې تر ډېره پاکستان ته د طالب پلاوي سفر او لیدنو کتنو باندې لیکنې او تبصرې خپرې کړي دي.
- وېسا
وېسا ورځپاڼې پاکستان ته د ملا عبدالغني برادر او د طالبانو د قطر دفتر مشر د یو پلاوي سفر ته په اشارې سره لیکلي، داسې ښکاري چې د امریکا متحده ایالاتو دغې شل ورځنۍ وقفې ته اړتیا لرله.
د لیکوال په باور چې دغه رخصتي په لوېدیځ کې د کرسمس له رخصتیو سره هم مهاله ده چې امریکا او پاکستان ته دا موقع ورکوي، څو د افغانستان د راتلونکي نظام، د حکومت جوړښت او په سیمه کې د افغانستان راتلونکي موقعیت په هکله خپله طرحه پخه کړي.
ورځپاڼې پاکستان ته د ملابرادر او ډاکټر خلیلزاد سفرونه تړلي بللي او د پاکستاني رسنیو د خبرو پر بنسټ یې لیکلي چې امریکا د پاکستان مرسته غوښتلې چې طالبان وهڅوي د جنوري په پنځمه مذاکرات له سره پیل کړي.
خو سرمقاله لیکوونکي بیا ټینګار کړی چې اوس دا څرګنده ده چې د دغو دواړو هېوادونو د بحث اصلي ټکی د افغانستان د راتلونکي نظام څرنګوالی جوړوي او په وینا یې لیدل کېږي چې واشنګټن یو وار بیا د افغانستان پر سر له پاکستان سره معامله پیل کړې.
- هشت صبح
هشت صبح ورځپاڼې بیا د پاکستان له لومړي وزیر عمران خان او د ملا عبدالغني برادر ناستې ته اشاره کړې لیکلي چې دواړو لورو د سولې په پروسه کې وروستیو پرمختګونو باندې خبرې کړي دي.
ورځپاڼې د پاکستان د صدراعظم عمران خان دفتر بیان ته اشاره کړې چې ښاغلي خان له طالب پلاوي سره په لیدنه کې په افغانستان کې د تاوتریخوالي په زیاتوالي اندېښنه څرګنده کړې او د جګړې له دواړو غاړو یې غوښتي چې تاوتریخوالی راکم او اوربند ته لاره هواره کړي.
وړاندې د دفتر د بیان پر بنسټ لیکل شوي چې د جګړې دواړه لوري باید داسې فرصت رامنځته کړي چې په افغانستان کې سوله راشي او پرېنه ږدي چې دغه بهیر له خنډ سره مخ شي.
- هېواد
هېواد دولتي ورځپاڼې بیا لیکلي چې اسلام اباد ته د طالبانو د مرکچي مشر ملابرادر په استازولۍ د پلاوي تګ هم په بېلابېله توګه تعبېرېږي، خو په وینا یې لا هم څوک نه شي ويلی چې طالبان به د ملت او نړيوالې ټولنې دا غوښتنې کله ومني؟
د ورځپاڼې په وینا د ملت د غوښتنې خلاف لا هم جګړه او ترهګريز بريدونه دوام لري.
لیکوال وړاندې ویلي چې په قطر کې هم له څه باندې درېيو مياشتو راهيسې د سولې لپاره په خبرو کې کوم پرمختګ نه دی شوی چې دا د سولې لپاره هيلې مړاوې کوي او د سولې فرصت ننګوي.
ورځپاڼه ټينګار کوي چې د سولې فرصت بايد له لاسه ونه وزي او طالبان دې د سولې له بهير سره يوځای شي.
