د کابل او نوې ډېلي ترمنځ د پروازونو په ټپه درېدل!

د افغانستان او هندوستان ترمنځ د پروازونو ځنډ په هند کې یو شمېر افغانان له ستونزو سره مخ کړي.

دوی وايي، هندوستان ته د درملنې لپاره راغلي و، خو د پروازونو له ځنډېدو وروسته اوس د استوګن‌ځای له نشتوالي او مالي ستونزو سره مخ دي.

مصطفی موسوي چې له خپلې کورنۍ سره د درملنې لپاره هندوستان ته تللی د بنجشنبې په ورځ «۱۳۹۸ کال د کب ۲۹» له ازادي راډيو سره په خبرو کې د خپل نامعلوم برخلیک په اړه داسې وايي: "دوه درې اوونۍ کېږي چې د درېیو ناروغانو سره هند ته راغلی یم، درملنه‌یې تکمیل شوه، ټکټ مې اخیستی، اوس چې شرکت ته ځم وايي پروازونه کنسل شوي دي، زه نه‌پوهېږم چې څه وکړم؟ دلته مصرف هم زیاد دی، د اتاق کرایه ده، د ډوډۍ پسې دي او زموږ پیسې هم خلاصې شوي."

هندوستان هېواد دغه پرېکړه د کرونا ویروس د مخنیوي لپاره کړې.

هند ته دغه تللي افغان مسافر وايي، حکومت دې د یادې ستونزې د حل لپاره اقدام وکړي.

په ورته وخت کې د افغانستان د ملکي هوايي چلند خپلواکه اداره وايي، که څه هم هندوستان پرېکړه کړې چې د حمل تر ۲۹مې نېټې پورې به پروازونه بندوي، خو هڅې روانې دي چې هلته بند پاتې شوي افغانان خپل هېواد ته را انتقال شي.

د کرونا ویروس د مخنیوي لپاره نه‌یوازې د افغانستان او هندوستان ترمنځ پروازونه درول شوي، بلکې د نړۍ اکثرو هېوادونو یو شمېر ښارونو او هغو هېوادونو ته چې له کرونا ویروس ډېر اغېزمن دي خپل پروازونه بند کړي او یو شمېر نورو خپلې پولې تړلې دي.

د کرکټ په شپږیزه لیګ کې نن دوه لوبې ترسره کیږي.

لومړی لوبه سهار مهال د امو نهنګانو او سپین غږ بازانو ترمنځ ده او بله لوبه ماسپښین کې د بست ساتونکو او بندامیر ښارمارانو ترمنځ ترسره کیږي.

دغې لوبې له پرونۍ دمې وروسته د نن پنجشنبې لپاره پلان شوي دي.

د شپږیزې لیګ لسم پړاو د همدې اونۍ په سر کې پيل او د اګست تر لومړۍ نیټې پورې دوام به دوام وکړي.

د پاکستان حکومت ۱۲۲ افغان بندیان راخوشي کړي دي.

په تورخم کې د طالبانو د حکومت د کډوالو د لیږد امر بخت جمال ګوهر وايي، "دغه کډوال چې ښځې او ماشومان په کې شامل وو، پرون افغان لورې ته سپارل شوي چې یو شمیر يې په پاکستان کې د اوسیدو قانوني اسناد لري ".

د ګوهر په ټکو، راخوشي شوو کډوالو له دوو ورځو نیولې تر دریو کلونو په پاکستان کې د بند موده تیر کړې ده.

هغه وړاندې ویلي، راخوشي شوي کسان د ننګرهار، لغمان، پروان، کابل، خوست او پکتیا ولایتونو اوسیدونکو وو، چې خپلو اصلي سیمو ته ستانه کړای شوي دي.

د پاکستان حکومت دا بندیان په داسې حال کې راخوشي کوي چې دې هېواد د بې اسناده افغان کډوالو د جبري اخراج لړۍ د بل هر وخت پرتله جدي کړې ده.

د طالبانو د حکومت د صنعت او سوداګرۍ وزارت راستنو شویو کډوالو ته د کار موندنې په برخه کې له افغان سوادګرو د مرستې غوښتنه کړې ده.

دغه وزارت پرون په کابل کې راستنو شویو کډوالو ته د کارموندنې په غونډه کې پر افغان سوداګرو غږ کړی چې د هېواد دننه پانګونه وکړي، څو خلکو ته د کار زمینه برابره شي.

د دغه وزارت سرپرست وزیر نورالدین عزیزي ویلي، "افغان سوداګر دې د ترکیې او نورو هېوادونو پر ځای افغانستان کې پانګونه وکړي، څو له خپلو تولیداتو او صنعت مو ملاتړ وشي".

د طالبانو حکومت راستنو شویو کډوالو ته د کار موندنې دا غونډه په داسې حال کې جوړوي چې په میلیونو کډوالو په وروستیو څو میاشتو کې له ایران او پاکستانه بیرته افغانستان ته راستانه شوي دي.

دغه کډوال انديښمن دي او وايي، افغانستان کې د کار فرصتونه نشته.

د کډوالو له راستنیدو وړاندې ډیر شمیر ځوانانو د بې کارۍ له وجې د ایران او پاکستان په ګډون یو شمیر اروپايي او نورو هېوادونو ته کډوال شوي وو.

په خیبرپښتونخوا کې د سیلابونو له کبله ۱۳ کسان مړه شوي دي.

په خیبرپښتونخوا کې د طبیعي پېښو پر وړاندې د مبارزې اداره وايي، په مړه شوو کسانو کې نهه ماشومان، درې ښځي او یو سړی شامل دي.

د دغې ادارې په خبره، د سیلابونو له کبله درې نور کسان ټپیان شوي او په زرهاوو کرنیزې ځمکې او کورونه يې ویجاړ کړي دي.

د سیلابونو له کبله دا مرګژوبله په داسې حال کې ده چې نن پنجشنبې د خیبرپښتونخوا په بیلابیلو سیمو کې د وروښتونو او له کبله يې د سیلابونو د راوتو وړاندوینه شوې ده.

د بشري مرستو څه باندې سلو سازمانونو په غزه کې د پراخې قحطۍ خبرداری ورکړی دی.

د بشري مرستو د رسونو ۱۱۱سازمانونو له هغې ډلې د بې پولې ډاکټرانو سازمان پرون چهارشنبې خبرداری ورکړی چې په غزه کې د "دوی د کارکوونکو په ګډون خلک د مرګ په حال کې دي".

دغو ادارو په غزه کې د عاجل اوربند غوښتنه کړې او پر ښکیلو خواوو يې غږ کړی چې د ملګرو ملتونو په استازیتوب د بشري مرستو رسونو سازمانونو ته د مرستو د رسولو اجازه ورکړي.

د اسراییلو حکومت په وروستیو کې په غزه کې د پراخې قطحۍ او لوږې له کبله له فشارونو سره مخامخ دی.

غزه چې د څه باندې دوو میلیونو فلسطینیانو کور دی، په تیرو ۲۱میاشتو کې د جګړې سربیره له سختې قطحۍ سره مخ ده، او د خوارکي توکو د ویش پرمهال په کې په زرهاوو کسان د اسراییلو د سرتیرو په ډزو کې وژل شوي دي.

د ایرلنډ پولیس وايي، د پلازمینې بلفاست په جنوبي لویدیز مګ وایرزبریج سیمه کې وسله والو دوه کسان وژل په ډزو وژلي او دوه نور ټپیان دي.

پولیسو ویلي، اوسمهال د عام خلکو لپاره کوم خطر نشته.

تراوسه د برید انګیزه روښانه نه ده.

اروپايي ټولنه وايي، د امریکا د ولسمشر ډونالډ ټرمپ له لورې پر دې ټولنه د لګول شویو لوړو تعرفو او سوداګریزو ستونزو پر حل لارو او متقابلو اقداماتو کار کوي.

رویترز خبري اژانس نن چهارشنبې د اروپايي کمیسیون په حواله راپور ورکړی چې د دغې ټولنې غړي هېوادونه له امریکا سره د سوداګرۍ په خبرو اترو کې د یوې پایلې د ترلاسه کولو په تمه دي.

ټاکل شوې د اروپايي ټولنې د سوداګرۍ کمیشنر ماروس سیفکویچ نن ماسپښین د امریکا د سوادګرۍ له وزیر هاورډ لوټنیک سره د لوړو تعرفو په اړه خبرې وکړي.

امریکا له اروپايي ټولنې د توکو پر صادراتو لس سلنه او د دې ټولنې د پولادو پر صادراتو۵۰سلنه، د المونیو پر صادراتو۲۵سلنه او د موترو پر پروژه جاتو ۱۰سلنه تعرفه وضعه کړې ده.

د افغانستان او پاکستان ترمنځ د زراعتي توکو د ترجیحي تعرفو پر کمیدو هوکړه شوې ده.

د طالبانو په واک کې د صعنت او سوداګرۍ وزارت نن چهارشبنې پر خپلې ایکس پاڼې لیکلي، " د هوکړې له مخې د افغانستان له لورې پاکستان ته پر څلور قلمه صادراتو او له هغه ځایه هم په څلور قلمه وارداتو لګول شوې تعرفې چې مخکې ۶۰سلنه وه، ۲۷سلنې ته راټیټه شوې دي".

له افغانستانه په صادراتو کې انګور، انار، مڼې او رومیان او له پاکستانه په وارداتو کې ام، کېنو، کیلې او کچالو شامل دي.

دغه هوکړه د صنعت او سوداګرۍ وزارت د مرستیال احمدالله زاهد او پاکستاني سیال جاوید پاول ترمنځ لاسلیک شوې ده.

پر زراعتي توکو د تعرفو کمیدل د اګست میاشتې له پیله د عملي کیدو وړ دي.

د طالبانو د حکومت د بهرنیو چارو سرپرست وزیر امیرخان متقي وايی، د دوی په زندان کې د بریټانوي بندي جوړې ټول حقونه خوندي دي.

ښاغلي متقي چې نن چهارشنبې د رسنیو په مرکز کې د بهرنیو چارو وزارت د یو کلنو لاسته راوړنو په ناسته کې رسنیو ته ویلي، " په زندان کې د بریټانوي جوړې ټول بشري حقونه خوندي دي او له خپلې کورنۍ سره تماس کې دي، روغتیايي خدمتونه ورته برابر شوي او د خلاصون لپاره يې هڅې روانې دي".

د متقي په ټکو، تراوسه د دغې بریټانوي جوړې د خلاصون مراحل لا تکمیل شوي نه دي.

۸۰کلن پیټر رینولډز او ښځې يې باربي د څرخي پله په زندان کې له څه باندې ۱۲ اونیو راهیسې بندیان دي.

دغې جوړې میاشت وړاندې بریټانوي رسنیو سره په خبرو کې د طالبانو زندان دورخ ته ورته بللی وو، او ویلي و چې له خطرناکو زندانیانو سره بندیان دي.

دغې جوړې له ۲۰۰۹کال راهیسې افغانستان کې د «ریبلد» په نوم موسسې له لارې په روغتیايي، تعلیمي او روغنیزو چارو کې خدمتونه وړاندې کول.

د طالبانو د حکومت د بهرنیو چارو وزارت وايي، له څلور کلن ځنډ وروسته د جرمني په بن ښار کې د پاسپورټونو د چاپ لړۍ پیلوي.

د دغه وزارت مرستیال ویاند حافظ ضیا احمد نن چهارشنبه پر خپلې ایکس پاڼې لیکلي، "ډير ژر به په بن ښار کې د پاسپورټونو چاپ پیل او په ټولو اروپايي هېوادونو کې به کې د افغانانو د سپورټونو ستونزو ته رسیدنه وشي".

د طالبانو حکومت په داسې حال کې په اروپايي هېوادونو کې د افغانانو د سپورټونو ستونزو ته د رسیدنې خبره کوي، چې د جرمني حکومت په همدې روانه اونۍ کې د طالبانو دوه قونسلي کارکوونکي په بن او برلین ښارونه کې ومنل.

د جرمني خبري اژانس د راپور له مخې، دغه دوه قونسلي کارکوونکي پرون جرمني ته رسیدلي وو.

جرمني لومړی اروپايي هېواد دی چې د طالبانو دوه قونسلي کارکوونکي مني.