د لاسرسۍ وړ لېنکونه

تازه خبر
چهارشنبه ۱۵ کب ۱۴۰۳ کابل ۰۱:۰۱

افغانستان

اروپايي ټولنې یو ځل بیا له افغان حکومت د ملاتړ د دوام اعلان وکړ

افغان ولسمشر محمد اشرف غني د افغانستان لپاره د اروپايي ټولنې له ځانګړي استازي رولاند کوبیا سره د لیدنې پر مهال.
افغان ولسمشر محمد اشرف غني د افغانستان لپاره د اروپايي ټولنې له ځانګړي استازي رولاند کوبیا سره د لیدنې پر مهال.

د افغانستان لپاره د اروپایي ټولنې ځانګړي استازي یو ځل بیا د افغانستان له حکومت څخه د ملاتړ او ورسره د همکارۍ د دوام په اړه ډاډ ورکړ.

د ارګ په یوې اعلامیه کې راغلي چې رولاند کوبیا نن تر غرمې دمخه په ګلخانې ماڼۍ کې له ولسمشر اشرف غني سره د لیدو پر مهال دا خبره کړې ده.

د اعلامیې له مخې ښاغلي کوبیا د افغانستان له ټولو سیاستوالو غوښتي چې د سولې پروسې د بریالي ترسره کېدو لپاره په ګډه کار وکړي.

ولسمشر غني په دې لیدنه کې د افغانستان لپاره د اروپایي ټولنې استازي ته ویلي چې د سولې پروسې د فرصتونو او احتمالي خطرونو په اړه‌یې له بېلابېلو لورو سره سلامشورې کړي او د دغو چارو د ښه مدیریت لپاره چمتووالی لري.

د افغانستان د سولي لپاره د امریکا د بهرنیو چارو وزارت د استازي زلمي خلیل‌زاد او په قطر کې د طالبانو د سیاسي مشرانو ترمنځ تر ډېرو خبرو اترو وروسته ټاکل شوې ده د روانې فبرورۍ پر ۲۹مه د دواړو لورو ترمنځ توافق لاسلیک شي چې له مخې به‌یې له افغانستان څخه د بهرنیو ځواکونو وتلو او د افغان حکومت او طالبانو ترمنځ مخامخ خبرو ته زمینه برابره شي.

د امریکا او طالبانو ترمنځ د توافق تر لاسلیک دمخه د سولي لپاره د اعتماد فضا د رامنځته کېدو په هدف په افغانستان کې د یوې اوونۍ لپاره د تاتریخوالي د کمېدو پرېکړه شوې وه چې نن د دې اوونۍ د پیل پنځمه ورځ ده.

د افغانستان خلکو د دې پرېکړې تود هرکلی وکړ.

د ورځې تازه خبرونه دلته ولولئ

فعالان، اوس افغانستان کې د عدالت او حساب ورکونې وخت دی

د افغانستان یوشمېر مدني فعالانې، ارشیف
د افغانستان یوشمېر مدني فعالانې، ارشیف

د افغانستان یوشمېر مدني او حقوقي فعالانو په برلین کې د جرمني له چارواکو سره پرون تر غونډې وروسته ویلي اوس تر هر وخته زیات افغانستان کې " د عدالت او حساب ورکونې" وخت دی.

د افغانستان د شاوخوا پنځوس مدني او بشري بنسټونو استازیو د جرمني د بهرنیو چارو وزارت په کوربه توب دغې غونډه کې ویلي، د افغانستان اوسني واکمنان باید د سیډاو (CEDAW) کنوانسیون د نقض له کبله ځواب ویونکي وګڼل شي.

دغو بنسټونو پرون سه شنبه ترغونډې وروسته په یوه ګډه خبرپاڼه کې ویلي چې طالبانو له بیا واکمنۍ وروسته د ښځو او نجونو په وړاندې ۱۳۸ فرمانونه او اقدامات کړي چې دوی له تبعیضه ډک بللي دي.

دوی په خپله اعلامیه کې ویلي چې د عدالت غوښتنې له غږه یې باید نړیوال په ځانګړې توګه د سیډاو کنوانسیون د رهبرۍ غړي ملاتړ وکړي.

سیډاو یا د ښځو په وړاندې د هر ډول تبعیض د لمنځه وړلو کنوانسیون د ملګرو ملتونو له تایید وروسته له ۱۹۸۱ کال راهیسې نافذ دی.

افغانستان په ۲۰۰۳ کال کې دغه کنوانسیون سره یوځای شو.

طالبانو بیا ویلي، دوی هغو ټولو کنوانسیونونو ته ژمن نه دي چې پخوانیو حکومتونو لاسلیک کړي دي.

په بلوچستان ایالت کې د یوې ښځې په وسیله د ځان وژونکي برید پړه بلوڅ بېلتونپالو ومنله

د پاکستان پر امنیتي ځواکونو د یوه پخواني برید تصویر (آرشیف)
د پاکستان پر امنیتي ځواکونو د یوه پخواني برید تصویر (آرشیف)

بلوڅ بیلتونپالو د هغې ځان وژونکې حملې مسوولیت منلی دی چې د بلوچستان ایالت په کلات سیمه کې یې یو سرتېری وواژه. په دې حمله کې چې د یوې ښځې په وسیله ترسره شوه، د ملېشه ځواکونو د موټرو کاروان په نښه شو.

د بلوڅانو د آزادۍ د پوځ په نوم ډلې نن په یوه بیان کې وویل چې دا عملیات یې په بریالیتوب سره ترسره کړل. په بیان کې دا یادونه نه ده شوې چې برید ښځې کړی و، که نارینه خو د یوه سیمه ایز چارواکي پرون وویل چې د ملېشه ځواک د موټرو پر کاروان د یوې ښځې په وسیله په ځانمرګي برید کې یو سرتېری ووژل شو او څلور نور ټپیان شول.

بلوڅ بیلتونپال له څو کلونو راهیسې د غني طبیعي زیرمو د لرونکي خو بېوزلي د بلوچستان د آزادولو لپاره جګړې کوي او په دې ترڅ کې د انرژۍ تاسیسات، په تېره هغه پروژې چې چینایانو پانګونې پکې کړې دي په نښه کوي.

ډنمارک له افغانستان سره د پنځوس میلیون ډنمارکي کرون مرسته کړې ده

د ډنمارک بیرغ (آرشیف)
د ډنمارک بیرغ (آرشیف)

ډنمارک د افغانستان د مرستې صندوق ته نژدې ۷ میلیون ډالره بسپنه ورکړې ده.

د افغانستان د مرستې صندوق چې په افغانستان کې د اساسي بشري اړتیاوو لپاره د ملګروملتونو پروژې تمویلوي نن پر خپله ایکس پاڼه په یوه بیان کې خبر ورکړ چې ډنمارک له دې صندوق سره د۶،۹ میلیون ډالرو انډول د ۵۰ میلیون ډنمارکي کرون مرسته کړې ده.

په بیان کې له بېځایه شویو افغانانو، په تېره له ښځو او نجونو سره د ډنمارک د مرستو ستاینه شوې.

د ملګروملتونو د امنیت شورا د راروانې دوشنبې په ورځ د افغانستان په اړه ناسته کوي

د ملګرو ملتونو د امنیت شورا ناسته، انځور له ارشیف څخه
د ملګرو ملتونو د امنیت شورا ناسته، انځور له ارشیف څخه

په پام کې ده چې د ملګروملتونو امنیت شورا راتلونکې دوشنبې د افغانستان په اړه بحث وکړي.

د ملګروملتونو د سیاسي او سوله ایزو چارو برخې پر خپله ایکس پاڼه په یوه بیان کې لیکلي، دا غونډه د مارچ په لسمه د ډنمارک په نوښت، چې د امنیت شورا نوبتي مشري کوي جوړېږي او په افغانستان کې د ملګروملتونو د مرستندوی ماموریت یا یوناما مشره روزا اوتونبایووا به هم پکې حاضره وي.

د دې غونډې د اجنډا په اړه معلومات نه دي ورکړل شوي خو بشري حقونه او په تېره د نجونو او ښځو پر تعلیم او کار بندیزونه او همداراز د خلکو اقتصادي ستونزې هغه مسایل دي چې په تېرو څه کم څلورو کلونو کې د افغانستان په اړه د امنیت شورا د بحثونو اجنډاګانې جوړوي.

په همدې حال کې د طالبانو د حکومت ویاند ذبیح الله مجاهد ویلي دي چې یوناما د افغانستان په اړه منفي تبلیغ کوي. باختر خبري آژانس چې طالبان یې اداره کوي د ښاغلي مجاهد له قوله لیکي چې نوموړی وايي، یوناما په خپلو راپورونو کې حقایق نه وړاندې کوي او کوچني موضوعات لویوي.

طالبانو او پاکستاني ځواکونو تېره شپه بیا په تورخم کې نښته وکړه

د تورخم د بندېدو له کبله بندې پاتې لارۍ (آرشیف)
د تورخم د بندېدو له کبله بندې پاتې لارۍ (آرشیف)

د راپورونو له مخې په تورخم کې د طالبانو او پاکستاني پوځیانو ترمنځ تېره شپه بیا نښتې شوي.

سیمه ایزو سرچینو نن آزادۍ راډیو ته وویل چې جګړه اوس بنده ده خو وضعیت لاهم کړکېچن دی او د سیمې اوسېدونکي وېرېږي چې جګړه بیا پیل نه شي.

د طالبانو د حکومت د کورنیو چارو وزارت له دې مخکې تایید کړې وه چې د یکشنبې په ماخستن د پیل شویو نښتو پرمهال د دوی یو سرتېری وژل شوی او دوه نور ټپیان دي. له بلې خوا د آزادۍ راډیو مشال څانګې د سرچینو له قوله راپور ورکړی چې په پرونیو جګړو کې درې پاکستاني سرتېري ټپیان شوي وو.

په عین حال کې د راپورونو له مخې د تورخم دروازه تراوسه هم د خلکو او موټرو پرمخ بنده ده او دواړو غاړو ته یې لسګونه لارۍ بندې پاتې دي.

ملګري ملتونه: د خوړو ناامني ښځې او ماشومان ګواښي

د ملګرو ملتونو د ماشومانو وجهي صندوق (یونیسف) خبرداری ورکړی چې د افغانستان په ځینو برخو کې د خوړو ناامني ښځې او ماشومان ګواښي.

په یوه نوي راپور کې چې د یکشنبې په ورځ، د مارچ په ۱۲مه خپور شو، یونیسف وویل چې ۱۴.۸ میلیونه خلک، چې د هیواد د نفوس له دریمې برخې څخه ډیر دي، به د ۲۰۲۵ کال تر مارچ پورې د خوړو له سخت کمښت سره مخ شي.

یونیسف دا هم یادونه وکړه چې د اوږدې مودې د خوړو د نه خوندیتوب، د اوبو کمښت، ناکافي حفظ الصحې او روغتیایی خدماتو ته محدود لاسرسي اغیزې د ماشومانو او امیندوارو میرمنو ترمنځ د شدیدې خوارځواکۍ کچه لوړه کړې ده.

دا په داسې حال کې ده چې د هغو سیمو شمیر چې د څلورمې کچې خوارځواکۍ په توګه طبقه بندي شوي دي نږدې درې چنده زیات شوی، چې په ۲۰۲۴ کې له ۱۹ سیمو څخه په ۲۰۲۵ کې ۵۶ سیمو ته لوړ شوی دی.

د دې سازمان د شمېرو له مخې، په ۲۰۲۵ کال کې به په ټولیزه توګه ۷.۸ میلیونه ښځې او ماشومان چې له پنځو کلونو کم عمر لري د تغذیې مرستې ته اړتیا ولري، چې له دې ډلې به ۳.۵ میلیونه ماشومان په شدیده خوارځواکۍ اخته وي او ۱.۱ میلیونه ښځې به درملنې ته اړتیا ولري.

د طالبانو د حکومت د کورنیوچارو وزارت: په تورخم کې له پاکستاني ځواکونو سره په جګړه کې یو طالب وسله وال وژل شوی دی

د طالبانو د حکومت د کورنیوچارو وزارت وايي، په تورخم کې له پاکستاني ځواکونو سره په جګړه یو طالب وسله وال وژل شوی دی.

دواړو خواوو تایید کړکې ده چې تېره شپه د دوی ترمنځ نښته وشوه. په ننګرهار کې د طالبانو یوې سرچینې ازادي راډیو ته وویل چې جګړه لومړی پاکستاني لورې پر دوی ډزې وکړې.

د پاکستان د ملیشه ځواک یوه چارواکي د ازادي راډيو مشال څانګې ته وویل چې په جګړه کې د دوی خواته د ملېشه ځواک درې سرتیري او یو عام کس ټپي شوي دي. دې چارواکي تور ولګاوه چې جګړه د طالبانو پيل کړه.

د راپورونه له مخې جګړه اوس مهال درېدلې خو د تورخم لاره بنده ده. دا لاره د فبرورۍ له ۲۱ نیټې راهیسې بنده ده او په دې اړه د دواړو لورو خبرې بې نتیجې پا ته رسېدلي دي.

د طالبانو د کډوالو چارو وزارت له پاکستاني زندانونو د ۴۷ افغانانو د ازادېدو خبر ورکړی

عکس له ارشیفه اخیستل شوی دی
عکس له ارشیفه اخیستل شوی دی

د طالبانو د حکومت د کډوالو او راستنیدونکو چارو وزارت خبر ورکړی چې د پاکستان له زندانونو ۴۷ تنه افغان کډوال ازاد شوي دي.

یاد وزارت نن (دوشنبه، د کب ۱۳مې) پر خپله ایکس پاڼه لیکلي چې ۴۷ افغانان د کب په ۱۲مه هېواد ته راستانه شول.

د کندهار ولايت د سپين بولدک د سرحدي امریت د معلوماتو له مخې، دغه کسان د پاکستان په بېلابېلو سيمو کې د قانوني اسنادو د نه لرلو له امله نيول شوي وو او ۴۵ ورځې بنديان وو، چې د بشري مرستو له ترلاسه کولو وروسته خپلو اصلي ځایونو ته لېږل شوي دي.

په دې وروستیو کې په پاکستان کې د افغان کډوالو نیول زیات شوي او سلګونو افغان کډوال له دې هیواده ایستل شوي دي.

علي امین ګنډاپور وايي تورخم باید پرانیستل شي

تورخم
تورخم

د پاکستان د خیبرپښتونخوا اعلی وزیر علي امین ګنډاپور د تورخم د بیا پرانیستلو او یو لړ نورو مساییلو په اړه په پېښور کې د طالبانو له جنرال قونسل حافظ محب الله شاکر سره لیدلي. د خیبرپښتونخوا د حکومت په بیان کې راغلي چې دوی دواړو یکشنبه ناوخته سره لیدلي.

په بیان کې د ګنډاپور په حواله تایید شوې چې د تورخم بندېدو د دواړو خواو خلکو ته سخت تاوان اړولی او اړتیا ده چې لار ژر تر ژره خلاصه شي.

ګنډاپور ویلي چې په سیمه کې بد امني دواړه خواوې اغېزمني کړي.

د خیبرپښتونخوا اعلی وزیر نه دي ویلي چې څه وخت به تورخم بیا پرانیستل کېږي.

د طالبانو حکومت وايي چې پاکستاني لوري د فبروري له ۲۱مې تورخم په یو اړخیزه توګه تړلی.
د دې کار دلیل د طالبانو له خوا د پوستو جوړول یاد شوي چې پاکستاني چارواکي وايي د دوی په خاوره کې يې جوړوي.

یکشنبه هم په تورخم کې د طالبانو او پاکستاني چارواکو له خوا د تورخم په بیا پرانیستلو باندې مذاکرات شوي وو چې له نتیجې پرته پای ته ورسېدل.

د ایران کرمان کې د افغان کارګرو د ګمارلو په تور ګڼې فابریکې تړل شوي

د یوه ځای د تړلو دړه
د یوه ځای د تړلو دړه

ایراني رسنیو راپور ورکړی چې چارواکو په کرمان کې د افغان کارګرانو د استخدام په خاطر ځینې فابریکې تړلې دي.

د ایران رسمي دولتي خبري اژانس صدا و سیما راپور ورکړی چې د بیګانه او ناقانونه اتباعو د ګمارنې او د ګران پلورنې په خاطر د ځینو کارخونو پلټنه او تړل دوام لري.

ایران کې د یوې قانوني لایحې له مخې د اتباعو چې معمولاً یې افغان کډوالو ته کاروي په کار ګمارنه ناقانونه ګرځول شوې او که فابریکې کوم افغان کارګر استخدام کړي نو د ورځې څه باندې یو میلیون تومانه جریمه کېږي او بلاخره یې کار تړل کېږي.

ایراني چارواکو خبرداری ورکړی چې د افغان راجستر شویو کډوالو اقامه د همدې کال تر پایه کار ورکوي او تر هغه وروسته به افغانان له خپلې خاورې وباسي.

ایران بیا په تېر یوه کال کې شاوخوا یو میلیون افغان کډوال چې قانوني اسناد یې نه درلودل له خپلې خاورې ایستلي.

نور راوښيه

XS
SM
MD
LG