د انلاین اوپن ډیموکراسۍ
د انلاین اوپن ډیموکراسۍ خپرونې په دې عنوان یوه مقاله خپره کړې چې: په افغانستان کې به سوله د طالبانو لپاره بریا او د لویدیځ لپاره ناکامي وي.
د مقالې په پيل کې راغلي پر طالبانو د متحده ایالاتو د ټولو فشارونو سربیره دا ډله لا هم قوي پاتې ده.
لاندې یوه پوښتنه هم شوې چې د امریکا متحده ایالتونو ولسمشر ډونالډ ټرمپ څومره د سولې د معاملې په اړه جدي دی؟
خپرونې د امریکا متحده ایالاتو او طالبانو تر منځ د تاوتریخوالي د اوه ورځني کمښت د
موافقې په اړه هم لیکلي او دا چې ایا واقعاً همداسې کېږي که څنګه؟
انلاین اوپن ډيموکراسي لیکلي معلومه نه ده چې ټرمپ او د هغه نږدې کسان په واقعیت د یوې معاملې غوښتونکي دي.
د خپرونې په لیکنه له دې سختیو ور هاخوا ایا لنډمهالی اوربند به د دوامداره سولې لپاره لار پرانیزي داسې سوله چې پکې بشري حقونو ته د درناوی په کې تضمین شي؟
د کابل پوهنتون د حقوقو او سیاسي علومو استاد پوهاند نصرالله ستانکزي ازادي راډیو ته ویلي چې په افغانستان کې د سولې ټینګښت د دغه هېواد نړیوالو متحدینو ته لومړیتوب لري.
امریکا متحده ایالتونو په وار وار ویلي چې په افغانستان کې د دوامداره سولې ټینګښت غواړي.
د افغان سولې لپاره د امریکا خاص استازي زلمي خلیلزاد او طالب مرکچیانو د قطر پلازمینه دوحه کې د تاوتریخوالي د کمښت موافقه نهايي کړې.
دا موافقه د دایمي سولې او اوربند د ټینګښت پیلامه بلل کېږي چې تمه د فبروري په وروستۍ کې د تاوتریخوالي د کمښت د اوه ورځنۍ پروسې په بریالي کېدو سره لاسلیک شي.
- لاس انجلس ټایمز
لاس انجلس ټایمز ورځپاڼې لیکلي چې که چېرته په افغانستان کې د امریکا او طالبانو نښتې وشي د دوی تر منځ موافقه ماتوي.
په دوام کې د بېلګې په توګه یوه قضیه راوړل شوې چې څنګه د امریکا او طالبانو تر منځ په تېر نومبر کې یو لنډکی اوربند ژر مات شو.
ورځپاڼه لیکي د امریکا او طالبانو تر منځ د زابل ولایت په دریو ولسوالیو کې تېر نومبر یو لنډ اوربند وشو چې ژر د نښتو په بیا پيل سره مات شو.
دا غیر رسمي اوربند د طالبانو له دریو لوړپوړو قومندانانو سره د افغانستان امریکايي پوهنتون د یوه امریکايي او یوه استرالیايي استاد د مبادلې په خاطر ټینګ شوی و.
د لاس انجلس ټایمز په لیکنه که څه هم تبادله وشوه خو د دواړو لوریو تر منځ باور مات شو.
تازه د امریکا او طالبانو تر منځ د تاوتریخوالي د کمښت د اوه ورځني نهايي شوي تړون لپاره هم د چارواکو په خبره دا شرط اېښودل شوی چې طالبان به له بمي چاودنو او انتحاري بریدونو لاس اخلي او د امریکايي او افغان پوځیانو اډې به نه نښه کوي.
