د چین چارواکو ویلي، د کرونا ویروس له کبله د مړو شویو کسانو شمېر یوزر او شپاړسو ته پورته شوی.

د چین د روغتیا ملي کمېسیون وویل چې یوازې پرون د دغه ویروس له کبله له اته سوه ډېر کسان مړه شول.

په چین او ۲۴ څلورویشتو نورو هېوادونو کې تراوسه د کرونا ویروس نژدې درې څلویښت زره مثبتې پیښې ثبت شوې دي.

د روغتیا نړیوال سازمان ویلي، دا د جدي اندېښنې خبره ده چې په دې ویروس هغه کسان هم اخته شوي چې چین ته نه دي تللي.

اوکراین ویلي، په یوې چارتر الوتکې کې به خپل پنځوس هېوادوال چې په وهان ښار کې دي، کیف ته ولېږدوي.

په همدې حال کې هغه بیړۍ کې چې د جاپان په یوه بندر کې قرنطین شوې او درې زره او ۷ سوه مسافر او عمله په کې سپاره دي، د کرونا د مثبتو پېښو شمېر ۱۳۵ ته رسېدلی دی.

د امریکا ولسمشر ډونالډ ټرمپ وايي، هېواد يې پر ایران په برید کې ښکیل نه دی.

ټرمپ پرون ناوخته پر خپلې سوشل پاڼه ټروټ کې لیکلي، "امریکا پر ایران د نن شپې په بریدونو کې هیڅ رول نه درلود".

د ټرمپ دا څرګندونې په داسې حال کې دي چې د اسراییلو او ایران ترمنځ جګړه روانه ده.

ایراني رسنیو نن یکشنبې راپور ورکړی چې اسراییلو د ایران د دفاع وزارت او د وسلوالو ځواکونو د ملاتړ د قوماندې مرکز په نښه کړي دي.

تر دې مخکې د ایران له خوا پر اسراییلو د راکټي او بې‌پیلوټه الوتکو د بریدونو راپورونه ورکړل شوي وو.
د ایران سپاه پاسداران ګواښ کړی که اسراییل پر ایران خپلو بریدونو ته دوام ورکړي، تهران به يې هم په "پراخه" کچه ورته ځواب ووايي.

د امریکا ولسمشر ټرمپ ویلي، "که چیرته ایران پر امریکايي اهداف بریدونه وکړل، د امریکا د وسله وال ځواکونه به په ټول ځواک او وړتیا سره په بې سارې کچې د تهران ځواب ورکړي".

ټرمپ وړاندې ویلي،" د ایران او اسراییلو ترمنځ توافق کولی شي په اسانۍ سره دا خونړۍ جګړه پای ته ورسوي".

د ایران د بهرنیو چارو وزیر عباس عراقچي پرون شنبې د اروپايي ټولنې له یوې لوړپورې چارواکې سره په خبرو کې ویلي و، پر ایران د اسراییلو له بریدونو وروسته د اټومي پروګرام په اړه خبرې اترې نه توجیه کیدونکې دي.

د امریکا ولسمشر ډونالډ ټرمپ د خپل هېواد پوځیان " د نړۍ تر ټولو پیاوړي" ځمکني ځواکونه وبلل او د هغوي لاسته راوړنې یې وستایلې.

ټرمپ پرون شنبه په واشنګټن کې د خپل پوځ د جوړولو د ۲۵۰مې کلیزې مراسمو ته وویل چې ځواکونو یې د افغانستان په ګډون بېلابېلو سیمو کې لاسته راوړنې درلودلې او ځلیدلي دي.

د دغو مراسمو پر مهال ځانګړې پوځي نندارې هم ترسره شوي دي.

د راپورونو له مخې، امریکا ۲ اعشاریه ۸۶ میلیونه پوځیان لري.

دغه مراسم د امریکا د ولسمشر ډونالډ ټرمپ د زیږېدو له نهه اویایمې کلیزې سره هممهاله نیول شوي دي.

ټرمپ ویلي، د روسیې ولسمشر د کلیزې د مبارکۍ په پار پرون ورسره ټیلفوني خبرې کړي، خو په خبره یې تر ډیره د ایران پر وضعیت متمرکزې وې.

د امریکا په ګڼ شمېر ښارونو کې پرون شنبه هم مظاهرې روانې وې.

د اسوشیتید پریس خبري اژانس په وینا مظاهره چیانو د استبداد ضد او د ډیموکراسۍ او کډوالو د حقونو په ملاتړ شعارونه ورکول.

امریکایي چارواکو له مظاهره چیانو څخه د ارامۍ غوښتنه کړې او ویلې يې دي چې تاوتریخوالی هیڅ د زغملو نه دی.

په لاس انجلس کې چې د لومړي ځل لپاره تېره اونۍ دغه اعتراضونه وپارېدل، د پولیسو او مظاهره چیانو ترمنځ اخ او ډب شوی او پولیسو له اوښکې بهونکي ګاز او نورو وسایلو څخه استفاده کړې.

دغه مظاهرې وروسته تر هغه وپارېدې چې د ګمرک او کډوالۍ پولیسو د لاس انجلس په لاتین میشته سیمه کې پر کډوالو چاپې ووهلې.

چارواکي وایي، د چاپو هدف یې د غیر قانوني کډوالو نیول او د هغوی اخراجول دي.

جنوبي افریقا د کرکټ د ټسټ میچ په پایلوبه کې نن د استرالیا لوبډلې ته د پنځو ویکټو په توپیر ماته ورکړه.

دا لوبه د جون په یولسمه په لندن کې پيل شوه، لومړی بټنګ استرالیا وکړ چې په دوه سوه دولس منډو یې ټول لوبغاړي وسوځیدل، په ځواب کې یې د جنوبي افریقا لوبغاړو یوازې یوسل او اته دیرش منډې وکړې.

په دوهم ځلي بټنګ کې استرالیا دوه سوه اووه منډې وکړې او جنوبي افریقا د پنځو لوبغاړو په سوځیدو د دواړو پاڼیو توپير پوره کړ او دوه سوه دوه اتیا منډې یې جوړې کړې.

دا لومړی ځل دی چې د کرکټ د پنځه ورځنیو لوبو پایلوبه جنوبي افریقا خپلوي.

د کرکټ د ټسټ لوبو دا دریمه اتلولي وه، په دوه زره یو ویشتم کال کې نیوزیلنډ اتل شو او په دوه زره درویشتم کې استرالیا د دې لوبو قهرمان شوی و.

د ایران دولتي رسنۍ نن د استخباراتو د مرستیال جنرال غلام رضا محرابي او د عملیاتي مرستیال جنرال مهدي رباني وژنه تایید کړې.

تر دې مخکې د ایران د وسله والو ځواکونو د مشرتابه لویه برخه وژل شوې ده.

د سپاه پاسداران د عمومي قومندان حسین سلامي، لوی درستیز محمد باقري، د قدس د ځواکونو د مشر اسماعیل قاآني او ګڼو اټومي ساینسپوهانو وژنه تایید شوې وه.

ایران په ټوله کې د شاوخوا ۸۷ کسانو وژنه او د څه باندې ۳۲۰ ټپيانېدل تایید کړي.

اسراییلي چارواکو هم تایید کړې چې د ایران په ځوابي بریدونو کې په اسراییلو کې لږ تر لږه درې کسان وژل شوي او څه باندې ۱۵۰ نور ژوبل دي.

ایران په لرې واټن ویشتونکو توغندویو په تل ابیب او څو نورو سیمو کې بریدونه کړي.

یو افغان چې د امریکا د ولسمشرۍ د ټاکنو په ورځ د برید د پلان په تور نیول شوی، پرون (د جمعې په ورځ) په خپل جرم اعتراف وکړ.

۲۷ کلن نصیر احمد توحیدي د اسلامي دولت یا داعش ډلې د ملاتړ او د تروریستي عمل لپاره د وسلو د ترلاسه کولو په دوو تورونو تورن دی.

توحیدي که مجرم وپیژندل شي، تر ۳۵ کلونو پورې په بند محکوم کیدی شي.

د محکمې د اسنادو له مخې، د اوکلاهوما اوسیدونکی نصیر احمد توحیدي تیر کال د ټاکنو په ورځ د برید لپاره دوه کلاشینکوف ټوپکونه او ۵۰۰ مرمۍ ترلاسه کړې وې.

د FBI مشر کیش پټیل په یوه بیان کې وویل: "متهم اعتراف وکړ چې د ۲۰۲۴ کال د ټاکنو په ورځ یې د مرګوني برید پلان جوړ کړی و - یو برید چې د FBI او زموږ د شریکانو د ښه کار له امله کشف او شنډ کړای شو."

د متحده ایالاتو چارواکو ویلي چې توحیدي د برید پلان لپاره د میاشتو راهیسې د خپلې میرمنې د ورور عبدالله حاجي زاده په ګډون له څو نورو سره په تماس کې و.

حاجی زاده، چې هغه وخت ۱۷ کلن و، په اپریل کې په خپل جرم اعتراف وکړ. هغه د ۱۵ کلونو بند سره مخ دی.

نصیر احمد توحیدي، د طالبانو له واک ته رسیدو وروسته د ۲۰۲۱ کال په سپتمبر کې د کډوالۍ په ځانګړې ویزې متحده ایالاتو ته تللی.

ایران او اسراییل نن شنبې هم په یو بل د توغندیوباړونه وچلول او هوايي بریدونه و کړل.

په داسې حال کې چې دایراني توغندیو څپې داسراییلو فضا ته ورسیدې او دافع هوا سیستم یې د شنډولو لپاره لاس په کار شو ، په شمول د تل ابیب او بیت المقدس د اسراییل په ټولو سیمو کې د هوایي بریدونو دخطر شپیلی وغږول شوې، او اوسیدونکي یې په چټکۍ سرپناه ته ستانه سول.

د اسراییلو د امبولانس خدماتو ادارې په وینا، په اسراییلو کې یو سړی او یوه ښځه د هغه توغندي له امله ووژل شول او لسګونه نور ټپیان شول چې د دوی کورونو ته نږدې ولګېد.

د ژغورنې ټیمونو د تل ابیب څخه بهر په ریشون لیزیون ښار کې د ویجاړو شویو ودانیو لاندې د پلټنې او ژغورنې هلوځلو ته مخه کړه.

د اسراییلو دفاع وزیر یسراییل کاټز د شنبې په ورځ وویل چې د ایران مشرتابه په ملکي وګړو برید سره ، سره کرښه ماته کړه او "د دې لپاره به درنه بیه پریکړي".

بلخوا ، د فلسطین سرې میاشتې وویل د حوثي ملیشو لخوا له یمن څخه یو توغول شوي توغندي د اسراییلو په اشغال شوي لویدیځه غاړه کې د دریو ماشومانو په ګډون پنځه فلسطینیان ووژل.

په ایران کې، د نیمه رسمي تسنیم خبري اژانس راپور ورکړی چې په پلازمینه تهران کې د شپې څو چاودنې واورېدل شوې.

د فارس خبري اژانس هم ویلي چې د تهران په مهرآباد هوايي ډګر کې دوه توغندي ولګېدل، او د ایران رسنیو ویلي چې هلته د اور لګېدو راپورونه ورکړل شوي دي.

مهرآباد هوايي ډګر چې نږدې ورته دایران د رهبري مهمو ځایونه دي د جنګي جیټ او ترانسپورتي الوتکو یوه اډه هم لري.

ملګرو ملتونو کې د ایران استازي امیر سعید ایرواني وویل چې په ایران باندې د اسراییلو په بریدونو کې د لوړ پوړو پوځي چارواکو په شمول ۷۸ کسان وژل شوي او له ۳۲۰ څخه ډیر ټپیان شوي دي، چې ډیری یې ملکي وګړي دي.

د متحده ایالاتو ولسمشر ډونالډ ټرمپ د "اکسیوس" خبري وېب‌سایټ ته ویلي چې باور لري د اسراییلو پراخ برید پر ایران به د امریکا او ایران ترمنځ د اټومي توافق د ترلاسه کولو احتمال زیات کړي.

کله چې له هغه وپوښتل شول چې آیا د اسراییلو برید د ده اټومي ډیپلوماسي له خطر سره مخ کړې، نو ټرمپ وویل: "زه فکر نه کوم. ښايي برعکس وي. شاید اوس هغوی جدي خبرې اترې وکړي."

ډونالډ ټرمپ همداراز ټینګار وکړ چې جمعه یو مهم ورځ وه، او اسراییل په همدې ورځ د «فوق‌العاده امریکايي تجهیزاتو» څخه استفاده کړې ده.

همدغه راز د متحده ایالاتو ولسمشر، له هغه وروسته چې اسراییل پر ایران بریدونه پیل کړل، اعلان وکړ چې دوه میاشتې مخکې یې ایران ته ۶۰ ورځنی ضرب‌الاجل ورکړی و، څو «توافق ته ورسېږي»، او زیاته یې کړه چې اوس تهران دویمه موقع لري.

ډونالډ ټرمپ د جمعې په ورځ، د جوزا پر ۲۳مه، په خپل ټولنیز شبکه "Truth Social" کې ولیکل: "دوه میاشتې مخکې مې ایران ته ۶۰ ورځنی ضرب‌الاجل ورکړ، څو یوه توافق ته ورسېږي. هغوی باید دا کار کړی وای! نن ۶۱مه ورځ ده. ما هغوی ته وویل چې څه وکړي، خو هغوی ونه‌شو کولای دا کار ترسره کړي. اوس، شاید، هغوی دویم چانس ولري."

ټرمپ په یوه بله پیغام کې هم ولیکل: "لا هم وخت شته چې دې وژنو ته... د پای ټکی کېښودل شي» او زیاته یې کړه: «ایران باید مخکې له دې چې هېڅ پاتې نه شي، توافق وکړي او هغه څه وژغوري چې یو وخت د ایران امپراتورۍ بلل کېدل. بس دا کار وکړئ، مخکې له دې چې ناوخته شي."

ډونالډ ټرمپ همداراز ټینګار وکړ چې: "ما ایران ته بیا بیا فرصت ورکړی چې توافق وکړي."

ایران تر۱۰۰ زیاتې بې پیلوټه الوتکې د اسرائیلو په لور توغولي دي.

د اسرائیلو اردو شیبه مخکې اعلان وکړچې ایران دغه شمیر الوتکې توغولي او اسرائیل یې دنسکورولو لپاره تابیا نیولې ده.

داسرائیلو اردو وویل په ایران برید کې د اسرائیلو ۲۰۰ جنګي الوتکو ګډون وکړ او څه دپاسه ۱۰۰ هدفونه ویشتل شوي دي.

د اسرائیلو صدراعظم وايي چې د ایران په مختلفو هدفونو باندې د هیواد لومړني بریدونه په بشپړ ډول بریالي وو.

رادیو فردا ، دآزادې اروپا / آزادي راډیو ایراني څانګه دبنیامین نتانیاهو له قوله رپوټ ورکوي چې په دغو بریدونو کې دایران څو کسه لوړ رتبه پوځیان هم په نښه شوي دي.

اسرائیلي چارواکو د جمعې په سهار اعلان وکړ چې دوی د ایران په اټومي تاسیساتو باندې " واردمخه" برید ترسره کړی دی.

د اسرائیلو صدراعئم د ایران محتمل انتقامي برید ته په اشاره وویل اسرائیلي اتباع ممکن د اوږدې مودې لپاره په پناه ځایونو کې پاتې شي او باید پوځي لارښوونې تعقیب کړي.

بلخوا ، د ایران د بهرنیو چارو وزارت په یوه بیان کې وویل چې د اسرائیلو بریدونه دامریکا متحدو ایالاتو سره په همغږي ترسره شوي او واشنګټن یې ددغو بریدونو دنتایجو مسئول ګڼلی دی .

ایران سره لدې دا ادعا کوي چې دامریکا د بهرنیو چارو وزیر مارکو روبیود اسرائیلو له برید وروسته وویل چې متحده ایالات په دې بریدونو کې هیڅ رول نلري او ایران باید په سیمه کې د متحده ایالاتو د پوځي اډو له نښه کولو څخه ډډه وکړي.

بلخوا دایراني رسنیو رپوټونه وايي د سپاه پاسداران ځواکونو یو شمیر قوماندانان په دغو بریدونو کې وژل شوي دي .

د فارس خبري اژانس، چې سپاه پاسداران ته نږدې رسنۍ ده ، راپور ورکړ چې د اسلامي جمهوریت د وسله والو ګډو ځواکونو مشر محمد باقري د اسرائیلو په بریدونو کې وژل شوی دی.

سپاه پاسداران هم په خپله اعلامیه کې د اسرائیلو په بریدونو کې د خپل قوماندان حسین سلامي د وژل کیدل تایید کړل.