د چین چارواکي وايي، په دې هېواد د کې د کرونا ویروس له کبله د وژل شویو شمېر ۹۰۸ کسانو ته لوړ شو.

په چین کې د کرونا ویروس ډېری مثبتې پيښې په هوبای ایالت کې دي.

۹۱ کسان په دې ایالت کې په کرونا ویروس اخته شوي دي.

دا هغه ځای دی چې لومړی ځل په ډسېمبر میاشت کې دا ویروس ولیدل شو.

په ټوله نړۍ کې چې ډېری یې په چین کې دي، ۴۰۱۷۱ مثبتې پيښې لیدل شوي.

له چینه د باندې په ۲۴ هېوادونو کې درې سوه پېښې تائيد شوي.

د روغتیا نړیوال سازمان د معلوماتو له مخې په دغو کسانو کې یو مړ شوی دی.

چین له انتقاد سره مخامخ شوی چې په لومړي سر کې يې د دې ویروس مخه سمه ونه نیوله په ځانګړې توګه کله چې هغه ډاکتر له همدې ویروسه مړ شو چې د ویروس په اړه یې خبرداری ورکړی وو.

د ووهان په روغتون کې ۳۴ کلن ډاکتر لي وین لیانګ په دې ویروس اخته او د تیرې جمعې په ورځ مړ شو.

ده ویلي وو چې د ووهان پولیسو یوه میاشت مخکې نیولی وو چې ولې د مرګوني ویروس په اړه اوازې خپروي.

د چین حکومت بشپړه ښارونه قرنطین کړي چې دا ویروس نور هم خپور نشي.

د چین د هوبای ایالت ښوونځي به د مارچ تر لومړۍ نېټې تړلي وي.

د ټي بي ایس تلویزیون د راپور له مخې جاپان په قرنطین شوې بیړۍ کې د کرونا ویروس ۱۳۰ مثبتې پيښې ثبت کړي.

د اوکراین د روغتیا وزارت وايي، پرون د یکشنبې په ورځ له دې بیړۍ یو اوکراینی چې په کرونا ویروس اخته شوی و، راوېستل شوی او په ځايي روغتون کې بستر شوی دی.

دی به لږ تر لږه ۱۴ ورځې په یوه جلا خونه کې ساتل کېږي.

دا بېړۍ به په جاپان کې قرنطین پاتې وي.

یوه بله بیړۍ چې په هانګ کانګ کې له تېرو څلورو ورځو راهيسې درول شوې وه، نن يې مسافرو ته د وتلو اجازه ورکړل شوه.

د امریکا د مخکیني ولسمشر جوبایډن دفتر اعلان کړی چې نوموړی د پروستات د سرطان په داسې یوه تهاجمي بڼه اخته شوی چې هډوکو ته رسېدلی دی.

د بایډن دفتر پرون یکشنبې (د ثور ۲۸مه) په یوه بیان کې وویل چې د پروستات سرطان د جمعې په ورځ د هغه د بولو له معاینې وروسته تشخیص شو.

د بیان له مخې ۸۲ کلن بایدن او کورنۍ یې اوس د درملنې لارې چارې لټوي.

ولسمشر ډونالډټرمپ پر ټروت ټولنیزه شبکه په یوه بیان کې ویلي دي چې دی او مېرمن یې میلانیا د بایډن د ناروغۍ د تشخیص د خبر په اورېدو خواشیني شول.

ټرمپ زیاتوي چې د بایډن مېرمنې جیل او نورې کورنۍ ته یې نیکې هیلې وړاندې کوي او د بایډن لپاره سمدستي روغتیا غواړي.

بایډن له ۲۰۲۱ څخه تر ۲۰۲۵ کال پورې د امریکا ولسمشر و.

اسراییلو اعلان کړی چې له دریو میاشتو کلابندۍ وروسته به د غزې تړانګې ته په لږه اندازه بشري مرستې ورپرېږدي.

له دې څو ورځې مخکې د غذايي امنیت کارپوهانو خبرداری ورکړی و، چې غزې ته د خوړو پر پریښودو بندیز به یو بشري ناورین رامنځ ته کړي.

د اسراییل صدراعظم بنیامین نتنیاهو پرون وویل چې په غزه کې د لوږې بحران به په دې سیمه کې د اسراییلو نوي پوځي عملیات له خنډ سره مخامخ کړي، نو ځکه د هغه کابینې دې تړانګې څه باندې دوه میلیون اوسېدونکو ته په محدوده کچه د اساسي خوراکي موادو پرېښودل تایید کړل.

تراوسه معلومه نه ده چې اسراییل به مرستې کله او څنګه غزې ته پرېږدي او د پوځ هغې څانګې چې دا چاره سمبالوي هم په دې اړه تبصره نه ده کړې.

اسراییل د مرستندویو ټولنو له اعتراضونو سره سره د غزې لپاره د مرستو یو ځانګړی رژیم په پام نیولی او ښاغلي نتنیاهو ویلي دي چې اسراییل باید دا یقیني کړي چې دا مرستې د وسله والو لاس ته نه ورځي.

اسراییلو د مارچ په دوهمه نېټه د غزې ته پر بشري مرستو بندیز ولګاوه.

د کاتولیک عیسویانو مذهبي مشر پاپ لیو څوارلسم د اوکراین له ولسمشر ولادیمیر زیلینسکي سره ولیدل.

د اوکراین ولسمشر د رومن کاتولیک کلیسا مشر ته سترګې په لار و چې د اوکراین په وړاندې د روسیې د نژدې 39 میاشتنۍ جګړې د پای ته رسېدو په برخه کې مرسته وکړي.

د می په اتلسمه له زیلینسکي سره د پاپ لیو لیده کاته د هغه په رسمي توګه د دندې تر پیلولو وروسته دي. دا د پاپ له یو څو شخصي غونډو څخه یوه وه چې د پاپ په توګه د ټاکل کېدو تر مراسمو وروسته شوې.

لیو په خپله دعا کې وویل: "شهید اوکراین د یوې عادلانه او تلپاتې سولې لپاره د خبرو اترو په تمه دی."

د زیلینسکي دفتر وروسته د اوکراین د مشر او پاپ عکسونه خپاره کړل. د زیلینسکي میرمن، اولینا، او د هغه د بهرنیو چارو او دفاع وزیران هم په دغو عکسونو کې لیدل کیږي.

له بروکلین پله سره د مکسیکو د سمندري ځواکونو د روزنې د یوې کښتۍ د ټکر کېدو په پېښه کې دوه کسان ووژل شول او ۱۹ نور ټپیان شول.

د نیویارک ښاروال ایریک اډمز د یکشنبې په ورځ، د می په ۱۸مه، دا پیښه اعلان کړه.

په دې پېښه کې، د بېړۍ ټولې درې ستنې، یا عمودي برخې ماتې شوې او په نتیجه کې يې په ۲۷۷ مسافرو کې ترهه خپره شوه.

دا بیړۍ د برېښنا له پرې کېدو وروسته له پله سره ټکر شوه.

د راپورونو له مخې، هیڅوک په اوبو کې نه دي لویدلي او پله ته هم جدي زیان نه دی رسیدلی.

دا بېړۍ د سې شنبې له ورځې راهیسې له منهاټنه د ایسلینډ پر لور روانه وه.

دا په متحده ایالاتو کې له یوه کاله په کمه موده کې د کښتۍ او پله ترمنځ د ټکر دوهمه مرګونې پېښه ده.

د تهران د خبرو د فورم څلورمه دوه ورځنۍ غونډه د یکشنبې په ورځ، د ایران د ولسمشر مسعود پزشکیان او د طالبانو د بهرنیو چارو سرپرست وزیر امیر خان متقي په ګډون د ۵۳ هیوادونو د استازو په حضور سره پیل شوه.

یوه ورځ مخکې، د ایران د بهرنیو چارو مرستیال وزیر سعید خطیب زاده ویلي وه چې افغانستان د تهران د خبرو اترو د فورم د اجنډا یوه مهمه برخه ده.

د طالبانو د بهرنیو چارو سرپرست وزیر، چې د دې ډلې د یوه پلاوي مشري کوي، د شنبې په ورځ تهران ته ورسید او د ایران د بهرنیو چارو له وزیر عباس عراقچي سره یې ولیدل.

د طالبانو د بهرنیو چارو وزارت ویلي چې په دې غونډه کې د دوه اړخیزو اړیکو، امنیتي مسلو، اوبو او کډوالو په اړه خبرې وشوې.

د ۲۰۲۵ کال د یوروویژن سندرو په سیالۍ کې، د اتریش سندرغاړي جې جې د "ضایع شوې مینې" په نوم سندرې سره لومړی مقام وګاټه.

د دغه اتریشي - فیلیپایني هنرمند سندرې په 436 نمرو سره لومړی ځای خپل کړ. اسراییل په ۳۵۷ نمرو سره دوهم او استونیا د ۳۵۶ نمرو سره دریم مقام ترلاسه کړ.

۲۴ کلن جې جې د جایزې له ترلاسه کولو وروسته وویل: "مینه په نړۍ کې تر ټولو پیاوړې قوه ده، راځئ چې نوره مینه خپره کړو."

د یوروویژن د سندرو ۶۹مه سیالي تېره شپه د سویس په باسل کې ترسره شوه.

یوروویژن په نړۍ کې د ژوندۍ موسیقۍ له لویو سیالیو څخه ده، چې هر کال په یوه اروپايي هیواد کې ترسره کیږي.

د یوروویژن د سندرو سیالي ۲۰۲۵ کال ۶،۵۰۰ کسانو په شخصي توګه او په لوبغالي کې ۳۶،۰۰۰ کسانو په ژوندۍ بڼه ولیدله.

د ایران قضا اعلان کړی چې د رپ د سندرغاړي امیر تَتَلوُ د اعدام حکم قطعي او د تطبیق وړ دی خو د هغه د توبې غوښتنه او د دې قضیې بیا کتنه هم تر غور لاندې دي.

د قضا ویاند غلام حسین جهانګیر پرون وویل، امیرحسین مقصودلو چې په امیر تتلو هم مشهور دی، مخکې د فساد او فحشا د هڅونې په تور په لس کاله بند محکوم شوی او اوس مهال خپله د بند موده تېروي.

تتلو همداراز دیني مقدساتو ته د سپکاوي په تور په پنځه کاله بند محکوم شوی و، خو وروسته پرې د اعدام حکم وشو.

د ایران د قضا ویاند زیاته کړه چې سترې محکمې د اعدام حکم تایید کړی دی او د تطبیق لپاره محکمې ته اعلان شوی خو په عین حال کې به ډېرژر د تتلو د نویو غوښتنو په اړه د ارزونو نتیجه اعلان شي.

د ایران مخکښو څېرو د تتلو د عفوې غوښتنه کړې ده.

اسراییل وايي چې د یمن له لوري یو ویشتل شوی توغندی یې شنډ کړی دی. د اسراییل پوځ نن په یوه بیان کې وویل چې دا توغندی د حوثي وسله والې ډلې له خوا د اسراییل پر لور توغول شوی و.

د بیان له مخې د دې توغندي له توغولو سره سم د اسراییل په څو ښارونو کې د خطر زنګونه ووهل شول.

حوثي وسله والو که څه هم له متحدوایالتونو سره موافقه کړې چې پر یوبل به حملې نه کوي خو پر اسراییلو د توغندیو توغولو ته دوام ورکوي او وایي چې دا کار د غزې له فلسطیني وګړو سره د خواخوږۍ په پار کوي.

اسراییلو هم پر یمن ځوابي حملې کړې دي او په دې ترڅ کې یې د مې په شپږمه د پلازمېنې صنعا اصلي هوايي ډګر زیانمن کړ او ګڼ کسان یې ووژل.

د هند د اوديشا ایالت د یوه کلي اوسېدونکو مېرمنو د “خیالي نقشو“ په نوم داسې نقشې جوړې کړې دي چې د طبیعي سرچینو کموالی ښيي.

د دې سیمې اوسېدونکي د حاصلاتو د ټولولو په کلني جشن کې د شپې د ډوډۍ لپاره کبان او مارماهي چمتو کوي خو په دې سیمه کې اوس اوس کبان، ځنګلي مېوې او نورې طبیعي سرچینې د کمېدو په حال کې دي.

د لسو کلیو اوسېدونکو مېرمنو د هغو نقشو په مرسته چې د یوې غیرحکومتي ټولنې په مرسته یې برابرې کړې دي، له ایالتي حکومت څخه د خپلو سرچینو او ځمکو د احیا لپاره مرسته ترلاسه کوي. د دوی د اټکل له مخې د دې سرچینو د بیا ژوندي کولو لپاره شاوخوا دوه میلیون ډالره بسپنې ته اړتیا شته.

د اقلیم بدلون، نامنظمو بارانونو او د تودوخې لوړېدو د دې ایالت د خلکو پر ژوند ډېر ناوړه اغیز کړی دی.

دا مېرمنې که څه هم د لومړي ځل لپاره په رسمي ډول خپل غږ اوچتوي خو وايي چې دې اقدام د دوی د ډاډ او باور کچه لوړه کړې ده.

د دې کلي یوه اوسېدونکې وايي چې "ځنګل یې ژوند دی، دوی هلته زېږېدلې دي او هلته مري خو ځمکه د دوی هرڅه ده."

د کییف او مسکو ترمنځ د مستقیمو خبرو له پیل څو ساعته وروسته اوکرایني چارواکو وویل چې د روسیې یوه ډرون د اوکراین په شمال ختیځه سیمه سومي کې نهه کسان وژلي دي.

د سومي والي او د اوکراین ملي پولیس وايي چې دا حمله د روسیې سرحد ته نژدې په بیلوپیلیا سیمه کې وشوه چې په ترڅ کې اوه نور کسان هم ټپیان شول. پولیس زیاتوي چې د دریو ټپیانو حالت نازک دی.

د اوکراین ولسمشر ولودیمیر زیلینسکي پر ټلګرام شبکې په یوه بیان کې دا حمله د ملکي وګړو د وژنې یوه عمدي هڅه بللې ده.

د روسیې او اوکراین استازي د پرونیو خبرو پرمهال پر اوربند سره سلا نه شول. ښاغلي زیلینسکي وویل چې روسیه یوازې د خلکو د وژلو توان لري.

روسیې تراوسه په دې اړه څه نه دي ویلي.