د سعودي لویه څارنوالي وايي، د سعودي خبریال جمال خاشقجي د قتل د قضیې په تړاو پنځه کسان په اعدام محکوم شوي دي.

د سعودي عربستان دې چارواکو نن دوشنبې همدارنګه اعلان وکړ چې درې تنه نور په ۲۴ کاله بند هم محکوم شوي دي.

خاشقجي د واشنګټن پوسټ ورځپاڼې لپاره لیکنې کولې او تېر کاله په استانبول کې د سعودي په قونسلګرۍ کې ووژل شو.

دې وژنې په نړیواله کچه د سعودي عربستان پر واکمنو غوسه او نیوکې راپورته کړې.
د امریکا استخباراتي ادارو ویلي چې د سعودي عربستان ولیعهد محمد بن سلمان ددې وژنې امر کړی و. ریاض بیا په دې قتل کې د سعودي خپلسري استخباراتي چارواکي ملامته بللې دي.

سعودي څارنوال ویلي، د ولیعهد سلاکار سعود القحطاني په دې قضیه کې ښکلیل نه و، خو امریکا متحده ایالاتو په دې وژنه کې د لاس لرلو په خاطر پر قحطاني بندیزونه لګولي دي.

جمال خاشقجي د وروستي ځل لپاره په ۲۰۱۸ میلادي کال د اکټوبر میاشت کې په استانبول کې د سعودي قونسلګرۍ ته د ننوتلو پر مهال ولیدل شو. نوموړي غوښتل تر واده مخکې له سعودي قونسلګرۍ څه اسناد ترلاسه کړي.

د راپورونو له مخې د هغه مړې ټوټې ټوټې شوی او د قونسلګرۍ له ودانۍ ایستل شوی دی.

د نوموړې د جسد پاتې شونې نه دي موندل شوي.

د ایران قضا اعلان کړی چې د رپ د سندرغاړي امیر تَتَلوُ د اعدام حکم قطعي او د تطبیق وړ دی خو د هغه د توبې غوښتنه او د دې قضیې بیا کتنه هم تر غور لاندې دي.

د قضا ویاند غلام حسین جهانګیر پرون وویل، امیرحسین مقصودلو چې په امیر تتلو هم مشهور دی، مخکې د فساد او فحشا د هڅونې په تور په لس کاله بند محکوم شوی او اوس مهال خپله د بند موده تېروي.

تتلو همداراز دیني مقدساتو ته د سپکاوي په تور په پنځه کاله بند محکوم شوی و، خو وروسته پرې د اعدام حکم وشو.

د ایران د قضا ویاند زیاته کړه چې سترې محکمې د اعدام حکم تایید کړی دی او د تطبیق لپاره محکمې ته اعلان شوی خو په عین حال کې به ډېرژر د تتلو د نویو غوښتنو په اړه د ارزونو نتیجه اعلان شي.

د ایران مخکښو څېرو د تتلو د عفوې غوښتنه کړې ده.

اسراییل وايي چې د یمن له لوري یو ویشتل شوی توغندی یې شنډ کړی دی. د اسراییل پوځ نن په یوه بیان کې وویل چې دا توغندی د حوثي وسله والې ډلې له خوا د اسراییل پر لور توغول شوی و.

د بیان له مخې د دې توغندي له توغولو سره سم د اسراییل په څو ښارونو کې د خطر زنګونه ووهل شول.

حوثي وسله والو که څه هم له متحدوایالتونو سره موافقه کړې چې پر یوبل به حملې نه کوي خو پر اسراییلو د توغندیو توغولو ته دوام ورکوي او وایي چې دا کار د غزې له فلسطیني وګړو سره د خواخوږۍ په پار کوي.

اسراییلو هم پر یمن ځوابي حملې کړې دي او په دې ترڅ کې یې د مې په شپږمه د پلازمېنې صنعا اصلي هوايي ډګر زیانمن کړ او ګڼ کسان یې ووژل.

د هند د اوديشا ایالت د یوه کلي اوسېدونکو مېرمنو د “خیالي نقشو“ په نوم داسې نقشې جوړې کړې دي چې د طبیعي سرچینو کموالی ښيي.

د دې سیمې اوسېدونکي د حاصلاتو د ټولولو په کلني جشن کې د شپې د ډوډۍ لپاره کبان او مارماهي چمتو کوي خو په دې سیمه کې اوس اوس کبان، ځنګلي مېوې او نورې طبیعي سرچینې د کمېدو په حال کې دي.

د لسو کلیو اوسېدونکو مېرمنو د هغو نقشو په مرسته چې د یوې غیرحکومتي ټولنې په مرسته یې برابرې کړې دي، له ایالتي حکومت څخه د خپلو سرچینو او ځمکو د احیا لپاره مرسته ترلاسه کوي. د دوی د اټکل له مخې د دې سرچینو د بیا ژوندي کولو لپاره شاوخوا دوه میلیون ډالره بسپنې ته اړتیا شته.

د اقلیم بدلون، نامنظمو بارانونو او د تودوخې لوړېدو د دې ایالت د خلکو پر ژوند ډېر ناوړه اغیز کړی دی.

دا مېرمنې که څه هم د لومړي ځل لپاره په رسمي ډول خپل غږ اوچتوي خو وايي چې دې اقدام د دوی د ډاډ او باور کچه لوړه کړې ده.

د دې کلي یوه اوسېدونکې وايي چې "ځنګل یې ژوند دی، دوی هلته زېږېدلې دي او هلته مري خو ځمکه د دوی هرڅه ده."

د کییف او مسکو ترمنځ د مستقیمو خبرو له پیل څو ساعته وروسته اوکرایني چارواکو وویل چې د روسیې یوه ډرون د اوکراین په شمال ختیځه سیمه سومي کې نهه کسان وژلي دي.

د سومي والي او د اوکراین ملي پولیس وايي چې دا حمله د روسیې سرحد ته نژدې په بیلوپیلیا سیمه کې وشوه چې په ترڅ کې اوه نور کسان هم ټپیان شول. پولیس زیاتوي چې د دریو ټپیانو حالت نازک دی.

د اوکراین ولسمشر ولودیمیر زیلینسکي پر ټلګرام شبکې په یوه بیان کې دا حمله د ملکي وګړو د وژنې یوه عمدي هڅه بللې ده.

د روسیې او اوکراین استازي د پرونیو خبرو پرمهال پر اوربند سره سلا نه شول. ښاغلي زیلینسکي وویل چې روسیه یوازې د خلکو د وژلو توان لري.

روسیې تراوسه په دې اړه څه نه دي ویلي.

د حماس ډلې چارواکي وايي، ۵۸ تنه فلسطینیان د غزې په تړانګه کې د اسراییلو د تېرې شپې په هوايي حملو کې وژل شوي دي.

دا حملې داسې مهال شوې دي چې ښکاري اسراییل په غزه کې د پراخو ځمکنیو عملیاتو په درشل کې دی.

د رویټرز خبري آژانس د راپور له مخې له تېرې پنجشنبې ورځې راهیسې د اسراییلو په بمباریو کې له ۳۰۰ ډېر کسان وژل شوي دي. د تېرې مارچ میاشتې د اوربند له ماتېدو وروسته دا پر غزې د اسراییلو تر ټولو مرګونې هوايي حملې دي او دا په داسې حال کې ده چې منځني ختیځ ته د ولسمشر ډونالډټرمپ سفر د اوربند د بیاټینګېدو لپاره له کوم مثبت اغېز پرته پرون پای ته ورسېد.

د اسراییلو پوځ نن اعلان وکړ چې د غزې د تړانګې پر ځینو برخو د عملیاتي ولکې د ټینګولو په هدف د پراخولو عملیاتو او د سرتېرو د چمتوکولو په حال کې دی.

د ملګروملتو کارپوهانو خبرداری ورکړی چې د اسراییل له خوا پر غزې د بشري مرستو پر بندولو د ۷۶ ورځو له اوښتو وروسته جدي قحطي سیمه ګواښي.

ولسمشر ټرمپ پرون په غزه کې د لوږې د بحران د حل او غزې ته د مرستو د بيا پیل پر اړتیا ټینګار وکړ.

د برتانیا پولیسو خبر ورکړی چې د تروریزم پرضد د پراخو عملیاتو په ترڅ کې یې درې ایراني وګړي له یو بهرني دولت سره د استخباراتي همکارۍ په تور نیولي دي.

د برتانیا د تروریزم ضد پولیسو نن په یوه بیان کې وویل چې مصطفی سپه وند، فرهاد جوادي منش او شاپور قلعه خاني نوري په دې تور نیول شوي دي چې د ۲۰۲۴ کال د اګست له ۱۴مې څخه یې د روان کال د فبروري تر ۱۶مې پورې احتمالا له یوې بهرنۍ استخباراتي ادارې سره د همکارۍ په فعالیتونو کې لاس درلود. پولیسو ویلي دي چې دا اشاره د ایران دولت ته ده.

د روانې مې میاشتې په لومړیو کې د اوو ایراني وګړو په ګډون اته نور کسان هم د جلا عملیاتو په ترڅ کې نیول شوي وو. د کورنیوچارو د وزیرې ایویټ کوپر دا د جاسوسۍ پرضد د تېرو څو کلونو بېساری عملیات بللي دي. د ځینو برتانوي رسنیو د راپورونو له مخې دا عملیات په لندن کې د اسراییل پر سفارت د برید له پلان سره تړاو لري خو چارواکو رسما په دې اړه څه نه دي ویلي.

د ایران د بهرنیوچارو وزیر عباس عراقچي په دې پلان کې د تهران د لاس لرلو اړوند راپورونه رد کړي او له نیول شویو کسانو سره یې له قونسلي لارو د تماس غوښتنه کړې ده.

د امریکا د لاس انجلس د المپیک کمېټه وايي، که دا ښار د ۲۰۲۸ کال المپیک لوبو ته غوره شو، د سیالیو نندارچیانو ته به د هوايي ټکسي اسانتیا برابره کړي.

دې کمېټې ویلي چې د «ارچر» د هوايي چلند له کمپنۍ سره یې په همکارۍ خبرې کړي څو د المپیک مینه‌وال د ښار له ترافیکي بیروباره خلاص کړي.

ټاکل شوې ده چې ارچر شرکت د المپیک او پارالمپیک لوبو لپاره د هوايي ټکسي خدمات برابر کړي.

دغه شرکت د پنجشنبې په ورځ (د مې ۱۵ مه) په خپلو هوايي ټکسیانو د لاس انجلس سپورتي سالونونو ته یو شمېر سپرلۍ ورسولې.

هوايي ټکسي، د عادي ټکسي موټرونو په شان څلور سپرلۍ وړلی او د هیلي کوپتر په شان هر خای کښېنستلی او ورڅخه الوتلی شی.

د اسراییل پوځ د جمعې په ورځ (د غويي په ۲۶مه) اعلان وکړ چې د یمن پر حدیده او الصلیف بندرونو یې، چې د حوثیانو تر کنټرول لاندې دي، بریدونه کړي دي.

د دغه پوځ په وینا په دې بریدونو کې یې د ایران پلوه حوثي یاغیانو تاسیسات یې له منځه وړي دي.

اسراییلي پوځ په یوه خبرپاڼه کې ویلي: «له دغو بندرونو څخه د وسلو د انتقال لپاره کار اخیستل کېږي، او دا له ملکي تاسیساتو څخه د حوثیانو د سیستماتیک او ناوړه استفادې یو بل مثال دی، چې د ترهګریزو فعالیتونو د پرمخ وړلو لپاره ترې کار اخلي.»

اسراییل دا برید دوه ورځې وروسته تر هغه وکړ چې پوځ یې د یادو بندرونو اوسېدونکو ته څو ځلې خبرداری ورکړی و.

د اسراییل صدراعظم بنیامین نتانیاهو، تر برید وروسته، حوثي یاغیانو ته ګواښ وکړ چې «د نورو بریدونو انتظار ولري.»

ښاغلي نتانیاهو دا هم وویل چې دوی چمتو نه دي چې یوازې ننداره وکړي او اجازه ورکړي چې حوثیان پرې بریدونه وکړي.

په غزې تړانګه کې د بیړنیو مرستو مسوولان وايي چې له تېرې شپې څخه د جمعې تر سهار پورې، د اسراییل په درنو بمباریو کې لږ تر لږه ۶۴ کسان وژل شوي دي.

اسوشیتید پریس خبري آژانس هم د غزې تړانګې له شمال، دیر البلح څخه خبر ورکړی چې خبریال یې تر جمعې سهاره لږ تر لږه د ۲۰ کسانو وژل تأیید کړي، د وژل شویو کسانو مړي یې شمېرلي دي.

د اسراییل بریدونه په شمالي غزه کې داسې مهال پراخېږي چې مخکې دا هیله موجوده وه چې منځني ختیځ ته د ډونالډ ټرمپ له سفر سره به د دې کړکېچ لپاره کومه حل‌لاره وموندل شي.

ښاغلي ټرمپ د جمعې په ورځ، چې منځني ختیځ ته د ده د سفر وروستۍ ورځ وه، وویل: «ډېر خلک په غزه کې د لوږي له سخت حالت سره مخامخ دي.»

د امریکا د بهرنیو چارو وزیر مارکو روبیو، وایي چې د سولې له هغو خبرو اترو، چې ټاکل شوې د اوکراین او روسیې ترمنځ په ترکیه کې وشي، ډېرې هیلې نه لري.

ده پرون (پنحشنبې) وویل چې د دې خبرو د پرمختګ لپاره باید د امریکا ولسمشر ډونالډ ټرمپ او د روسیې ولسمشر ولادیمیر پوتین له یو بل سره وویني.

هغه د ناټو د بهرنیو چارو وزیرانو تر غونډې وروسته، چې د ترکیې په جنوب کې ترسره شوه، وویل: «زما په باور تر هغه وخته به پرمختګ ونه شي، چې ټرمپ او پوتین دا موضوع په مستقیم ډول و نه څېړي.»

د اوکراین ولسمشر، ولودیمیر زیلینسکي، تأیید کړې چې هېواد به یې د خبرو لپاره استانبول ته یوه پلاوي واستوي، خو د مسکو له لوري د «ټیټې کچې» پلاوي پر استولو یې انتقاد کړی دی.

د روسیې له لوري تر ټولو لوړپوړی استول شوی غړی، ولادیمیر مدینسکي دی، چې د ولسمشر سلاکار بلل کېږي، او ټینګار کوي چې د کرملین له خوا استول شوی پلاوی «ټول لازم صلاحیتونه» لري.