د پاکستان جمعیت علمای اسلام ف ګوند مشر مولانا فضلالرحمن په پلازمېنه اسلاماباد کې د صدراعظم عمران خان د حکومت پر ضد اعتراضي غونډه (د ازادۍ مارش) پای ته ورسوله.
فضلالرحمن د چهارشنبې په ورځ (نومبر ۱۳مه) د غونډې ګډونوالو ته په وینا کې په پلازمېنه کې د احتجاج د ختمولو اعلان وکړ، خو پر خپلو پلویانو یې غږ وکړ چې احتجاجونه دې د هېواد نورو برخو ته وغځوي، ترڅو پر حکومت فشار راشي او عمران خان استعفا ورکړي.
فضلالرحمن د حکومت ضد احتجاجونه تر هغې وروسته د پاکستان نورو برخو ته وغځول چې نوموړي تېره ورځ ویلي و، تر چهارشنبې وروسته به د اجتجاج دوهم پلان (پلان بي) عملي کړي.
نوموړي خپلو پلویانو ته د وینا پر مهال له حکومته وغوښتل چې د ستنېدونکو کسانو مخه دې نهنیسي او زیاتهیې کړه: "ستاسو د احتجاج لومړي پړاو د حکومت جرړې پرې کړي؛ دوهم پړاو کې به پرې نور زور هم راوړو. اوس دېوال له ځایه ښورېدلی دی."
فضلالرحمن ټینګار وکړ چې پلویان بهیې پر حکومت د فشار راوړلو لپاره له ښارونو بهر د لویو لارو په اوږدو کې کېني، خو ټینګار یې وکړ چې د خلکو ورځنی ژوند به له خنډ سره مخ نهکړو.
د مولانا فضلالرحمن په مشرۍ دغه احتجاج د تېرې اکټوبر میاشتې په ۲۷مه نېټه د لاریون په بڼه له کراچۍ پیل شو چې د روانې میاشتې په لومړۍ نېټه اسلاماباد ته تر رسېدو وروستهیې دغلته دېره واچوله او نږدې ۱۳ ورځې پاتې شول.
د فضلالرحمن په دغه حکومت ضد مارش کې د پاکستان د اپوزېسیون ټول ګوندونه د هغه ملګري وو چې د صدراعظم عمران خان استعفا یې غوښته او همدا شانیې د پوځ له لاسوهنې پرته د نویو ټاکنو غوښتنه هم کوله.
د یادونې وړ ده چې د عمران خان حکومت د استعفا او نویو ټاکنو غوښتنه ناسمه بلله، خو ټینګار یې کاوه چې پر نورو مسایلو له اپوزېسیون سره خبرو ته چمتو دی.
