- ډیپلوماټ
ډیپلوماټ خپرونې د هندوستان او افغانستان پر اړيکو تمرکز کړی دی.
خپرونه له افغانستانه د شوروي اتحاد د ځواکونو تر وتلو وروسته پهدې هېواد کې د هندوستان پر رول مقاله خپره کړې ده.
مقالې نوي ډیلي د پخواني شوروي اتحاد، د هغه مهال د افغانستان د رژيم او لويديځ د یوه متحد په توګه یاده کړې ده.
د مقالې هغه برخه چې د اوسني افغانستان یادونه کوي، د سولې لپاره د اوسنيو هڅو په اړه ده.
د ډیپلوماټ لیکوال پوښتنه کوي چې ایا له طالبانو سره خبرې به د هند لپاره د یوه پرمختګ په معنا وي؟
په ځواب کې راغلي چې هند د افغانستان په اړه په خپلو پالیسیو کې په دوامداره توګه د ځينو مشخصو موضوعاتو ملاتړی دی او تل یې هڅه کړې چې پهدې هېواد کې د بايللو له خطر سره مخامخ نهشي.
د ډیپلوماټ په وینا، له دې سره چې هند تر اوسه له طالبانو سره رسمي خبرو ته نهدی چمتو شوی، خو د دا ډول خبرو اړتیا لري ځکه طالبان اوس په افغانستان کې د یوه لوري په توګه رامنځته شوي دي.
حتی د خپرونې په باور، نوي ډیلي کولای شي د طالبانو له یو شمېر پلویانو چې د افغانستان اساسي قانون مني، اړيکې جوړې کړي.
لیکوال استدلال کوي چې ممکنه ده هند په افغانستان کې د طالبانو پر وړاندې د یوې متحدې اجماع د رامنځته کولو هڅې وکړي.
خو ډیپلوماټ خپرونه د مقالې په پای کې وايي چې له طالبانو سره له مبارزې سره پر یوه مهال هند هم کولای شي په خبرو کې او یا هم له طالبانو سره د مذاکراتو د اسانتیا په رامنځته کولو کې ښه رول ولوبوي.
- واشنګټن ایګزماینر
ټرمپ موږ ته د افغانستان د جګړې په اړه د ريښتيا ویلو پوروړی دی. دا د واشنګټن ایګزماینر انلاین خپرونې د یوې مقالې عنوان دی.
مقاله لیکي چې په حکومتونو کې تل د محرمو معلوماتو اړتيا وي، خو ټول حقیقتونه باید له خلکو سره شریک شي.
د مقالې په وینا جګړه له ډېرو لویو اقداماتو څخه ده او نو ځکه د امريکا حکومت باید خلکو ته پهدې اړه زيات معلومات ورکړي.
واشنګټن ایګزماینر ليکي:
د ټرمپ ادارې تراوسه په افغانستان کې د نه ختمېدونکي جګړې د وضعیت په اړه کافي معلومات نهدي شریک کړي.
مقاله وايي:
امريکايان د دې مستحق دي چې پوه شي سرتيري يې په کومو برخو کې بريالي دي او په کومو برخو کې شاته راغلي دي.
مقاله د افغانستان د بیارغونې لپاره د امريکا د ځانګړي سرپلټونکي يا سيګار وروستي راپور ته په اشاره لیکي چې وايي، پر ګڼو موضوعاتو اجازه نهلري چې په علني توګه یې وڅېړي.
پهدغو موضوعاتو کې د ولسوالیو د ثبات ارزونې ته اشاره شوې ده چې ښيې د افغانستان څومره فیصده خاوره د حکومت تر کنترول لاندې ده.
مقاله وايي چې دا یوازینی مورد نهدی بلکې د افغان امنیتي ځواکونو د تلفاتو په اړه هم بشپړه معلومات نه ورکول کېږي.
همدا راز د اداري فساد پر وړاندې د کورنیو چارو وزارت د هڅو په اړه هم بشپړه معلومات نهدي شریک شوي.
مقاله وايي چې د امریکا ولسمشر ډونالډ ټرمپ باید د دې هر څه په اړه خپلو خلکو ته ځواب ووايي، ځکه جګړه د کانګرس په خوښه پیلېږي او که کانګرس پهدې اړه کافي معلومات ونهلري، دا پهدې معنا ده چې امریکا د افغانستان جګړه په غیر دموکراتیکه توګه پر مخ وړي.