د افغانستان د انتخاباتو خپلواک کمېسیون د رأیې ورکولو په پاڼه کې د جمهوري ریاست د کاندیدانو ځای مشخص کړ.
د ځای معلومولو پچه اچونه د کاندیدانو د استازو په مخ کې ترسره شوه چې له مخېیې د رحمتالله نبیل نوم د لېست په سر کې او ورپسې سید نورالله جلیلي او فرامرز تمنا په لېست کې دوهم او درېیم راغلل.
پهدغه پچه اچونه کې په ترتیب سره:
- شیدا محمد ابدالي.
- احمد ولي مسعود.
- نور رحمان لېوال.
- محمد شهاب حکیمي.
- محمد اشرف غني.
- عبدالله عبدالله.
- محمد حکیم تورسن.
- ګلبدین حکمتیار.
- عبدالطیف پدرام.
- نورالحق علومي.
- محمد ابراهیم الکوزی.
- غلام فاروق مجروح.
- عنایتالله حفیظ.
- محمد حنیف اتمر
- او زلمی رسول اتلسم ځای خپل کړ.
ټاکل شوې دغه ۱۸ کاندیدان د میزان په شپږمه د جمهوري ریاست د څوکۍ لپاره په خپلو کې سیالۍ وکړي.
د افغانستان د انتخاباتو خپلواک کمېسیون رئیسې حوا علم نورستانۍ وايي چې کمېسیون په ټاکلي وخت د جمهوري ریاست د شفافو انتخاباتو لپاره لازم چمتوالی نیولی.
نوموړې وویل:
"د انتخاباتو خپلواک کمېسیون رهبرۍ هڅه کوي چې په بېلابېلو برخو کې د انتخاباتو په بهیر کې له هر اړخېز شفافیت او عدالت ملاتړ وشي، په همدې اساس د کمېسیون رهبري د جمهوري ریاست د کاندیدانو د موقعیت د ټاکلو لپاره د پچې اچونې کړونلاره تدوین کړه او نن ورځ عملي شوه."
د افغانستان د انتخاباتو خپلواک کمېسیون د جمهوري ریاست د انتخاباتو د کارونو د چټکېډو خبر داسې مهال کوي چې تراوسه هم دغه کمېسیون نهدی توانېدلی چې د ولسي جرګې د انتخاباتو وروستي نتایج اعلان کړي.
د بغلان، کابل، میدان وردګ، پکتیا او د کوچیانو حوزې په ګډون د یو شمېر ولایتونو د وروستیو نتایجو د نه اعلان له امله د حوت له ۱۵مې راهیسې د افغانستان مقننه قوې په کار پیل نهدی کړی.
ټاکل شوې چې افغان ولسمشر د جمعې په ورځ د یو شمېر ولایتونو د استازو په نه موجودیت کې ملي شورا افتتاح کړي.
راپور: رحمت الله افغان