د کابل د نن ورځې چاپ ورځپاڼو په بېلابېلو مسایلو مقالې او تبصرې خپرې کړې دي.
- ویسا
ویسا خپلواکې ورځپاڼې په یو مطلب کې خبر ورکړی چې د انتخاباتو په کمېسیون کې د ولایتي رئیسانو د ټاکلو په سر ناندرۍ روانې دي.
په مطلب کې وړاندې راغلي چې د روانې لمریزې سنبلې میاشتې په اتمه د دغه کمېسیون د دارالانشا رئیس احمد شاه زمانزي د یو مکتوب له لارې د ۳۰ ولایتونو انتخاباتي رئیسان نورو ولایتونو ته تبدیل کړي دي.
خو د مطلب د لیکوال د معلوماتو له مخې چې د دې کمېسیون رئیس عبدالبدیع صیاد د برښنا لیک له لارې د کمېسیون ولایتي رئیسانو ته سپارښتنه کړې چې دغه تبدیلي د کمېسیون له مشرتابه سره له مشورې پرته شوې او د اجرا وړ نهده.
ورځپاڼې د یو شمېر انتخاباتي څارونکو له قوله لیکلي چې د ولایتي رئیسانو تغییر او تبدیل د کمېسیون د دارالانشا کار دی او عمومي رئیس پهکې هېڅ ډول رول نهلري.
دغه کارپوهانو د مطلب لیکوال ته دا هم ویلي چې د انتخاباتو د رئیس دغه چاره له عقدې ډکه ده.
په ډېری ښارونو کې د کاروبار پخوانۍ مزه نهشته او سوداګر پهکې پانګونه نهکوي.
- مسیر
مسیر خپلواکې ورځپاڼې بیا په خپله سرمقاله کې د ولایتونو د سقوط په اړه د خلکو اندېښنې راخیستي او لیکلي دي چې له خلکو سره د یو شمېر ولایتونو د سقوط وېره له پخوا وه، خو د غزني له سقوط وروسته اوس د ډېرو ولایتونو په مرکزونو کې دا وېره زیاته شوې ده.
په سرمقاله کې وړاندې راغلي چې د کندز، فراه او غزني د مرکزونو په سقوط کولو سره د وسلهوالو مخالفینو یو پلان دا وو چې په خلکو کې وېره پیدا او په حکومتيې بېباوره کړي چې تر ډېره په خپل دې پلان کې بریالي شوي هم دي.
د سرمقالې د لیکوال د معلوماتو له مخې چې په ډېر شمېر ولایتونو کې که څه هم جدي ستونزه نهشته، خو بیا هم خلک په وېره کې دي چې ګوندې وسلهوال مخالفین بهيې ښار ونیسي، نو له همدې امله په ډېری ښارونو کې د کاروبار پخوانۍ مزه نهشته او سوداګر پهکې پانګونه نهکوي.
د سرمقالې لیکوال په اخره کې حکومت ته وړاندیز کوي او لیکي؛ هغه ښارونه چې د سقوط تر ګواښ لاندې دي باید جدي پاملرنه ورته وشي او هغه سیمې چې ګواښ پهکې جدي نهدی باید حکومت پهکې تبلیغات وکړي او داسې ګامونه واخلي څو د خلکو له ذهنونو دغه وېره لیرې شي.
- سرخط
سرخط خپلواکې ورځپاڼې بیا په افغانستان کې د مخ پر زیاتېدونکې بېروزګارۍ اندېښنه ښودلې او لیکلي یې دي چې له ایرانه هر میاشت نږدې ۹۰ زره افغان کډوال راستنېږي او په دې سره په هېواد کې د بېروزګارۍ بحران ورځ تر بلې پراخېږي.
ورځپاڼې د هرات د کډوالو او بېرته راستنېدونکو چارو د رئیس له قوله لیکلي دي چې له ایرانه د افغان کډوالو د راتګ ګراف په تېرو شپږو میاشتو کې ۴۵ سلنه لوړ شوی دی.
په مطلب کې وړاندې راغلي دي چې که څه هم د ملي یووالي حکومت د خپلو کمپاینونو پر مهال د بېکارۍ د ختمولو په برخه کې غوړې غوړې ژمنې ورکړې، خو نهیوازې بېکاري يې ختمه نهکړه، بلکې ورځ تر بلې د بېروزګارۍ کچه لوړېږي.
ورځپاڼې د یو شمېر اقتصادي کارپوهانو له قوله لیکلي دي چې باید حکومت په کور دننه د پانګونې په هدف د پانګهوالو امنیت ټینګ کړي، څو د پانګونې په کولو سره د بېکارۍ کچه راټيټه شي.
- هېواد
هېواد دولتي ورځپاڼې د حقاني شبکې د مشر جلالالدین حقاني د مرګ اوازه د څه لپاره؟ تر عنوان لاندې په خپله سرمقاله کې لیکلي دي چې د حقاني د مړینې اوازه درې کاله وړاندې هم خپره شوې وه.
د سرمقالې د لیکوال د معلوماتو له مخې چې حقاني شبکې د پاکستان د استخباراتي ادارې پر مټ په افغانستان کې لوی بریدونه کړي دي.
په سرمقاله کې وړاندې راغلي د حقاني د مړینې خبر پهداسې حال کې وسلهوالو طالبانو خپور کړ چې پر پاکستان د امریکا وروستۍ مرستې هم بندې شوي.
سرمقاله لیکونکی پهدې باور دی چې پهدې کار سره پاکستان غواړي د امریکا په سترګو کې خاورې وشیندي چې دا دی د حقاني شبکې مشر هم مړ شوی او د دغې شبکې فعالیتونه د کمزروي کېدو په حال کې دي.