کابل چاپ ورځپاڼو په خپلو نننیو ګڼو کې د انتخاباتو په تړاو د سیاسي ګوندونو د خبرداري په اړه یو شمېر لیکنې چاپ کړې دي.
- ملي ارمان
ملي ارمان خپلواکې ورځپاڼې پهدې اړه په یوه مطلب کې لیکلي، د افغانستان لوی ملي ائتلاف د یوې خبرپاڼې په خپرولو سره د دغه ائتلاف د پلویانو لهخوا د مدني نافرمانیو خبره کړې ده.
په مطلب کې د خبرپاڼې په حواله راغلي چې دغه ائتلاف د انتخاباتو په اړه د خپلو غوښتنو د منل کېدو په تړاو حکومت ته دوه اوونۍ وخت ورکړی وو چې د روانې اوونۍ د شنبې په ورځ پوره شو.
د مطلب لیکوال لیکي:
په خبرپاڼه کې دا هم راغلي چې د انتخاباتو په ورځ له ټکنالوژۍ نه استفاده کول، د ګوندونو برخې ته په پام سره په انتخاباتي سیستم کې د رأیو د انتقال په تړاو بدلون او د انتخاباتو له ټولو پړواونو څخه د ګوندونو څارنه د سیاسي ګوندونو مهمې غوښتنې دي.
- ویسا
ویسا خپلواکې ورځپاڼې هم پهدې اړه لیکلي او ویلي یې دي چې مؤقته اداره، د بن درېیم کنفرانس او د لویې جرګې جوړول د انتخاباتو بدیلې لارې دي.
د ویسا په دغه مطلب کې د افغانستان د لوی ملي ائتلاف د مسؤلینو په وینا راغلي چې دوه اوونۍ ضربالاجل ټاکل شوی وو چې زموږ غوښتنې ومنل شي، خو د دوی په وینا حکومت ورته مثبت ځواب نهدی ورکړی.
مؤقته اداره، د بن درېیم کنفرانس او د لویې جرګې جوړول د انتخاباتو بدیلې لارې دي.
په مطلب کې دا هم راغلي چې مؤقت حکومت د امریکا او اروپايي ټولنې طرحه ده چې طالبانو هم د دا شان حکومت جوړولو لپاره ۱۰ شرطونه ایښي وو چې یو له دغو شرطونو نه د امنیتي ادارو مسؤلیت سپارل بېطرفه کسانو ته وو.
ویسا هم د یاد ائتلاف له ادرسه د خبرپاڼې په حواله لیکلي چې حکومت غواړي تقلبي انتخابات وکړي او دا چې د دوی غوښتنې نهدي منل شوي خپلې مدني نافرمانۍ به پیل کړي.
- دنیا
دنیا خپلواکې ورځپاڼې بیا د دغه ائتلاف د غړو انوارالحق احدي او شیوای شرق په حواله لیکلي چې مؤقت حکومت د دغه ائتلاف لومړی انتخاب نهدی، خو که حکومت د دوی غوښتنې ونهمني، مؤقت حکومت، د بن د درېیم کنفرانس جوړول او یا هم د لویې جرګې جوړول به بدیل مېکانیزمونه وي.
- انیس
خو انیس دولتي ورځپاڼې بیا لیکلي چې ولسمشر پهدې اړه د سیاسي ګوندونو له استازو سره خبرې کړې دي.
د انیس په مطلب کې راغلي چې له هر اړخیزو بحثونو وروسته دا پرېکړه وشوه چې د حکومت او سیاسي ګوندو له استازو یوه ګډه کمېټه جوړه شي چې د انتخاباتو نېټې او مهالویش ته په پام سره د سیاسي ګوندونو د غوښتنو په تړاو خپلې طرحې وړاندې کړي.