د کابل د نن ورځې چاپ ورځپاڼو د بېلابېلو مسایلو تر څنګ د راتلونکو انتخاباتو او د سولې په مسئله مقالې او تبصرې خپرې کړې دي.
- دنیا
دنیا خپلواکې ورځپاڼې په یو مطلب کې لیکلي چې د احزابو وړاندیزونو ته نهپاملرنه انتخابات د بحران پر لور وړي.
د مطلب لیکوال د افغانستان د ولسي جرګې د یو شمېر غړو له قوله لیکلي دي چې د انتخاباتي اصلاحاتو په برخه کې د سیاسي احزابو وړاندیزونو ته له پاملرنې پرته د انتخاباتو ترسره کول به ستونزمن وي.
د مطلب په دوام لیکل شوي چې د کاغذي تذکرو له مخې د انتخاباتو ترسره کول به د ۲۰۱۴ میلادي کال د انتخاباتو تکرار وي.
په مطلب کې همدا شان لیکل شوي چې له درغلیو ډک انتخابات نهیوازې د افغانستان ستونزې نهشي حلولای، بلکې پهدې هېواد کې نورې ستونزې زېږولای شي.
- کابل اوونیزه
د کابل اوونیزه هم په خپله سرمقاله کې د انتخاباتو مسئلې ته تم شوې ده.
دغې اوونیزې لیکلي دي چې په وروستیو کې د ملي یووالي حکومت د انتخاباتو له کمېسیونه غوښتي دي چې د جمهوري ریاست د انتخاباتو نېټه اعلان کړي.
د سرمقالې په دوام د جمهوري ریاست د خبرپاڼې په حواله لیکل شوي چې د ملي یووالي حکومت مشرانو د انتخاباتو له کمېسیونه غواړي چې د رأی ورکوونکو د نوملیکنې د پروسې د څرنګوالي په اړه خلکو ته ډاډ ورکړي او همدا شان په انتخاباتو د سیاسي احزابو، مدني بنسټونو او نړیوالو او ملي څارونکو ته د نظارت زمینه برابره کړي.
د سرمقالې د لیکوال په باور د افغانستان اوسني سیاسي وضعیت ته په کتو فکر کېږي چې حکومت نهغواړي د ولسي جرګې انتخابات ترسره شي او اټکل کېږي چې حکومت هڅه کوي د جمهوري ریاست او ولسي جرګې انتخابات یوځای ترسره کړي.
- ماندګار
ماندګار ورځپاڼې بیا په یو مطلب کې د سولې روانې پروسې ته اشاره کړې او لیکلي دي چې امریکا له وسلهوالو طالبانو سره د سولې په خبرو کې افغان حکومت منزوي کړی دی.
په مطلب کې د افغانستان د سولې د عالي شورا د یوه غړي له قوله لیکل شوي چې له وسلهوالو طالبانو سره د سولې بحث د امریکا له لوري پرمخ وړل کېږي او افغان حکومت حتی پهدې مسئله کې د یو څارونکي رول هم نهلري.
په مطلب کې د همدې سرچینې له قوله لیکل شوي چې ټاکل شوې وه، د سولې بحث د افغان حکومت په مشرۍ مخته لاړ شي او امریکا به د افغان حکومت په حضور کې له طالبانو سره خبرې کوي، خو د دغې سرچینې په وینا چې اوس دغسې نهده.
ورځپاڼې د یادې سرچینې په حواله دا هم لیکلي چې د وسلهوالو طالبانو او امریکا ترمنځ دغه لیدنه به افغان حکومت ته ځورونکې وي، خو د دغې سرچینې په وینا چې په حکومت کې هېڅڅوک پهدې اړه اعتراض نهلري.
- انیس
انیس دولتي ورځپاڼې هم د سولې په برخه کې په خپله سرمقاله کې لیکلي چې د افغانستان د سولې او ثبات په برخه کې د امریکا د نظامي چارواکو مرستې او ژمنې له وسلهوالو طالبانو سره د مخامخ خبرو د پیلېدو په برخه کې مهمې دي.
ورځپاڼې د سیاسي کارپوهانو له قوله لیکلي دي چې د سولې بینالافغاني خبرو اترو په برخه کې باید امریکا زمینهسازي وکړي.