کابل چاپ ورځپاڼو په خپلو نننیو ګڼو کې پاکستان ته د افغان پلاوي د وروستي سفر، نتایجو او هغه هېواد سره د اړیکو په اړه یو شمېر مطالب چاپ کړي دي.
- دنیا
دنیا خپلواکې ورځپاڼې په دې اړه په خپله سرمقاله کې لیکلي، د ملي امنیت سلاکار حنیف اتمر په مشرۍ پلاوي پاکستان ته په خپل سفر کې د هغه هېواد له چارواکو سره د سولې بهیر او د عمل پلان د تطبیق په اړه خبرې کړې دي.
د سرمقاله لیکونکي په باور لیدل کېږي چې د افغانستان او پاکستان اړیکې یو ځل بیا د ښه کېدو په حالت کې دي او افغان حکومت یو ځل بیا د پخوا په شان د پاکستان په ژمنو باور کړی او ورڅخهیې د سولې په شمول په ګڼو برخو کې د همکاریو تمه لري.
خو ورځپاڼې پوښتنې مطرح کړي چې:
- ایا رښتیا هم پر پاکستان باور کېدای شي؟
- ایا افغان دولت یو ځل بیا د ترکستان لاره نهده نیولې؟
- د همکاریو او عملي هڅو نتایج به کله معلومېږي؟
سرمقاله لیکونکي په ټینګار سره لیکلي چې له پخوانیو درسونو نه په زدهکړې، باید افغان لوری پاکستان سره د خبرو اترو د پیل لپاره خپل څرګند او مشخص اهداف وړاندې کړي او ورته وویل شي چې تر دغې مودې باید د خبرو اترو پایلې معلومې شي.
- هېواد
هېواد دولتي ورځپاڼې هم پهدې اړه لیکلي دي.
د هېواد سرمقاله لیکونکی لیکي، د پلاوي د خبرو اترو پوره جزئیات نهدي معلوم چې زړې او نهعملي کېدونکې خبرې بهیې کړې وي او که په نویو موضوعاتو به غږېدلي وي.
په سرمقاله کې راغلي، باید افغان پلاوی د قبایلي سیمو په تړاو د اندېښنې یا خبرداري په اړه له پاکستاني لوري سره غږېدلی وي، ځکه د ورځپاڼې په باور دا ستره ملي غوښتنه ده او د محکوم افغانستان د بېرته احیا وخت هم دی.
په سرمقاله کې دا هم راغلي چې افغان پلاوي باید پاکستانی لوری وېرولی وي چې په افغانستان او سیمه کې یې د ترهګر جنایت او غاصب عمل په اړه ملګرو ملتونو ته اسناد وړاندې کوي.
- سرخط
سرخط خپلواکې ورځپاڼې بیا د موضوع په اړه د افغان سیاسي شنونکو باورونه راخیستي دي.
سرخط په خپل یو مطلب کې لیکي:
د سیاسي چارو شنونکي پهدې باور دي چې پاکستان د افغانستان لپاره د افغانستان له ورانۍ پرته بل هېڅ انتخاب نهلري.
ورځپاڼې لیکلي دوی وايي، پاکستان په هېڅ حالت کې افغانستان کرار نهپرېږدي، ځکه په دې پوهېږي چې که افغانستان امن شي، پاکستان نهپاتې کېږي.