د کابل د نن ورځې چاپ ورځپاڼو د فساد په وړاندې د اروپايي اتحادیې د مبارزې په کنفرانس چې تېره ورځ په کابل کې جوړ شوی و، مقالې او تبصرې خپرې کړې دي.
- ویسا
ویسا خپلواکې ورځپاڼې د لومړي مخ په یو مطلب کې لیکلي دي اداري فساد د ترورېزم په پرتله لوی ګواښ دی او د فساد موجودیت د دې لامل کېږي چې په دولت د خلکو اعتبار ته زیان واړوي.
په مطلب کې د افغانستان د بیارغونې لپاره د امریکا د ځانګړي سرمفتش جان سوپکو له قوله لیکل شوي چې د افغانستان په اداراتو کې د فساد موجودیت او دوام د ترورېزم د تقويې لامل ګرځي.
په مطلب کې د افغانستان د جمهوري ریاست له قوله راغلي چې د فقر او فساد په وړاندې مبارزهيې په لومړیتوبونو کې ده او د ملي شورا د غړو په ګډون به هېڅچا ته اجازه ورنهکړل شي چې د قضايي خوندیتوب نه غیر قانوني ګټه پورته کړي.
- ماندګار
د ماندګار ورځپاڼه لیکي چې د افغانستان لپاره د بیارغونې په برخه کې د امریکا ځانګړي سرمفتش جان سوپکو ګواښ کړی چې که په افغانستان کې د فساد په وړاندې مبارزه جدي نهشي، نو افغان حکومت به له داخله زیانمن شي او په جنګ کې بریالیتوب به ناممکن شي.
په مطلب کې وړاندې راغلي چې ښاغلي سوپکو د فساد په وړاندې د مبارزې په برخه کې د افغان حکومت هلو ځلو ته خوشبیني ښودلې، خو ویلي دي چې دا اقدامات قانع کوونکي نهدي او افغان حکومت باید پهدې برخه کې عملي اقدامات وکړي.
- ملي ارمان
ملي ارمان ورځپاڼې د افغان ولسمشر له قوله لیکلي چې حکومت باید خلکو ته ځواب ورکوونکی واوسي.
د مطلب په دوام د ښاغلي غني له قوله لیکل شوي چې په افغانستان کې اداري فساد یوه جدي ستونزه ده او په نږدې راتلونکي کې به د اداري فساد پر ضد یو ملي کنفرانس جوړ شي.
ورځپاڼې د اروپايي اتحاديې د استازي له قوله لیکلي چې د فساد په وړاندې جدي مبارزه کولای شي افغانستان تلپاتې سولې ته ورسوي.
د مطلب لیکوال وړاندې لیکلي دي چې اوس هم افغانستان د نړۍ یو له فاسدو هېوادونو څخه ګڼل کېږي او پهدې هېواد کې د اداري فساد موجودیت لامل شوی چې جنګ او بېعدالتي دوام پیدا کړي.
- انیس
انیس دولتي ورځپاڼې پهدې اړه په یو مطلب کې د ولسمشر له قوله لیکلي دي چې د فساد په وړاندې د مبارزې د ستراتېژۍ په پلي کولو کې باید تردید نهوي.
ورځپاڼې لیکلي چې افغان ولسمشر محمد اشرف غني تېره ورځ د فساد کموالی د سولې په برخه کې پرمختګ تر عنوان لاندې د فساد په وړاندې د اروپايي اتحاديې په څلورم کلني کنفرانس کې وویل چې افغان حکومت کوښښ کوي چې د وزارتونو لومړیتوبونو ته په کتو هغوی برجسته کړي، څو د فساد په وړاندې په مبارزه کې ټاکل شوي اهداف ترلاسه شي.
په مطلب کې د ولسمشر له قوله لیکل شوي چې تر ۲۰۲۴ میلادي کال پورې حکومت هڅه کوي چې کورني عواید لږ تر لږه ۸ میلیارده ډالرو ته لوړ کړي.