کابل چاپ ورځپاڼو په خپلو نننیو ګڼو کې بیا هم د انتخاباتو په اړه لیکلي دي.
- ملي ارمان
ملي ارمان خپلواکې ورځپاڼې پهدې اړه د انتخاباتو د خپلواک کمېسیون د یو مقام په حواله لیکلي، د هېواد اوسنی وضعیت معیاري انتخاباتو ته نهدی جوړ.
د مطلب لیکوال دا څرګندونې د نوموړي کمېسیون د دارلانشا د سرپرستې شهلاحق له خولې لیکلي او ویلي یې دي چې نوموړې دا څرګندونې پرون شنبې ولسي جرګې ته کړي او منلې یې ده چې د رأی ورکونې لپاره د نوم لیکنې بهیر پڅ روان دی چې لامل یې هم پر انتخاباتو د خلکو بې باوري ده.
په مطلب کې دا هم راغلي چې اغلې حق د ولسي جرګې د یو شمېر غړو دا ادعاوې چې ګوندې هغه پاڼې چې په تذکرو لګول کېږي په بازار کې پلور کېږي بې بنسټه وبللې ویې ویل چې د یادو پاڼو غلا یا پټول اسانه کار نهدی.
- ویسا
ویسا خپلواکې ورځپاڼې بیا د موضوع په اړه په خپله سرمقاله کې لیکلي دي.
ورځپاڼه لیکي، که په ریاضي کې «۲ + ۲ مساوي څلور» کېږي د حکومت د انتخاباتو د روانې پروسې پایله له رسوایۍ او د ولس له بدمرغۍ پرته بل څه نهشي کیدای.
په سرمقاله کې راغلي، خبره یوازې د دې نهده چې ولې د نوم لیکنې بهیر دومره پڅ روان دی، بلکې اصلي ستونزه پر یاد بهیر د ولس د باور نه نشتوالی دی چې دا اصلاً په حکومت او ادارو د ولس د ژورې بې باورۍ دلیل دی.
د سرمقاله لیکونکي په خبره، دا چې ځینې کسان پر خلکو غږ کوي چې لاړ شئ نوملیکنه وکړئ، دا مو د خپل برخلیک خبره ده، خلک به یې خبره واوري، خو د هغو چارواکو خبره به په ولس کې څومره اورېدونکي ولري چې نه یې دې ولس ته د سړي په سترګه کتلي دي او نه یې د ولس د رأی او قربانۍ پاس ساتلی دی.
- انیس
انیس خپلواکې ورځپاڼې هم پهدې اړه په خپله سرمقاله کې لیکلي دي.
انیس لیکي چې انتخابات یو ډیمکراتیک بهیر دی، ستونزې به موجودې وي، خو دا پر موږ ده چې د دغه بهیر د بنسټیز کېدو لپاره هڅې وکړو.
په سرمقاله کې له خلکو غوښتل شوي چې د ولسي جرګې او ولسوالیو شوراګانو د انتخاباتو لپاره نوم لیکنه وکړي او په دغو انتخاباتو کې په خپل ګډون سره خپل واقعي استازي انتخاب کړي.
- دنیا
دنیا خپلواکې ورځپاڼې بیا په خپل یو مطلب کې پهدې اړه لیکلي چې وزیرانو شورا د انتخاباتو لپاره د رأی ورکونې د نوملیکنې د پڅ بهیر په تړاو فوقالعاده غونډه کړې او اجرائیه رئیس عبدالله عبدالله یادې غونډې ته ویلي چې که د نوملیکنې بهیر ناکام شي، سیاسي وضعیت به هم وخیم او هېواد به د بحران په لور ولاړ شي.