د فرانسې د بهرنیو چارو وزیر ژان یوسلي ژریان وايي، ایران یا باید د خپلو میزایلو د پروګرام په اړه د نړیوالو اندېښنې وڅېړې او یا به له نورو بندیزونو سره مخ شي.

نوموړي دا څرګندونې نن یکشنبه تهران ته تر خپل سفر یوه ورځ مخکې وکړې.

خو ایران بیا ټینګار کوي چې د میزایلو پروګرام يې له ځان څخه د دفاع په هدف دی او په دې اړه خبرې نه کوي.

د فرانسې د بهرنیو چارو وزیر تېره میاشت ویلي وو، که ایران غواړي د خبرو اترو لړۍ ته بیا داخل شي، نو ددې هېواد د میزایلو پروګرام او په سیمه ییزو شخړو کې د تهران د رول په اړه باید خبرې وشي.

بل لور ته د ایران د بهرنیو چارو وزارت نن وویل چې د فرانسې د بهرنیو چارو وزیر به له تهران څخه د خپلې دوه ورځنۍ کتنې په لړ کې، له ولسمشر حسن روحاني او د بهرنیو چارو له وزیر جواد ظریف سره د دوه اړخیزو اړیکو، سیمه يیزو او نړیوالو مسئلو او د ۲۰۱۵ کال د اټمي موافقې د تطبیق په اړه خبرې وکړي.

د کرېکټ د آسیایي جام لوبو په لړۍ کې هند پاکستان ته د شپږو ویکټو په توپیرماتې ورکړه. هند د پچې له ګټولو وروسته توپ اچونه غوره کړې وه. د پاکستان لوبډلې د پنځو لوبغاړو او شلو اورونو په پوره کیدو سره ۱۷۱ منډې وکړې او د هند لپاره یې د ۱۷۲ منډو هدف وټاکه.

د هند لوبډلې د خپلو څلورو لوبغاړو په سوځیدو په نولسم اورکې دغه هدف پوره کړ.

هند تراوسه د دې جام ټولې لوبې ګټلي او له پاکستان، سریلانکا او بنګلدېش سره یوځای د څلورو مخکښو لوبډلو پړاو ته وتلی د. افغانستان ، متحده عربي امارات، عمان او هانګ کانګ د خپلو سیالیو له بایللو وروسته له دې لړۍ څخه ووتل.

د دې سیالیو په ترڅ کې پاکستان او سریلانکا د را روانې سه شنبې، بنګلدېش او هند د چارشنبې، بنګلدېش او پاکستان د پنجشنبې او هند او سریلانکا د جمعې په ورځو سره مخامخ کیږي. د دې لړۍ فاینل لوبه به د سپټمبر په ۲۸ مه نېټه وي.

ټاکل شوې چې جرمني به د را روانې میلادې میاشتې په پیل کې د کډوالۍ په اړه د خبرو اترو لپاره د څو اروپایي هیوادونو د استازیو د یوې بلې غونډې کوربه وي. د جرمني خبري آژانس د راپورله مخې د جرمني د کورنیو چارو وزیر الکساندر ډوبریندټ ویلي د مونشن په دې غونډه کې به چې د اوکتوبرپه څلورمه پلان شوې، له اروپایي شریکانو سره اروپاته د کډوالۍ په پروسه کې د بدلون لپاره د نورو هڅو او اړینو اقداماتو په اړه خبرې وشي. هغه ویلي چې موږ باید د اروپایي ټولنې د کډوالۍ شرایط او د اخراج قوانین سخت کړو.

ټاکل شوې په دې غونډه کې د اتریش، ډنمارک، فرانسې، چک جمهوریت، ایټالیا او پولنډ د کورنیو چارو وزیران او همدارنګه د اروپایي ټولنې د کورنیو او د کډوالو د چارو کمیشنیرګډون وکړي.

جرمني په جولای میاشت کې هم د ورته بلې غونډې کوربه توب کړی و. په هغه غونډه کې د انساني قاچاق، افغانستان او سوریې ته د کډوالو د بیرته ستنولو او له دریمو هیوادونو سره د ستراتیژیکو همکاریو د جوړو لپاره د ژمنې په ګډون پنځه لومړیتوبونه په نښه شوي و.

د جرمني د محافظه کارو په مشرۍ نوي حکومت ژمنه کړې چې د کډوالۍ شرایط به سختوي. د جرمني د کورنیو چارو وزیرپه دې وروستیو کې ویلي چې دې ته اړتیا ده چې د طالبانو له حکومت سره افغانستان ته په جرمني کې په جرمونو کې د ښکیلو افغانانود بیرته ستنولو په اړه مستقیمې اړیکې ټینګې شي.

د کامنویلټ ټولنې درې غړیو هیوادونو، بریتانیا، استرالیا او کاناډا د یکشنبې په ورځ فلسطین د یوه خپلواکه دولت په توګه په رسمیت وپیژاند. د اسوشیتید پرس خبري آژانس د راپورله مخې د کامنویلټ د دغو درې غړیو او د اسراییل اوږمهاله متحدانو دغه همغږی اقدام په غزه کې د اسراییل له خوا د جګړې د مخ ته وړلو په وړاندې د دوی د زیاتې شوې غوسې څرګندونه کوي. د بریتانیا صدراعظم کایرسټارمر چې د خپل واکمن، ګارګرګوند له خوا د اسراییل په وړاندې د سختې تګلارې د غوره کیدو لپاره ترسخت فشارلاندې و، وویل چې بریتانیا دغه اقدام د دې لپاره وکړچې د اسراییلیو او فلسطینیانو ترمنځ د سولې او د دوو دولتونو د حل لارې هیله بیرته را ژوندی کړي.

د اسراییل صدراعظم بینامین نتنیاهو د دغو هیوادونو د وروستي اقدام په غبرګون کې وویل چې د یوه خپلواکه فلسطیني دولت رامنځ ته کیدل به عملي نشي. د فلسطیني ادارې مشر محمود عباس د بریتانیا د دغه اعلان هرکلی کړی او ویلي یې دي چې دا په سیمه کې د دوو دولتونو د حل لارې پربنسټ عادلانه او تلپاتې سولې د ترلاسه کولو پرلور یو مهم ګام دی.

په پام کې ده چې د نړۍ یوشمیرنور هیوادونه هم په نیویارک کې د ملګروملتونو د عمومي اسامبلې له پیلیدو سره فلسطین د یوه خپلواکه دولت په توګه په رسمیت وپیژني. تراوسه د هغو هیوادونو شمیرچې دا کاریې کړې له یونیم سل اوړي.

ټاکل شوې د بریتانیا صدر اعظم کایر سټارمر نن ناوخته فلسطین د یوه دولت په توګه په رسمیت وپیژني.

د پرتګال د بهرنیو چارو وزارت هم اعلان کړی چې نن ورته اقدام کوي.

ټاکل شوې څو نور هېوادونه هم د ملګرو ملتونو د عمومي اسامبلې له پیل سره همهاله د غزې په جګړه کې پر اسراییل د فشار اچولو په هدف دغه کار وکړي.

د ملګرو ملتونو عمومي اسامبله سبا په نیویارک کې پیلیږي.

فرانس پریس لیکلي، د اسراییل تاریخي متحدان د غزې جګړې د اوږدېدو له کبله اوس له اسراییله مخ اړوي.

د نړۍ د ۱۹۳ هېوادونو له ډلې ۱۴۷ هغو فلسطین د خپلواک دولت په توګه په رسمیت پیژندلی دی.

د اروپایي کمیسیون مشرې اورسولا فون دیر لاین د دغه کمیسیون له خوا پر اسراییل د وړاندیز شویو بندیزونو دفاع کړې ده.

هغې د اروپا د مشهورو ورځپاڼو له یوې شبکې سره چې د جرمني ولت ام زونټاګ ورځپاڼه هم په کې ده کتبي مرکه کې ویلي، پر اسراییل د ۲۰۲۳ کال د اکتوبر د ۷مې برید اسراییل ولړزوه، خو په خبره یې قحطۍ خواته د غزې بیول هم د اندیښنې وړ اقدام دی.

هغې ټینګار کړی چې د حل یوازنۍ لاره د دوو دولتونو د رامنځته کولو تګلاره ده او هغه هم داسې چې د اسراییل ترڅنګ د فلسطین په نوم یو دولت جوړ او سوله ییز ژوند وکړي.

فون دیر لاین ویلي، څه چې دوی وروستیو میاشتو کې لیدلي " د اسراییل له خوا د دوو دولتونو د رامنځته کولو په ضد ښکاره هڅه ده".

اروپایي کمیسیون د تیرې چهارشنبې په ورځ د غزې په جګړه کې د نرمښت په هدف د اسراییل د صدر اعظم بنیامین نتنیاهو پر دولت د بندیزونو یوه بسته وړاندیز کړه.

اروپایي ټولنې ته د اسراییل د صادراتو بندول، د وړاندیز شویو بندیزونو په ډله کې دي.

تراوسه معلومه نه ده چې د اروپایي ټولنې د ۲۷ غړو هیوادونو له ډلې به څه شمېر د دغو بندیزونو ملاتړ وکړي.

سپینه ماڼۍ وایي، د ټیک ټاک د راتلونکې په اړه هوکړه په دې پورې اړه لري چې امریکایان په متحده ایالتونو کې د دغه اپلیکیشن د څارنې د مدیره پلاوي د ۷ څوکیو له ډلې ۶ هغه ترلاسه کړي.

د سپینې ماڼۍ ویاندې کارولین لویت د شنبې په ورځ فاکس نیوز ته وویل " هغه مدیره پلاوی چې امریکا کې به پر دغه اپلیکیشن څارنه ولري، ۷ څوکۍ لري. ۶ هغه یې باید له امریکایانو سره وي."

هغې زیاته کړه په دې اړه هوکړه به " راتلونکو ورځو" کې ترلاسه شي.

امریکا د ملي امنیت له کبله ډېره هڅه وکړه چې د لنډو ویډیوګانو د دغه اپلیکیشن کنټرول د هغه له اصلي چینایي شرکت " بایت دنس" څخه واخلي.

د جوبایډن په دوره کې کانګرس داسې یو قانون تصویب کړ چې له مخې یې بایت دنس موظف شو د ټیک ټاک د امریکا څانګه وپلوري یا له بندیز سره مخامخ شي.

د امریکا په نیوهمشایر ایالت په یوه کلپ کې تېره شپه یو تن په ډزو وژل شوی او څو تنه نور ټپیان شوي دي.

د اسوشیتیدپریس خبري آژانس د راپور له مخې د نیوهمشایر لوی څارنوال جان فورمیلا او د نَشوا ښار د پولیسو مشر کوین رورک ویلي دي چې په “سکای میډو کنټري کلپ“ کې د ډزو په پېښه کې یو نارینه وژل شوی دی.

چارواکو ویلي دي چې مشکوک بریدګر د پېښې په ځای کې نیول شوی دی.

د نیوهمشایر مرستیال څارنوال پیټر هینکلي د پېښې د عواملو په اړه د څېړنو د پیل خبر ورکړی دی.

د کرکټ د آسیايي جام د لوبو په لړۍ کې نن هند او پاکستان لوبه کوي. دا لوبه د کابل په وخت د ماښام په اوو بجو د ډوبی د کرکټ په لوبغالي کې پیلېږي.

هند، پاکستان، سریلانکا او بنګلدېش وروسته له هغه د آسیايي جام د څلورو مخکښو لوبډلو پړاو ته ووتل چې افغانستان ، متحده عربي امارات، عمان او هانګ کانګ د خپلو سیالیو له بایللو وروسته له دې لړۍ څخه ووتل.

د څلورو مخکښو لوبډلو د سیالیو په ترڅ کې به پاکستان او سریلانکا د راروانې سه شنبې، بنګلدېش او هند د چارشنبې، بنګلدېش او پاکستان د پنجشنبې او هند او سریلانکا د جمعې په ورځو سره مخامخ شي.

د دې لړۍ فاینل لوبه به د سپټمبر په ۲۸ مه نېټه وي.

د ایران د ملي امنیت عالي شورا وايي چې د تهران پرضد د بندیزونو د لګولو لپاره د ملګروملتونو په امنیت شورا کې د فرانسې، برتانیا او جرمني له اقدام وروسته د اټومي انرژۍ له نړیوالې ادارې سره همکاري ځنډوي.

د آزادۍ راډیو د ایران د څانګې، راډیو فردا د راپور له مخې د دې شورا په پرونۍ اعلامیه کې په دې اړه نور جزییات نه دي ورکړل شوي خو د تهران د اټومي پروګرام د مسئلې په اړه د ماشه په نوم د دې دریو اروپايي هېوادونو وړاندیز نا سنجول شوی اقدام بلل شوی دی.

د دې اعلامیې له خپرېدو یوه ورځ مخکې د م. م امنیت شورا نهو غړو پر ایران د بندیزونو د لیرې کولو لپاره د جنوبي کوریا- چې د دې شورا دوره اي مشري کوي طرحې ته منفي رایې ورکړې.

د اوکراین ولسمشر ولودیمیر زیلینسکي پر متحدوایالتونو غږ کړی چې د روسیې پرضد جدي اقدامات وکړي.

ښاغلي زیلینسکي پرون (د سپمتبر ۲۰مه) همداراز وویل چې تمه لري راتلونکې اونۍ د ملګروملتونو د عمومي اسمبلې د اتیایمې غونډې په څنډه کې د امریکا له ولسمشر ډونالډټرمپ سره وګوري.

واشنګټن تراوسه د دې لیدنې په اړه څه نه دي ویلي.

دا څرګندونې داسې مهال کېږي چې د اروپايي ټولنې غړي هېوادونه پر کریملین د لازیاتو بندیزونو د لګولو د تصویب بهیر ته ورنژدې شوي دي.

په عین حال کې د ناټو د ختیځ اړخ په آسمان کې کړکېچ زیات شوی دی. پرون په داسې حال کې چې روسیې پر اوکراین د بې پیلوټه الوتکو او توغندیو حملې کولې، د پولنډ او د ناټو د نورو غړو جنګي جټ الوتکو الوتنې پیل کړې.

د روسیې په حملو کې لږترلږه درې ملکي وګړي ووژل شول.

د ناټو غړو په دې وروستیو کې د استونیا خاورې ته د روسي الوتکو د ننوتو له کبله سخته غوسه وښوده. همداراز له دې مخکې د روسیې بې پیلوټه الوتکې د پولنډ او رومانیا هوايي قلمروونو ته هم ننوتلې وې.