د بریتانيې د بهرنیو چارو وزیر بورېس جانسون پرون یکشنبه «۱۳۹۶ کال د لیندۍ ۱۹» په تهران کې د ایران له ولسمشر حسن روحاني سره کتلي دي.

د بریتانیې د بهرنیو چارو وزارت یوه ویاند ویلي چې جانسون او روحاني پر ګڼو مسئلو "سپینې" خبرې کړي.

د بي بي سي په حواله، د دواړو په کتنه کې د نازنین زاغري رتکلف پر برخلیک هم بحث شوی دی.

ایراني‌الاصله بریتانوۍ نازنین زاغري رتکلف دوه کاله مخکې له خپلې کوچنۍ لور سره ایران ته تللې وه او هلته د رژیم پر ضد د دسیسې جوړولو په تور ونیول او زنداني شوه.

نازنین په وروستیو کې د رژیم پر ضد په پروپاګند تورنه شوه.

خو هغې د ایران د حکومت تورونه رد کړي او ويلي یې دي چې ایران ته د شخصي مقصد لپاره تللې وه او رسمي دنده‌یې نه‌درلوده.

نازنین زاغري رتکلف باید پرون د هغو تورونو د سپیناوي لپاره چې تازه ورباندې لګېدلي، محکمې ته حاضره شوې وی، خو د هغې مېړه رېچرډ رتکلف ویلي چې ایراني چارواکو پرون په وروستیو شېبو کې محاکمه لغوه کړه.

رېچرډ رتکلف په یوه اېمېل کې چې رسنیو ته‌یې استولی، لیکلي چې د نازنین د محاکمې لغوه کېدل ښه خبر دی او د بریتانیې د بهرنیو چارو وزیر په تهران کې د هغې د کورنۍ له غړو سره هم کتلي دي.

ټاکل شوې د بریتانیا صدر اعظم کایر سټارمر نن ناوخته فلسطین د یوه دولت په توګه په رسمیت وپیژني.

د پرتګال د بهرنیو چارو وزارت هم اعلان کړی چې نن ورته اقدام کوي.

ټاکل شوې څو نور هېوادونه هم د ملګرو ملتونو د عمومي اسامبلې له پیل سره همهاله د غزې په جګړه کې پر اسراییل د فشار اچولو په هدف دغه کار وکړي.

د ملګرو ملتونو عمومي اسامبله سبا په نیویارک کې پیلیږي.

فرانس پریس لیکلي، د اسراییل تاریخي متحدان د غزې جګړې د اوږدېدو له کبله اوس له اسراییله مخ اړوي.

د نړۍ د ۱۹۳ هېوادونو له ډلې ۱۴۷ هغو فلسطین د خپلواک دولت په توګه په رسمیت پیژندلی دی.

د اروپایي کمیسیون مشرې اورسولا فون دیر لاین د دغه کمیسیون له خوا پر اسراییل د وړاندیز شویو بندیزونو دفاع کړې ده.

هغې د اروپا د مشهورو ورځپاڼو له یوې شبکې سره چې د جرمني ولت ام زونټاګ ورځپاڼه هم په کې ده کتبي مرکه کې ویلي، پر اسراییل د ۲۰۲۳ کال د اکتوبر د ۷مې برید اسراییل ولړزوه، خو په خبره یې قحطۍ خواته د غزې بیول هم د اندیښنې وړ اقدام دی.

هغې ټینګار کړی چې د حل یوازنۍ لاره د دوو دولتونو د رامنځته کولو تګلاره ده او هغه هم داسې چې د اسراییل ترڅنګ د فلسطین په نوم یو دولت جوړ او سوله ییز ژوند وکړي.

فون دیر لاین ویلي، څه چې دوی وروستیو میاشتو کې لیدلي " د اسراییل له خوا د دوو دولتونو د رامنځته کولو په ضد ښکاره هڅه ده".

اروپایي کمیسیون د تیرې چهارشنبې په ورځ د غزې په جګړه کې د نرمښت په هدف د اسراییل د صدر اعظم بنیامین نتنیاهو پر دولت د بندیزونو یوه بسته وړاندیز کړه.

اروپایي ټولنې ته د اسراییل د صادراتو بندول، د وړاندیز شویو بندیزونو په ډله کې دي.

تراوسه معلومه نه ده چې د اروپایي ټولنې د ۲۷ غړو هیوادونو له ډلې به څه شمېر د دغو بندیزونو ملاتړ وکړي.

سپینه ماڼۍ وایي، د ټیک ټاک د راتلونکې په اړه هوکړه په دې پورې اړه لري چې امریکایان په متحده ایالتونو کې د دغه اپلیکیشن د څارنې د مدیره پلاوي د ۷ څوکیو له ډلې ۶ هغه ترلاسه کړي.

د سپینې ماڼۍ ویاندې کارولین لویت د شنبې په ورځ فاکس نیوز ته وویل " هغه مدیره پلاوی چې امریکا کې به پر دغه اپلیکیشن څارنه ولري، ۷ څوکۍ لري. ۶ هغه یې باید له امریکایانو سره وي."

هغې زیاته کړه په دې اړه هوکړه به " راتلونکو ورځو" کې ترلاسه شي.

امریکا د ملي امنیت له کبله ډېره هڅه وکړه چې د لنډو ویډیوګانو د دغه اپلیکیشن کنټرول د هغه له اصلي چینایي شرکت " بایت دنس" څخه واخلي.

د جوبایډن په دوره کې کانګرس داسې یو قانون تصویب کړ چې له مخې یې بایت دنس موظف شو د ټیک ټاک د امریکا څانګه وپلوري یا له بندیز سره مخامخ شي.

د امریکا په نیوهمشایر ایالت په یوه کلپ کې تېره شپه یو تن په ډزو وژل شوی او څو تنه نور ټپیان شوي دي.

د اسوشیتیدپریس خبري آژانس د راپور له مخې د نیوهمشایر لوی څارنوال جان فورمیلا او د نَشوا ښار د پولیسو مشر کوین رورک ویلي دي چې په “سکای میډو کنټري کلپ“ کې د ډزو په پېښه کې یو نارینه وژل شوی دی.

چارواکو ویلي دي چې مشکوک بریدګر د پېښې په ځای کې نیول شوی دی.

د نیوهمشایر مرستیال څارنوال پیټر هینکلي د پېښې د عواملو په اړه د څېړنو د پیل خبر ورکړی دی.

د کرکټ د آسیايي جام د لوبو په لړۍ کې نن هند او پاکستان لوبه کوي. دا لوبه د کابل په وخت د ماښام په اوو بجو د ډوبی د کرکټ په لوبغالي کې پیلېږي.

هند، پاکستان، سریلانکا او بنګلدېش وروسته له هغه د آسیايي جام د څلورو مخکښو لوبډلو پړاو ته ووتل چې افغانستان ، متحده عربي امارات، عمان او هانګ کانګ د خپلو سیالیو له بایللو وروسته له دې لړۍ څخه ووتل.

د څلورو مخکښو لوبډلو د سیالیو په ترڅ کې به پاکستان او سریلانکا د راروانې سه شنبې، بنګلدېش او هند د چارشنبې، بنګلدېش او پاکستان د پنجشنبې او هند او سریلانکا د جمعې په ورځو سره مخامخ شي.

د دې لړۍ فاینل لوبه به د سپټمبر په ۲۸ مه نېټه وي.

د ایران د ملي امنیت عالي شورا وايي چې د تهران پرضد د بندیزونو د لګولو لپاره د ملګروملتونو په امنیت شورا کې د فرانسې، برتانیا او جرمني له اقدام وروسته د اټومي انرژۍ له نړیوالې ادارې سره همکاري ځنډوي.

د آزادۍ راډیو د ایران د څانګې، راډیو فردا د راپور له مخې د دې شورا په پرونۍ اعلامیه کې په دې اړه نور جزییات نه دي ورکړل شوي خو د تهران د اټومي پروګرام د مسئلې په اړه د ماشه په نوم د دې دریو اروپايي هېوادونو وړاندیز نا سنجول شوی اقدام بلل شوی دی.

د دې اعلامیې له خپرېدو یوه ورځ مخکې د م. م امنیت شورا نهو غړو پر ایران د بندیزونو د لیرې کولو لپاره د جنوبي کوریا- چې د دې شورا دوره اي مشري کوي طرحې ته منفي رایې ورکړې.

د اوکراین ولسمشر ولودیمیر زیلینسکي پر متحدوایالتونو غږ کړی چې د روسیې پرضد جدي اقدامات وکړي.

ښاغلي زیلینسکي پرون (د سپمتبر ۲۰مه) همداراز وویل چې تمه لري راتلونکې اونۍ د ملګروملتونو د عمومي اسمبلې د اتیایمې غونډې په څنډه کې د امریکا له ولسمشر ډونالډټرمپ سره وګوري.

واشنګټن تراوسه د دې لیدنې په اړه څه نه دي ویلي.

دا څرګندونې داسې مهال کېږي چې د اروپايي ټولنې غړي هېوادونه پر کریملین د لازیاتو بندیزونو د لګولو د تصویب بهیر ته ورنژدې شوي دي.

په عین حال کې د ناټو د ختیځ اړخ په آسمان کې کړکېچ زیات شوی دی. پرون په داسې حال کې چې روسیې پر اوکراین د بې پیلوټه الوتکو او توغندیو حملې کولې، د پولنډ او د ناټو د نورو غړو جنګي جټ الوتکو الوتنې پیل کړې.

د روسیې په حملو کې لږترلږه درې ملکي وګړي ووژل شول.

د ناټو غړو په دې وروستیو کې د استونیا خاورې ته د روسي الوتکو د ننوتو له کبله سخته غوسه وښوده. همداراز له دې مخکې د روسیې بې پیلوټه الوتکې د پولنډ او رومانیا هوايي قلمروونو ته هم ننوتلې وې.

د روغتیایي چارواکو په وینا، اسراییلي ځواکونو تیره شپه په غزه ښار کې د عملیاتو پرمهال لږ تر لږه څوارلس تنه وژلي دي.

اسراییل د غزې تړانګې د دې ښار له خلکو غوښتې دي چې سیمه پریږدي.

اسوشیتد پریس اژانس څرګندوي چې دا بریدونه په داسې حال کې روان دي چې لویدیځ له دې جګړې څخه په تنګ شوی او یوشمیر غربي هیوادونو ویلي دي چې روانه اونۍ به د ملګرو ملتو په عمومي اسمبلۍ کې د فلسطین د دولت د رسمیت پیژندلو لپاره هڅې وکړي.

تازه پرتګال ویلي دي چې د جمعې په ورځ به د فلسطین دولت په رسمیت وپیژني. تر دې مخکې بریتانیا، کاناډا، استرالیا، مالتا، بلجیم او لوګزامبورګ ورته ژمنې کړې دي.

د اوکراین ولسمشر وایي چې هغه به روانه اونۍ د ملګرو ملتونو د عمومي اسامبلې په څنډه کې له خپل امریکایي سیال ډونالډ ټرمپ سره وګوري.

د ولادیمیر زیلینسکي په وینا نن رسنیو خبر ورکړ چې دی به د امریکا له ولسمشر سره د دې غونډې په ترڅ کې د اوکراین لپاره د امنیتي تضمینونو په اړه خبرې و کړي او په ورته خت کې به له ښاغلي ټرمپ سره پر روسیې د بندیزونو په تړاو وغږیږي.

روسیې په وروستیو ورځو کې پر اوکراین بریدونه زیات کړې دي.

د اروپا د هوایي ډګرونو د خدماتو د چمتو کولو ادارې( ایرو سپیس) فرانس پریس اژانس ته ویلي چې نن د اروپا پر یو شمیر مهمو هوایي ډګرونو د سایبر برید شوی دی.

د راپور له مخې د بروکسل، برلین او د لندن د هیترو هوایي ډګرونو په شمول د اسنادو د لیدو او د وسایلو د تنظیم چارې له ګډوډۍ او ځنډ سره مخامخ شوې دي.

دا سایبر برید په یوشمیر هوایي ډګرونو کې د الوتنو د ځنډ او خنډ سبب شوې دی.