د امریکا د ولسمشر زوی ډونالد ټرمپ جونیر د هغه بحث په اړه چې په ۲۰۱۶ میلادي کال کې یې له روسانو سره د لیدو په اړه له خپل پلار سره کړی، د امریکا د پارلمان غړو ته د معلوماتو له ورکولو ډډه وکړه.

د امریکا د ۲۰۱۶ میلادي کال په ولسمشریزو انتخاباتو کې د روسیې د مداخلې په اړه د تحقیقاتو په دوام، ډونالد ټرمپ جونیر تېره ورځ د امریکا د استازو جرګې د استخباراتو له کمېټې سره د تړلو دروازو تر شا خبرې وکړې.

ټرمپ جونیر د خپل پلار د انتخاباتي کمپاین پر مهال له روسانو سره د لیدو په اړه معلومات نه‌دي ورکړي.

د امریکا د عدلیې وزارت ځانګړي سلاکار رابرټ مولر هم د دغو لیدنو په اړه چې ویل کېږي په ټرمپ ټاور کې شوي، پلټنې کوي.

امریکایي چارواکي روسیه تورنوي چې د امریکا د ۲۰۱۶ کال په انتخاباتو کې یې مداخله کړې ده، خو روسیه دا تورونه ردوي.

د ایران دولتي رسنۍ نن د استخباراتو د مرستیال جنرال غلام رضا محرابي او د عملیاتي مرستیال جنرال مهدي رباني وژنه تایید کړې.

تر دې مخکې د ایران د وسله والو ځواکونو د مشرتابه لویه برخه وژل شوې ده.

د سپاه پاسداران د عمومي قومندان حسین سلامي، لوی درستیز محمد باقري، د قدس د ځواکونو د مشر اسماعیل قاآني او ګڼو اټومي ساینسپوهانو وژنه تایید شوې وه.

ایران په ټوله کې د شاوخوا ۸۷ کسانو وژنه او د څه باندې ۳۲۰ ټپيانېدل تایید کړي.

اسراییلي چارواکو هم تایید کړې چې د ایران په ځوابي بریدونو کې په اسراییلو کې لږ تر لږه درې کسان وژل شوي او څه باندې ۱۵۰ نور ژوبل دي.

ایران په لرې واټن ویشتونکو توغندویو په تل ابیب او څو نورو سیمو کې بریدونه کړي.

یو افغان چې د امریکا د ولسمشرۍ د ټاکنو په ورځ د برید د پلان په تور نیول شوی، پرون (د جمعې په ورځ) په خپل جرم اعتراف وکړ.

۲۷ کلن نصیر احمد توحیدي د اسلامي دولت یا داعش ډلې د ملاتړ او د تروریستي عمل لپاره د وسلو د ترلاسه کولو په دوو تورونو تورن دی.

توحیدي که مجرم وپیژندل شي، تر ۳۵ کلونو پورې په بند محکوم کیدی شي.

د محکمې د اسنادو له مخې، د اوکلاهوما اوسیدونکی نصیر احمد توحیدي تیر کال د ټاکنو په ورځ د برید لپاره دوه کلاشینکوف ټوپکونه او ۵۰۰ مرمۍ ترلاسه کړې وې.

د FBI مشر کیش پټیل په یوه بیان کې وویل: "متهم اعتراف وکړ چې د ۲۰۲۴ کال د ټاکنو په ورځ یې د مرګوني برید پلان جوړ کړی و - یو برید چې د FBI او زموږ د شریکانو د ښه کار له امله کشف او شنډ کړای شو."

د متحده ایالاتو چارواکو ویلي چې توحیدي د برید پلان لپاره د میاشتو راهیسې د خپلې میرمنې د ورور عبدالله حاجي زاده په ګډون له څو نورو سره په تماس کې و.

حاجی زاده، چې هغه وخت ۱۷ کلن و، په اپریل کې په خپل جرم اعتراف وکړ. هغه د ۱۵ کلونو بند سره مخ دی.

نصیر احمد توحیدي، د طالبانو له واک ته رسیدو وروسته د ۲۰۲۱ کال په سپتمبر کې د کډوالۍ په ځانګړې ویزې متحده ایالاتو ته تللی.

ایران او اسراییل نن شنبې هم په یو بل د توغندیوباړونه وچلول او هوايي بریدونه و کړل.

په داسې حال کې چې دایراني توغندیو څپې داسراییلو فضا ته ورسیدې او دافع هوا سیستم یې د شنډولو لپاره لاس په کار شو ، په شمول د تل ابیب او بیت المقدس د اسراییل په ټولو سیمو کې د هوایي بریدونو دخطر شپیلی وغږول شوې، او اوسیدونکي یې په چټکۍ سرپناه ته ستانه سول.

د اسراییلو د امبولانس خدماتو ادارې په وینا، په اسراییلو کې یو سړی او یوه ښځه د هغه توغندي له امله ووژل شول او لسګونه نور ټپیان شول چې د دوی کورونو ته نږدې ولګېد.

د ژغورنې ټیمونو د تل ابیب څخه بهر په ریشون لیزیون ښار کې د ویجاړو شویو ودانیو لاندې د پلټنې او ژغورنې هلوځلو ته مخه کړه.

د اسراییلو دفاع وزیر یسراییل کاټز د شنبې په ورځ وویل چې د ایران مشرتابه په ملکي وګړو برید سره ، سره کرښه ماته کړه او "د دې لپاره به درنه بیه پریکړي".

بلخوا ، د فلسطین سرې میاشتې وویل د حوثي ملیشو لخوا له یمن څخه یو توغول شوي توغندي د اسراییلو په اشغال شوي لویدیځه غاړه کې د دریو ماشومانو په ګډون پنځه فلسطینیان ووژل.

په ایران کې، د نیمه رسمي تسنیم خبري اژانس راپور ورکړی چې په پلازمینه تهران کې د شپې څو چاودنې واورېدل شوې.

د فارس خبري اژانس هم ویلي چې د تهران په مهرآباد هوايي ډګر کې دوه توغندي ولګېدل، او د ایران رسنیو ویلي چې هلته د اور لګېدو راپورونه ورکړل شوي دي.

مهرآباد هوايي ډګر چې نږدې ورته دایران د رهبري مهمو ځایونه دي د جنګي جیټ او ترانسپورتي الوتکو یوه اډه هم لري.

ملګرو ملتونو کې د ایران استازي امیر سعید ایرواني وویل چې په ایران باندې د اسراییلو په بریدونو کې د لوړ پوړو پوځي چارواکو په شمول ۷۸ کسان وژل شوي او له ۳۲۰ څخه ډیر ټپیان شوي دي، چې ډیری یې ملکي وګړي دي.

د متحده ایالاتو ولسمشر ډونالډ ټرمپ د "اکسیوس" خبري وېب‌سایټ ته ویلي چې باور لري د اسراییلو پراخ برید پر ایران به د امریکا او ایران ترمنځ د اټومي توافق د ترلاسه کولو احتمال زیات کړي.

کله چې له هغه وپوښتل شول چې آیا د اسراییلو برید د ده اټومي ډیپلوماسي له خطر سره مخ کړې، نو ټرمپ وویل: "زه فکر نه کوم. ښايي برعکس وي. شاید اوس هغوی جدي خبرې اترې وکړي."

ډونالډ ټرمپ همداراز ټینګار وکړ چې جمعه یو مهم ورځ وه، او اسراییل په همدې ورځ د «فوق‌العاده امریکايي تجهیزاتو» څخه استفاده کړې ده.

همدغه راز د متحده ایالاتو ولسمشر، له هغه وروسته چې اسراییل پر ایران بریدونه پیل کړل، اعلان وکړ چې دوه میاشتې مخکې یې ایران ته ۶۰ ورځنی ضرب‌الاجل ورکړی و، څو «توافق ته ورسېږي»، او زیاته یې کړه چې اوس تهران دویمه موقع لري.

ډونالډ ټرمپ د جمعې په ورځ، د جوزا پر ۲۳مه، په خپل ټولنیز شبکه "Truth Social" کې ولیکل: "دوه میاشتې مخکې مې ایران ته ۶۰ ورځنی ضرب‌الاجل ورکړ، څو یوه توافق ته ورسېږي. هغوی باید دا کار کړی وای! نن ۶۱مه ورځ ده. ما هغوی ته وویل چې څه وکړي، خو هغوی ونه‌شو کولای دا کار ترسره کړي. اوس، شاید، هغوی دویم چانس ولري."

ټرمپ په یوه بله پیغام کې هم ولیکل: "لا هم وخت شته چې دې وژنو ته... د پای ټکی کېښودل شي» او زیاته یې کړه: «ایران باید مخکې له دې چې هېڅ پاتې نه شي، توافق وکړي او هغه څه وژغوري چې یو وخت د ایران امپراتورۍ بلل کېدل. بس دا کار وکړئ، مخکې له دې چې ناوخته شي."

ډونالډ ټرمپ همداراز ټینګار وکړ چې: "ما ایران ته بیا بیا فرصت ورکړی چې توافق وکړي."

ایران تر۱۰۰ زیاتې بې پیلوټه الوتکې د اسرائیلو په لور توغولي دي.

د اسرائیلو اردو شیبه مخکې اعلان وکړچې ایران دغه شمیر الوتکې توغولي او اسرائیل یې دنسکورولو لپاره تابیا نیولې ده.

داسرائیلو اردو وویل په ایران برید کې د اسرائیلو ۲۰۰ جنګي الوتکو ګډون وکړ او څه دپاسه ۱۰۰ هدفونه ویشتل شوي دي.

د اسرائیلو صدراعظم وايي چې د ایران په مختلفو هدفونو باندې د هیواد لومړني بریدونه په بشپړ ډول بریالي وو.

رادیو فردا ، دآزادې اروپا / آزادي راډیو ایراني څانګه دبنیامین نتانیاهو له قوله رپوټ ورکوي چې په دغو بریدونو کې دایران څو کسه لوړ رتبه پوځیان هم په نښه شوي دي.

اسرائیلي چارواکو د جمعې په سهار اعلان وکړ چې دوی د ایران په اټومي تاسیساتو باندې " واردمخه" برید ترسره کړی دی.

د اسرائیلو صدراعئم د ایران محتمل انتقامي برید ته په اشاره وویل اسرائیلي اتباع ممکن د اوږدې مودې لپاره په پناه ځایونو کې پاتې شي او باید پوځي لارښوونې تعقیب کړي.

بلخوا ، د ایران د بهرنیو چارو وزارت په یوه بیان کې وویل چې د اسرائیلو بریدونه دامریکا متحدو ایالاتو سره په همغږي ترسره شوي او واشنګټن یې ددغو بریدونو دنتایجو مسئول ګڼلی دی .

ایران سره لدې دا ادعا کوي چې دامریکا د بهرنیو چارو وزیر مارکو روبیود اسرائیلو له برید وروسته وویل چې متحده ایالات په دې بریدونو کې هیڅ رول نلري او ایران باید په سیمه کې د متحده ایالاتو د پوځي اډو له نښه کولو څخه ډډه وکړي.

بلخوا دایراني رسنیو رپوټونه وايي د سپاه پاسداران ځواکونو یو شمیر قوماندانان په دغو بریدونو کې وژل شوي دي .

د فارس خبري اژانس، چې سپاه پاسداران ته نږدې رسنۍ ده ، راپور ورکړ چې د اسلامي جمهوریت د وسله والو ګډو ځواکونو مشر محمد باقري د اسرائیلو په بریدونو کې وژل شوی دی.

سپاه پاسداران هم په خپله اعلامیه کې د اسرائیلو په بریدونو کې د خپل قوماندان حسین سلامي د وژل کیدل تایید کړل.

د اوکراین ولسمشر ولادیمیر زیلینسکي له هغو هیوادونو چې د روسیې د یرغل په وړاندې د کیف ملاتړ کوي، وغوښتل چې په مسکو بندیزونو ته زور ورکړي، او ویې ویل چې کریملین د لویو تلفاتو پروا نه لري خو د کافي اقتصادي فشار په نتیجه کې کیدای شي له جګړې لاس واخلي.

زیلنسکي داخبره پرون د ویډیو لینک له لاری په پراګ کې د نړیوال امنیتي کنفرانس د پیل غونډې ته وکړه.

د زیلنسکي لدغو خبرو څو ساعته مخکې ، روسیې د اوکراین په دوهم لوی ښار خارکیف یو ځل بیا دشپې په مهال برید وکړ.

د Globsec ، ګلوبسک امنیتي کنفرانس ته د هغه څرګندونې په داسې حال کې وشوې چې د روسیې او اوکراین ترمینځ د اسیرانو او بندیانو د تبادلې لړۍ دوام لري. اوکراین او روسیه ټپیان او ناروغه جنګیالي بیرته خپل هیواد ته راستنوي.

ګلوبسک کنفراس ته په خپله وینا کې، زیلینسکي له هیوادونو څخه داهم وغوښتل چې د ډرون یا بی پیلوټه الوتکو تولید زیات کړي او د روسیې د برید د مخنیوي لپاره نور ګامونه پورته کړي.

هغه وویل چې اوکراین د روسیې د ولسمشر ولادیمیر پوتین او د هغه د ځواکونو په وړاندې "د دفاع لومړۍ کرښه" ده.

د ایرانډیا د الوتکې د نسکوریدو په پیښه کې لږ تر لږه ۲۶۰ کسان مړه شوي دي.

هندي چارواکي وايي چې په الوتکه کې سپاره ۲۴۱ کسان مړه شوي دي، چې یوازې یو مسافر یې له پېښې څخه ژوندی پاتې شوی دی.

پاتې نور مړه شوي کسان د دولتي طبي کالج د لیلیې ودانۍ اوسېدونکي وو چې الوتکه پکې راولوېده.

راپور وايي، امکان لري چې د مړو شمېر به لوړ شي.

د ایر انډیا یوه الوتکه چې ۲۴۲ کسان پکې سپاره وو، د پنجشنبې په ورځ د هند په لویدیځ کې د احمد آباد له هوايي ډګر څخه دلندن په لور له الوتنې څو دقیقې وروسته ولوېده.

پولیسو وویل چې رامیش وشواس کمار، چې د مسافرو او عملې له ډلې څخه یوازینی ژوندی پاتې شوی کس دی ، د بیړني حالت دروازې ته نږدې ناست او دنسکوریدو په مهال یې له الوتکې ځان بهر غورځولی دی.

وشواس کمار، چې اوس مهال په روغتون کې دی، هندي رسنیو ته وویل چې هغه یو برتانوی تبعه دی او په هند کې د خپلې کورنۍ له لیدو وروسته له خپل ورور سره بریتانیا ته راستنیده.

راپورونه وایي چې د الوتکې په مسافرو کې ۲۱۷ کسه لویان او ۱۱ ماشومان وو.

وروسته لدي چې په تهران کې خلک د چاودنو په غږ له خوبه راویښ شول ، اسرائیلي چارواکو نن وویل چې د ایران پر اټومي تاسیساتو یې واردمخه بریدونه کړي دي .

د اسرائیلو صدراعظم بنیامین نتنیاهو په یوه ثبت شوي ویډیو پیغام کې وویل چې اسرائیل د ایران د بالستیک توغندیو د پروګرام زړه په نښه کړی او دا بریدونه د ایران د اټومي زیربنا او د هغې د ډیری پوځي وړتیاوو د زیانمنولو په هدف ترسره شو.

د ایران دولتي تلویزیون راپور ورکړ چې د جمعې په سهار د پلازمینې امام خمیني نړیوال هوایی ډګر کې الوتنې وځنډول شوې.

بلخوا داسرائیلودفاع وزیر یسراییل کاتس بیړنی حالت اعلان کړ او ویې ویل چې احتمال لري ایران انتقامی برید وکړي.

د هند د هوایي چلند یوه الوتکه چې دوه سوه دوه څلویښت سپرلۍ یې لرلې نن د احمد اباد له هوایي ډګر څخه له الوتنې څو دقیقې وروسته وغورځیده.

رویټرز اژانس د هند د روغتیا د فدرالي وزیر په وینا خبر ورکړ چې په دې پيښه کې ګڼ شمیر کسانو خپل ژوند له لاسه ورکړی دی.

د ځینو راپورونو له مخې تر اوسه د الوتکې د غورځیدو له ځایه دیرش جسدونه ترلاسه شوې دي.

پولیسو ویلي دي چې الوتکه د احمد اباد هوایي ډګر ته څیرمه د استوګنې پر یوې سیمې لویدلې ده.

د هند د هوایي چلند په وینا په سپرلیو کې یوسل او نهه شپيته هندیان، درې پنځوس بریتانیایان، اووه تنه پرتګالیان او یو تن د کاناډا دي.

دا الوتکه بویینګ-۸-۷۸۷ ډوله یوه مدرنه مسافر وړونکې الوتکه وه چې د لندن ګیټویک هوایي ډګر ته روانه وه.