په افغانستان کې د ناټو د غوڅ ملاتړ مأموریت د افغانستان لپاره د امریکا د ولسمشر ډونالد ټرمپ د اعلان شوې ستراتېژۍ په اړه غبرګون ښودلی دی.
د دغه مأموریت په ټویټر پیغام کې راغلي چې زموږ «په افغانستان کې د بهرنیو ځواکونه» موجودیت به د روانو حالاتو له شرایطو سره سم وي او د بهرنیو ځواکونو وتل به د یوه مهالوېش له مخې نهوي.
نوموړي مأموریت همدارنګه طالبانو ته خبرداری ورکړی چې «دوی به د جنګ له لارې بریا ترلاسه نهکړي» او د دې وخت رارسېدلی چې دغه ډله له تاوتریخوالي لاس واخلي او د خبرو مېز ته کېني.
د امریکا د نوې ستراتېژۍ د اعلان په اړه افغان کارپوهان څه وایي؟
ځیني افغان کارپوهان وايي چې د امریکا ولسمشر نن سې شنبه د افغانستان لپاره د ستراتېژۍ په اعلان سره هغه څه په ډاګه کړل چې افغانانو یې تمه کوله.
د ناټو پخوانی سلاکار او افغان کارپوه شفیق همدم نن سې شنبه ازادي راډیو ته وویل چې د مخالفو وسلهوالو ګروپونو د پټنځایونو په اړه، پاکستان ته تر دې مخکې دومره جدي ګواښ هېڅچا نهو کړی.
ولسمشر ټرمپ د دې تر څنګ چې ننیې د افغان جګړې د ګټلو هوډ وښود، پاکستانیې طالبانو او نورو مخالفو ډلو ته په پناه ورکولو تورن کړ او ویېویل چې له دغه هېواد سره د امریکا د میلیاردونو ډالرو مرستو پالېسي به سر له نننه بدلېږي.
د ازادي راډیو خبریال صفيالله ستانکزي له شفیق همدم سره خبرې کړي او لومړی یې د ولسمشر ډونالد ټرمپ د خبرو د مهمو ټکو په اړه، د هغه نظر پوښتلی دی.
د دې مرکې د اورېدو لپاره لاندې لېنک کېکاږئ:
کریمي: د امریکا ستراتېژي هیله بخښونکې ده، خو د تطبیق چارهیې باید وشي
د افغان ملي پوځ پخوانی لوی درستیز جنرال شیر محمد کریمي وايي چې د افغانستان په اړه د امریکا ستراتېژي هیله بخښونکې ده، خو د تطبیق چارهیې هم باید وشي.
جنرال کریمي له ازادي راډیو سره په یوه ځانګړې مرکه کې د سې شنبې په ورځ وویل چې له افغانستان څخه د ګڼو امریکايي او بهرنیو پوځیانو وتل یوه تېروتنه وه چې د دښمن په ګټه تمامه شوه، خو په اوسنۍ ستراتېژۍ کې شته مسایل باید، یو په یو تطبیق شي.
د امریکا ولسمشر ډونالد ټرمپ نوې ستراتېژي اعلان کړه چې پهکې یې له افغان پوځ او حکومت سره د همکارۍ او مرستو په دوام ټینګار وکړ او پاکستان تهیې د ترورېستي ډلو د پټنځایونو په سبب ګواښ وکړ.
د افغانستان دفاع وزارت له پخواني لوی درستیز جنرال شیر محمد کریمي سره د ازادي راډیو خبریال صفيالله ستانکزي مرکه کړې ده او لومړی یې له پوځي پلوه د امریکا د نوې ستراتېژۍ د تطبیق د څرنګوالي پوښتنه کړې ده.
د دې مرکې د اورېدو لپاره لاندې لېنک کېکاږئ:
د امریکا ولسمشر ډونالد ټرمپ بالاخره تېره شپه د افغانستان او سیمې لپاره خپله نوې ستراتېژي اعلان کړه.
ولسمشر ټرمپ افغانستان ته د نورو ځواکونو د لېږلو یا د ځواکونو د ایستلو یادونه ونهکړه، خو پر پاکستانیې بیا بیا غږ وکړ چې د ترورېزم پر ضد په مبارزه کې همکاري وکړي.
ولسمشر ډونالد ټرمپ تېره شپه د افغانستان او سیمې لپاره د خپلې ستراتېژۍ د اعلان پر مهال وویل چې له افغانستانه د ځواکونو د ایستلو په نتیجه کې خلا رامنځته کېږي او هغه څه پېښېدای شي چې د ۲۰۰۱ میلادي کال د سپټمبر په ۱۱مه وشول.
د امریکا ولسمشر ډونالد ټرمپ
ښاغلي ټرمپ وویل:
"زه په افغانستان کې د امریکا د ګټو په اړه ۳ اساسي نتیجو ته ورسېدم، لومړی زموږ ملت باید د زیاتو قربانیو، په ځانګړي ډول له انساني تلفاتو وروسته قاطع نتیجه تر لاسه کړي، زموږ نارینه او ښځینه د بریالیتوب مستحق دي، دوهم د ژر وتلو نتیجه هم د نه اټکل او نهمنلو وړ ده، د ۲۰۰۱ میلادي کال د سپټمبر د ۱۱مې حمله په افغانستان کې پلان شوه او له هماغه ځایه هدایت شوې وه، ځکه چې په دې هېواد کې د داسې چا واکمني وه چې ترورېستانو تهیې پناه ورکړې وه، نو د ځواکونو په بیړه ایستل به د القاعده او داعش په شمول ترورېستانو ته خلا په لاس ورکړي او هماغه څه به تکرار شي چې د سپټمبر په ۱۱مه وشول او یا له عراق څخه زموږ د ځواکونو له وتلو وروسته وشول، له عراقه زموږ د ځواکونو وتلو داعش ته موقع ورکړه چې منظم شي، حملې وکړي او سیمې ونیسي، موږ په افغانستان کې دا تېروتنه نهتکراروو، درېيمه او وروستۍ خبره دا ده چې زه دې نتیجې ته رسېدلی یم چې د افغانستان او سیمې خطر حتمي دی، نن ۲۰ ترورېستي ډلې چې امریکا پېژندلي، په افغانستان او پاکستان کې فعالې دي."
ښاغلي ټرمپ همداراز وویل چې په پیل کې ده غوښتل چې له افغانستانه ټول ځواکونه وباسي، خو کله چې په سپینه ماڼۍ کې د کار د مېز شاته کېناست، د افغانستان ستونزې ورته څرګندې شوې.
ډونالد ټرمپ زیاتوي:
"زما اصلي اراده دا وه چې له افغانستانه ځواکونه وباسم او ما تل خپلې غوښتنې اجرا کړې دي، خو ما په خپل ژوند کې اورېدلي چې کله په سپینه ماڼۍ کې د مېز شاته کېنې او د امریکا ولسمشر شوې، وضعیت بدلېږي، ما د افغانستان په اړه بشپړه مطالعه وکړه او له هرې زاویې مې ورته وکتل، ډېرې غونډې مې پرې وکړې، تر دې چې تېره اوونۍ مې له خپلو پوځي مشرانو او جنرالانو سره، د دې لپاره چې ستراتېژي بشپړه کړو، غونډه وکړه."
ښاغلي ټرمپ وویل چې امریکا به د افغانستان د حکومت او امنیتي ځواکونو ملاتړ ته دوام ورکړي.
ده همداراز وویل چې په پاکستان کې به د ترورېستانو د پناه ځایونو په وړاندې غلی پاتې نهشي.
ده وویل چې پاکستان پخوا د امریکا ښه شریک و او له پخوانیو مرستو یې مننه کوي، خو اوس په پاکستان کې د ترورېستانو ځالې او پناه ځایونه شته چې له هغه ځایه د امریکا خلک په نښه کېږي.
نوموړي وویل:
"پاکستان ډېر ځله د ګډوډۍ، تشدد او ترور عناصرو ته پناه ورکړې ده، ګواښ شدید دی، ځکه چې پاکستان او هند دوه اټمي هېوادونه دي او د دوی کړکېچنې اړیکې په شخړې بدلېدای شي او دا کېدای شي."
ولسمشر ټرمپ له هند سره د همکاریو د دوام یادونه وکړه او هند یې په دې وستایه چې له افغانستان سرهیې د میلیاردونو ډالرو مرسته کړې ده.
ده افغانستان ته د ځواکونو د لېږلو، د هغو د شمېر او د ځواکونو د ایستلو په اړه وویل چې په دې هکله د دې لپاره څه نهوايي چې نهغواړي، دښمن ورڅخه ګټه واخلي.