واشنګټن ایګزاماینر مجلې په خپله وروستي ګڼه د افغانستان په اړه یوه مقاله خپره کړې ده چې عنوان يې دی: ایا امریکا په افغانستان کې بیا هم هغه خطا کوي؟
واشنګټن ایګزاماینرپه دې مقاله کې د هارورډ پوهنتون د پروفیسور سټیفن والټ دا پوښتنه مطرح کړې چې افغانستان ته د نورو سرتېرو له استولو څخه د ولسمشر ډونالډ ټرمپ هدف څه دی؟
مجله وايي، دا پوښتنه افغانستان ته له درېیو نیولې تر پینځو زرو د اضافي سرتېرو د استولو په اړه د ولسمشرټرمپ د ادارې پیشنهادونو ته په پام مطرح شوې ده.
په مقاله کې راځي:
ولسمشرټرمپ امریکايي قوماندانانو ته پراخ صلاحیت ورکړی چې افغانستان ته د اضافي سرتېرو د استولو په اړه پریکړه وکړي او د مقالې د لیکوال سټیفن والټ په وینا ولسمشرټرمپ ښايي په دې لړ کې د پنټاګون لهخوا وړاندې کیدونکی هر پیشنهاد لاسلیک کړي.
ستیفن والټ لیکي:
که ټرمپ افغانستان ته د نورو سرتېرو استول منظور کړي نو دا به هم هغه خطا وي چې د امریکا پخواني ولسمشر باراک اوباما کړې وه.
واشنګټن ایګزاماینر د پروفیسور والټ په حواله لیکي:
د افغانستان اوسني وضعیت هم هغه شان دی څرنګه چې په ۲۰۰۹ میلادي کال کې د اوباما د واکمنی پرمهال و او دا حالت ښيي چې امریکا څومره هم پیسې ولګوي افغانستان نه باثباته کیږي.
پروفیسور والټ زیاتوي:
که څه هم د اشرف غني حکومت د حامد کرزي د واک په مقایسه امریکا سره دوستانه اړیکه لري خو اداري فساد، سیاسي ستونزې او د انتخاباتو د ترسره کولو په پروسه کې ځنډ افغانستان په هم هغه حالت کې درولی چې په ۲۰۰۹ کال کې يې دا هېواد شاهد و.
په مقاله کې راځي چې د ۲۰۰۹ او ۲۰۱۷ میلادي کال د افغانستان په وضعیت کې یوازینی توپیرد اضافي استونکو سرتېرو شمېر دی.
واشنګټن ایګزاماینر زیاتوي:
د امریکا د دفاع د وزارت چارواکو چې د افغانستان پر سټراټیژي کار کوي هېڅ داسې قانع کوونکی سپیناوی نهدی وړاندې کړی چې وښيي دوی ولې ګمان کوي چې په پینځو زرو اضافي سرتېرو به هغه کار وکړي چې ۱۴۰ زرو سرتېرو ونهشو کړای.
مجله د پروفیسور سټیفن والټ دا خبره هم نکل کړې چې وايي، ستونزه د سرتېرو په شمېر، د هغوی د استولو په مهالویش او یا د جګړې د ښکیلتیا په څرنګوالي کې نهده بلکې اصلي مشکل په افغانستان کې د دولت جوړونې ناکامه سټراټیژي ده.
فارن افیرز:
فارن افیرز خپرونه د افغانستان په اړه لیکي چې د پینځو میاشتو ارزونو وروسته لوړ رتبه امریکايې چارواکو ولسمشر ډونالډ ټرمپ ته پیشنهاد کړی چې افغانستان ته څو زره نور سرتېري واستوي.
خو فارن پالیسي د کارپوهانو په حواله وايي چې یوازې د اضافي سرتېرو استول سټراټیژي نه جوړوي بلکې پکارده چې دا کار د افغانستان په اړه د یوې منسجمې سټراټیژۍ په چوکاټ کې وشي.
فارن پالیسي لیکي:
دا مهال پر څلور سټراټیژیو غور کیدی شي چې دولت جوړونه، روغه جوړه، د وسلهوالو د فعالیتونو مهارول او د ځواکونو ځای پرځای کول.
د فارن پالیسي په لیکنه له دې جملې څخه هره سټراټیژي خپل ځانګړي اهداف، د بري تیوري، لګښتونه او خطرونه لري.
د مطلب په پای کې راځي چې د ډونالډ ټرمپ اداره باید هره سټراټیژي جلا-جلا وڅېړي او د مثبتو پایلو په نظر کې نیولو سره يې سختې پریکړې وکړي.
فارن پالیسي لیکي دا پریکړې باید افغانستان ته د نورو امریکايي او ناټو سرتېرو تراستولو مخکې وکړي.