انسان کله ځان کله جانان له ګل سره تشبه کوي، کله د ګل د نازکۍ بیان کوي، د عمر په کمښت یې افسوس کاږي، کله د ډېرې مینې له امله یو بل ته ګل ورکوي او کله یې له ډېر درناوي څخه قدمونو ته غوړوي.
په ټوله نړۍ کې ګل د پاکۍ، مینې او رښتینولۍ د یوه سمبول په توګه کارول کېږي او د ګلونو د راکړې ورکړې او معنوي تحفې په توګه د استعمال تاریخ ډېر لرغونی دی.
ګل که له یوې خوا په رواني لحاظ په انسان اغېز ښیندي د بېلابېلو معناو په درلودلو سره د خوشبویئ او لطافت لپاره کارول کېږي.
په نړۍ کې له ډېره پخوا راهیسې د ګلونو د پاللو او استعمالولو دود موجود دی چې د وخت په تېرېدا سره یې تغیر کړی دی.
