د سوریې لپاره د ملګرو ملتونو خاص استازی به راتلونکې اوونۍ د سوریې د حکومت او مخالفانو د مشرانو تر منځ د سولې د خبرو یوه غونډه جوړه کړي.

د سټیفن دي مېستورا دفتر پرون وویل چې دا خبرې په جنیوا کې کېږي او پایلې به‌یې د روانې میلادي میاشتې په پای کې د ملګرو ملتونو امنیت شورا ته وړاندې شي.

ښاغلي دي مېستورا ویلي چې هیله لري څو د روسیې، ایران او ترکیې له‌خوا په سوریه کې د امن سیمو د جوړولو د تېرې اوونۍ پرېکړه د ملګرو ملتونو د خبرو لپاره زمینه برابره کړي.

هغه دا هم ویلي چې که د امن سیمو د جوړولو موافقه سمه عملي شي تاوتریخوالی به د پام وړ کم کړي.

ایران او روسیه د سوریې په کورنۍ جګړه کې د بشار الاسد له رژیم ملاتړ کوي او ترکیه هم د رژیم د یو شمېر مخالفینو په خوا ده.

چین او اروپايي ټولنې په یوه ګډه اعلامیه کې ویلي چې دوی به د اقلیم د بدلون پر ضد خپلې هڅې زیاتې کړي.

یاده اعلامیه د پنجشنبې په ورځ، د زمري پر ۲مه، هممهاله له هغه یو ورځني غونډې سره خپره شوې چې د اروپايي ټولنې مشران یې په بیجینګ کې ترسره کوي.

د ځمکې د تودوخې زیاتوالی اوس د نړۍ له لویو ننګونو څخه ګڼل کېږي.

اروپايي ټولنه غواړي چې تر ۲۰۵۰ کاله پورې د ګلتوني یا مضرو ګازونو خپرېدا تر ممکنه حده راکمه کړي.چین چې د نړۍ د ګلتوني ګازونو تر ټولو ستر تولیدوونکی دی، ژمنه کړې چې تر ۲۰۶۰ پورې به دغه هدف ته ورسېږي.

دواړو خواوو هوکړه کړې چې په هغو برخو کې به خپلې همکارۍ پراخې کړي چې د انرژۍ پاکو سرچینو ته د لېږد او د اقلیم د بدلون پر ضد مبارزه په کې شامل دي.

خو د اروپايي ټولنې د اقلیم د چارو یوه جګپوړي چارواکي فایننشل ټایمز ته ویلي، بروکسل به تر هغې پورې د اقلیم په اړه ګډه اعلامیه لاسلیک نه کړي، تر څو چې چین د ګلتوني ګازونو د کمولو لپاره پیاوړې هدفونه مشخص نه کړي.

په ځواب کې یې، د چین دولتي ورځپاڼې "چاینا ډېلي" اروپايي ټولنه تورنه کړې چې غواړي د اقلیم موضوع د فشار وسیله وګرځوي څو چین دې ته اړ کړي چې د اوکراین د جګړې په اړه خپل دریځ بدل کړي.

انګلستان به راتلونکی کال د کرکټ د ټېسټ سیالیو په لړ کې د نیوزیلنډ او پاکستان لوبډلو کوربه‌توب وکړي، او د هند او سریلانکا لوبډلې به هم دې هېواد ته د یوورځنیو او شل اوریزو لوبو لپاره سفر وکړي.

د انګلستان کرکټ بورډ (ECB) دا خبره د پنجشنبې په ورځ کړې ده.

د انګلستان د کرکټ بورډ د پلان له مخې، انګلستان به د جون په میاشت کې له نیوزیلنډ سره درې ټېسټ لوبې وکړي، چې لومړۍ به یې د لُورډز په لوبغالي کې ترسره شي.

د پاکستان لوبډله به هم د اګست میاشتې په نیمایي کې انګلستان ته ولاړه شي او هلته به درې ټېسټ لوبې وکړي.

همداراز، د هند او سریلانکا لوبډلې چې د راتلونکي کال د شل اوریز نړیوال جام ګډ کوربه‌توب کوي، انګلستان ته به د یوورځنیو او شل اوریزو لوبو لپاره ورشي.

د انګلستان د کرکټ بورډ اجرائیه مشر ریچارډ ګولد په یوه اعلامیه کې ویلي: "خوښ یو چې بېلابېلې لوبډلې د سیالیو لپاره انګلستان ته راځي، او یو بل له نندارچیانو ډک او هیجاني دوبی به ولرو."

د یوې لویدلې مسافر وړونکي الوتکې ماتې ګوډې چې ۴۹ کسان په کې سپاره وو د روسیې په لرې ختیځ کې د تیندا ښار ته څېرمه د یوې غونډۍ په لمنه کې موندل شوي دي.
د روسیې د بېړنیو حالاتو وزارت نن دغه خبر تأیید کړی دی.

د پېښې له ځایه د روسیې د د دولتي رسنیو له خوا په خپرو شویو انځورونو کې ښکاري چې د الوتکې پاتې شوني د یو لوی ځنګل په منځ کې پراته دي او لا هم ترې لوګی خېژي.
اینترفاکس خبري آژانس د بیړنیو خدماتو د سرچینو په حواله ویلي، لومړنۍ څېړنې ښيي چې د الوتکې له غورځېدو څوک ژوندی نه دی پاتې شوی. سرچینو ویلي چې د پېښې په سیمه کې هوا مناسبه نه وه.
د روسیې د لرې ختیځ ترانسپورتي ادارې ویلي، د کښیناستو پر مهال له کنټرول سیسټم سره د اولوتکې اړیکې پرې شوې وې.
د چارواکو په وینا، دا الوتکه له بلاګووشچېنسک ښاره چې د روسیې او چین پر پوله موقعیت لري، د تیندا ښار پر لور روانه وه.

د بشري مرستو څه باندې سلو سازمانونو په غزه کې د پراخې قحطۍ خبرداری ورکړی دی.

د بشري مرستو د رسونو ۱۱۱سازمانونو له هغې ډلې د بې پولې ډاکټرانو سازمان پرون چهارشنبې خبرداری ورکړی چې په غزه کې د "دوی د کارکوونکو په ګډون خلک د مرګ په حال کې دي".

دغو ادارو په غزه کې د عاجل اوربند غوښتنه کړې او پر ښکیلو خواوو يې غږ کړی چې د ملګرو ملتونو په استازیتوب د بشري مرستو رسونو سازمانونو ته د مرستو د رسولو اجازه ورکړي.

د اسراییلو حکومت په وروستیو کې په غزه کې د پراخې قطحۍ او لوږې له کبله له فشارونو سره مخامخ دی.

غزه چې د څه باندې دوو میلیونو فلسطینیانو کور دی، په تیرو ۲۱میاشتو کې د جګړې سربیره له سختې قطحۍ سره مخ ده، او د خوارکي توکو د ویش پرمهال په کې په زرهاوو کسان د اسراییلو د سرتیرو په ډزو کې وژل شوي دي.

د ایرلنډ پولیس وايي، د پلازمینې بلفاست په جنوبي لویدیز مګ وایرزبریج سیمه کې وسله والو دوه کسان وژل په ډزو وژلي او دوه نور ټپیان دي.

پولیسو ویلي، اوسمهال د عام خلکو لپاره کوم خطر نشته.

تراوسه د برید انګیزه روښانه نه ده.

اروپايي ټولنه وايي، د امریکا د ولسمشر ډونالډ ټرمپ له لورې پر دې ټولنه د لګول شویو لوړو تعرفو او سوداګریزو ستونزو پر حل لارو او متقابلو اقداماتو کار کوي.

رویترز خبري اژانس نن چهارشنبې د اروپايي کمیسیون په حواله راپور ورکړی چې د دغې ټولنې غړي هېوادونه له امریکا سره د سوداګرۍ په خبرو اترو کې د یوې پایلې د ترلاسه کولو په تمه دي.

ټاکل شوې د اروپايي ټولنې د سوداګرۍ کمیشنر ماروس سیفکویچ نن ماسپښین د امریکا د سوادګرۍ له وزیر هاورډ لوټنیک سره د لوړو تعرفو په اړه خبرې وکړي.

امریکا له اروپايي ټولنې د توکو پر صادراتو لس سلنه او د دې ټولنې د پولادو پر صادراتو۵۰سلنه، د المونیو پر صادراتو۲۵سلنه او د موترو پر پروژه جاتو ۱۰سلنه تعرفه وضعه کړې ده.

د ملګرو ملتونو امنیت شورا په یوه پریکړه لیک کې د دغه سازمان له ۱۹۳ غړو وغوښتل چې د غزې په ګډون یو شمیر هېوادونو کې د روانو جګړو هواري ته ټولې ممکنه لارې چارې وسنجوي.

د دوی اشاره د اوکراین، سوډان، هیټي او میانمار جګړو او شخړو ته وه چې هره ورځ د انسانانو ژوند اخلي.

د ملګرو ملتونو سرمنشي انتونیو ګوتیریش وویل، لوږه اوس په غزه کې د هر کور دروازه ټکوي او په خبره یې اسراییل غزې ته د ملګرو ملتونو د مرستو مخه نیولې ده.

ملګرو ملتونو وړاندې تر دې په ځلونو په غزه کې د بشري ناورین خبرداری ورکړی، خو هلته د جګړې په کچه کې کوم بدلون نه دی راغلی.

یوه تازه راپور کې ویل شوي چې شاوخوا زر تنه فلسطینیان تیرو څو اونیو کې داسې مهال وژل شوي چې د مرستو ټولولو مرکزونو کې مرستو ته راټول شوي وو.

د امریکا ولسمشر ډونالډ ټرمپ له جاپان سره د یوې سوداګریزې معاملې خبر ورکړی او له هغه هېواده واردیدونکو توکو باندې یې ګمرکي تعرفه ۱۵ فیصدو ته راښکته کړې.

پخوا دغه تعرفه ۲۵ فیصده وه.

ټرمپ د سه شنبې په ورځ ویلي، له دغې معاملې سره به سلګونه زره کسانو ته د کار زمینه برابره شي او په خبره یې پخوا هیڅ داسې یو کار نه و شوی.

د امریکا ولسمشر پر خپله ټولنیزه پاڼه ( سوشل تروټ) لیکلي، هغه له جاپان سره تل پراخه اړیکو ته دوام ورکوي.

د ټرمپ د معلوماتو له مخې جاپان به د ده په لارښوونه په متحده ایالتونو کې ۵۵۰ میلیارده ډالره پانګونه وکړي او خپل اقتصاد به د امریکایي موټرو او وریجو لپاره پرانیزي.

متحده ایالاتو د سه شنبې په ورځ، د جولای په ۲۲مه اعلان وکړ چې د ملګرو ملتونو د تعلیمي، علمي او کلتوري سازمان، یونیسکو څخه به ووځي.

واشنګټن ادعا کړې چې یونیسکو "د اسراییلو ضد دریځونه نیولي دي."

د سپینې ماڼۍ مرستیالې ویاندې انا کیلي نیویارک پوسټ ته وویل چې ولسمشر ټرمپ پریکړه کړې چې متحده ایالات له یونیسکو څخه وباسي.

هغې ادعا وکړه چې یونیسکو " له تفرقه اچوونکو اجنډاګانو او پالیسیو ملاتړ کوي چې په بشپړ ډول د هغو پالیسیو سره په ټکر کې دي چې د امریکا خلکو په نومبر کې رایه ورکړې وه."

میرمن کیلي د تیر کال د ولسمشرۍ ټاکنو ته اشاره کوله، چې په نومبر کې ترسره شوې او ډونالډ ټرمپ په کې بریالی شو.

د یونیسکو څخه د متحده ایالاتو د وتلو پریکړه به د ۲۰۲۶ کال د دسمبر په پای کې پلي شي.

ولسمشر ټرمپ په ۲۰۱۸ کال کې د خپلې لومړۍ دورې په جریان کې له یونیسکو څخه امریکا وویستله ځکه چې هغه وویل دا سازمان د اسراییلو ضد دریځونه نیسي.

بیا په ۲۰۲۳ کې، پخواني ولسمشر جو بایډن متحده ایالات بیرته یونیسکو ته شامل کړل.

متحده ایالاتو او اسراییلو په ۲۰۱۱ کال کې هغه مهال د یونسکو تمویل بند کړ چې دغه سازمان فلسطین ته د یوه دولت په توګه غړیتوب ورکړ.

ټاکل شوې د اوکراین او روسیې مرکچیان سبا چهارشنبه په ترکیه کې د سولې بل پړاو خبرې پيل کړي.

دا خبره د اوکراین ولسمشر ولودمیر زلنسکي داسې مهال کړې چې سولې ته د رسیدو لپاره پر کرملین د لویدیځ فشارونه زیات شوي دي.

تر دې وړاندې ستانبول کې دوه پړاوه خبرې شوي، خو په ظاهره یې د جګړې پر لیکو کوم اغیز نه دی کړی.

د سولې د نوي پړاو دا خبرې داسې مهال پلان شوي چې روسیې د اوکراین پر پلازمېنې او نورو ښارونو خپلو خونړیو هوایي بریدونو ته دوام ورکړی دی.

د سولې پر خبرو سربیره د زندانیانو تبادله د سبانیو خبرو مهمې مسسلې دي.

د امریکا ولسمشر ډونالډ ټرمپ په دې وروستیو کې مسکو ته ۵۰ ورځې مهلت ورکړ چې له اوکراین سره سوله وکړي، که نه پراخ بندیزونه به پرې ولګوي.