له بوسټون څخه تر لاس انجلس پورې د امریکا په بېلابېلو ښارونو کې پرون زرګونو کسانو د امریکا د ولسمشرۍ په انتخاباتو کې د جمهوري غوښتونکي ډونالډ ټرمپ د بریالیتوب پرضد مظاهرې وکړې.

دې اعتراض کوونکو چې تر ډېره سوله ییز وو، ترافیکې ستونزې رامنځ ته کړې او د ډونالډ ټرمپ ضد شعارونه یې ورکول.

په نیویارک زرګونو اعتراض کوونکو د منهاټن لارې کوڅې بندې کړې او د ټرمپ د ودانۍ او په پنځم سړک د هغه د کور خوا ته ولاړل.

د دوی څخه په سلګونو اعتراض کوونکي د منهاټن پارک کې راټول شول "هغه زما ولسمشر نه دی" نارې یې ووهلې.

د شیکاګو په مرکزي سیمه کې د اتلس سوو په شاوخوا کې کسان د ټرمپ د نړیوال هوټل او د ټرمپ د څلي بهر راټول شول او د ډونالډ ټرمپ پرضد یې شعارونه ورکړل.

په باسټون کې زرګونو اعتراض کوونکو د ټرمپ خلاف د ښار مرکزي سیمه کې لاریون وکړ دوی په خپل شعارونو کې ټرمپ په تبعیض تورناوه او نارې یې وهلې چې "ټرمپ استیضاح کړئ."

په سیټل کې پولیس وايي، د ټرمپ پرضد یو لاریون ته نېژدې ډزې شوي چې قربانیان هم لري خو وايي چې دې ډزو له مظاهرې سره تړاو نه درلود.

د امریکا راتلونکې ولسمشر په توګه د ډونالډ ټرمپ د انتخاب پرضد مظاهرې تر ډېره په هغو ښارونو کې متمرکزې وې چې د نوموړې ډیموکراټې رقیبې هیلري کلېنټن ته په کې اکثریت خلکو رایې ورکړې وې خو په ځینو هغو سیمو کې هم مظاهرې شوې چې د ټرمپ پلویان په کې زیات دي.

د اسراییلو پوځ د سوریې په پلازمینه دمشق کې د دفاع وزارت پر ودانۍ هوايي برید کړی دی.

د دې وزارت پر ودانۍ څو ساعته مخکې د بې پیلوټه الوتکو بریدونه شوي چې مرګژوبله لري، خو جزیات يې خپاره شوي نه دي.

دا بریدونه په داسې حال کې دي چې د سوریې په سویدا ولایت کې د بدوي او دروزي مذهبي فرقو ترمنځ نښتې دوام لري او اسراییلو د دروزي په پلوۍ د سوریې پر حکومتي ځواکونو بمبار کړی دی.

د اسراییلو د دفاع وزیر اسراییل کاتس څو ورځې وړاندې د دغو هوايي بریدونو خبرداری ورکړی وو.

په سوریه کې تاوتریخوالي د بدوي او دروزي فرقه ترمنځ وروسته له هغې زیات شو چې د سوریې د بشري حقونو د څار د یو سازمان په خبره دواړو خواوو ته په وروستیو نښتو کې سخته مرګژوبله واوښته.

تراوسه په دې نښتو کې د څه باندې دوه سوه پنځوس کسان وژل کیدل تایید شوي دي.

په دې وروستیو کې هغه وګړي چې په سوریه، لبنان، اسراییلو او د جولان په لوړو کې ژوند کوي د خپل امنیت په اړه انديښمن دي.

اسراییلو خبرداری ورکړی که چیرته د سوریې حکومتي ځواکونه له دروزي وسله والو سره په نښته کې شاتګ ونه کړي د خپلو بریدونو لمن به پراخه کړي.

د پاکستان له لورې د هوايي خوندیتوب د معیارونو له لوړولو وروسته د بریتانیا چارواکو خپل هېواد ته د پاکستان پر الوتنو څو کلن بندیز لرې کړ.

لندن دا بندیزونه په ۲۰۲۰کال کې د پاکستاني پیلوټانو د جواز په ازموینو کې د درغلۍ او د پاکستان د نړیوال هوايي شرکت د یوې الوتکي د لوېدو له کبله چې ۹۷کسان په کې مړه شول، لګولي وو.

تر دې وړاندې د اروپايي ټولنې د هوايي چلند ادارې هم دا بندیز لرې کړی و او د اسلام اباده او اروپايي هېوادونو ترمنځ مستقیمې الوتنې پیل شوې وې.

په اسلام اباد کې د بریتانیا سفیر ویلي، د دې هېواد د هوايي خوندیتوب کمېټې او د پاکستان د هوايي چلند ادارې ترمنځ له پراخې همکارۍ وروسته محدودیتونه لرې شوي، خو هوايي شرکتونه باید بریتانیا ته د الوتنو لپاره د جواز غوښتنه وکړي.

د پاکستان دفاع وزیر دا اقدام یو مثبت ګام بللی دی.

په ایتوپیا کې څه باندې اتیا کسان په داعش وسله والې ډله کې د غړیتوب په تور نیول شوي دي.

دغه کسان چې د سومالیا په پانتلند سیمه کې روزل شوي وو، غوښتل يې چې ایتوپیا کې ترهګریز بریدونه ترسره کړي.

د اتیوپیايي چارواکو په خبره، دا کسان د پلازمینې ادیسه بابا په ګډون په بیلابیلو ښارونو کې نیول شوي دي.

د ایتوپیا اړیکې له سومالیا سره په دې هېواد کې د الشباب په نوم د یوې وسلې والې ډلې د فعالیتونو له کبله ترینګلي دي.

د بریتانیا د دفاع وزارت د یوه چارواکي له لورې د افغانانو د شخصي معلوماتو له افشا کیدو وروسته څرګنده شوه چې د یوې پټې طرحې له مخې زرګونه افغانان بریتانیا ته انتقال شوي دي.

رویترز خبري اژانس لیکلي، په دغو معلوماتو کې، چې د ۲۰۲۲کال په فبرورۍ میاشت کې په تیروتنه د دفاع وزارت د یوه چارواکي له لورې پر فیسبوک خپاره شوي وو، د شاوخوا ۱۹ زره افغانانو نومونه او معلومات شامل وو — دا هغه کسان وو چې غوښتنه ‌یې کړې وه چې بریتانیا ته انتقال شي.

دا پېښه یوازې شپږ میاشتې وروسته له هغه وشوه چې طالبانو کابل ونیوه.

د بریتانیا مخکینی حکومت په ۲۰۲۳کال کې د دغو معلوماتو د افشا کیدو په اړه خبر شو چې نهه میاشتې وروسته يې د افغانانو د بیا میشتیدو لپاره یوه طرحه جوړه کړه چې له مخې یې ۴۵۰۰ افغانان بریټانیا ته انتقال شول.

خو دغو افغانانو ته پرون سې‌شنبې د معلوماتو د افشا کیدو په اړه خبر ورکړل شوی دی.

د بریټانیا دفاع وزیر جان هیلي د معلوماتو د افشا کیدو له کبله بښنه غوښتي ده.

د رویترز خبري اژانس د راپور له مخې، هغو کسانو ته چې شخصي معلومات يې افشا شوي د احتیاطي تدابیرو ویل شوي وو.

رویترز د بریټانیايي چارواکو په حواله لیکي، ښايي طالبان د دغو معلوماتو له خپریدو خبر نه وو، خو دا تاییدول هم ستونزمن دي چې اغیزمن کسان به د معلوماتو د افشا کیدو له کبله له جدي خطر سره مخامخ شوي وي که نه وي.

د سوریې په سویدا ولایت کې د حکومتي ځواکونو او وسله والو ترمنځ نښته بیا پیل شوې ده.

د دروزي وسله والو او حکومتي ځواکونو دا نښته نن سهار د سوریې په جنوبي ولایت سویدا کې داسې مهال پیلیږي چې د دروزي او بدوی ډلو ترمنځ د فرقه ییز شخړې د پای ته رسیدو په موخه څو ساعته مخکې اوربند شوی وو.

د سویدا په دورزي میشته سیمه کې تاوتریخوالی دا څرګندوي چې په سوریه کې میشت لږکي د واکمن اسلامي حکومت پر وړاندې بې باوره دي.

سوري ځواکونه د دوشنبې په ورځ د دورزي او بدوي وسله والو ترمنځ د نښتې د کنټرول لپاره سویدا ولایت ته تللي وو، خو دغه ځواکونه اوسمهال له دروزی وسله والو سره په نښته اوښتي دي.

اسراییلي ځواکونو د دروزي وسله والو په ملاتړ د دوشنبې او سې‌شنبې په ورځو کې د سوریې پر حکومتي ځواکونو بمباري کړې ده.

دروزي لږکي چې د توحیدي مذهب، چې په یوولسمه پیړۍ کې رامنځته شوی، پیروان دي.

په سوریه کې د جګړې د څارونکې یو سازمان د راپور له مخې، د سویدا په وروستیو څو ورځو نښتو کې ۲۴۸کسان وژل شوي دي.

د افغانستان د کورنیو رسنیو د راپورونو له مخې په خوست ولایت کې د غلام خان بندر لار نن چهارشنبې د باروړونکو موټر پر مخ له اوږد ځنډ وروسته خلاصه شوې ده.

دغو رسنیو د طالبانو د سرحدي ځواکونو ویاند عابد الله فاروقي په خواله ویلي، "غلام خان لار د پنځلسو ورځو لپاره پرانیستل شوی ده".

فاروقي د لارې د لنډې مودې د پرانستل کیدو په اړه جزیات ورکړي نه دي.

د غلام خان بندر لار دوه اونۍ وړاندې د پاکستان له لورې د هر ډول تګ راتګ پر مخ تړل شوې وه.

د لامبو نړیوال فدراسیون اعلان کړی چې په ازادو اوبو کې د لامبو د نړیوالې اتلولۍ لوبې چې دوه ځله د اوبو د ککړتیا له کبله ځنډول شوې وې، نن چهارشنبه سنګاپور کې ترسره کیږي.

د فرانس پریس د راپور له مخې، په سیمه کې د "سنتوزا" ټاپو له اوبو څخه اخیستل شوې نمونې ښيي چې د اوبو کیفیت ښه شوی دی.

د لس کیلو مترۍ لمبا دغه سیالۍ چې ښځینه او نرینه لوبغاړي په کې ګډون کوي، په ځایي وخت له سهاره ماسپښین ته ځنډول شوې دي.

د اوبو کیفیت تېر کال د پاریس په المپیکي لوبو کې هم یوه ستونزمنه مسله شوې وه.

د اسلام اباد سترې محکمې، د سلګونه کورنیو له غوښتنې وروسته، د هغو کسانو د قضیو په اړه د دولتي څیړنې امر وکړ چې مقدساتو ته د سپکاوي په تور نیول شوي دي.

د محکمې قاضي اعجاز خان ویلي، دوی تر یوې میاشتې یو کمیسیون جوړوي او هغوی به د څلورو میاشتو په موده کې خپلې څیړنې بشپړې کړي.

د نیول شویو کسانو چې تر ډیره ځوانان دي، مدافع وکیلانو د محکمې دا حکم ستایلی او ویلې یې دي، کورنۍ اوس احساس کوي چې غږ یې اوریدل کیږي.

له ۲۰۲۲ کال راهیسې په پاکستان کې د هغو ځوانانو نیول زیات شوي چې په انلاین فعالیتونو په ځانګړې توګه وټس اپ کې مقدساتو ته په سپکاوي تورن شوي دي.

فرانسپریس لیکلي، د تیر کال اکتوبر میاشتې د یوه راپور له مخې، ۷۶۷ تنه پاکستان کې مقدساتو ته د سپکاوي په تور بندیان دي او محکمې ته انتظار دي.

مقدساتو ته سپکاوی د پاکستان د قانون له مخې داسې جرم دی چې مجرم یې د اعدام له سزا سره مخامخ کیږي.

د امریکا د متحدو ایالتونو د دفاع وزارت پرون اعلان وکړ چې لاس انجلس ته د ملي ګارد د دوه زره استول شویو سرتیرو ماموریت پای ته رسوي.

د ملي ګارد نژدې څلور زره سرتیري او ۷ سوه سمندري ځواکونه د جون په لومړیو کې وروسته تر هغه لاس انجلس ته واستول شول چې هلته د کډوالو د ځپنې پر ضد پاریدلې مظاهرې مهار کړي.

اسوشیتدپریس لیکلي، معلومه نه ده چې ولې د دغه شمیر سرتیرو دوه میاشتنی ماموریت پای ته ورسېد او په خبره یې دا معلومات هم نشته چې د ملي ګارد استول شوي پاته سرتیري به څه وخت له لاس انجلس نه وځي.

د پنټاګون ویاند شان پارنل ویلي، د دوی د ځواکونو له استولو سره لاس انجلس کې " ناقانونه کړنې" د کمېدو په حال کې دي.

وروسته له دې چې پولیسو د لاس انجلس په اکثره لاتین میشته سیمه کې پر کډوالو چاپې ووهلې، زرګونه مظاهره کوونکي سړکونو ته راووتل، یوه لویه لاره یې بنده او پولیسو سره په اخ او ډب واوښتل.

امریکایي چارواکي وایي، لاس انجلس کې یې د عملیاتو هدف د " ناقانونه کډوالو" نیول و، خو مظاهره چیان بیا حکومت د کډوالو په ځپلو تورنوي.

د امریکا ولسمشر ډونالډ ټرمپ وایي، د اوکراین ولسمشر ولودمیرزلنسکي باید پر مسکو برید ونه کړي.

د رویټرز د راپور له مخې، ټرمپ دا څرګندونې پرون خبریالانو ته وروسته تر هغه وکړې چې فایننشل ټایمز ورځپاڼې راپور ورکړ چې امریکایي ولسمشر خپل اوکراینی سیال روسیه کې ژورو بریدونو ته هڅولی دی.

د فایننشل ټایمز د راپور له مخې، ټرمپ له زلنسکي پوښتنه کړې چې ایا د امریکا له خوا د لرې واټن ویشتونکو توغندیو په ورکولو سره هغه کولی شي پر مسکو برید وکړي او که نه؟

کله چې خبریالانو په دې اړه له ډونالډ ټرمپه وپوښتل، هغه په ځواب کې همدا وویل چې"نه، زلنسکي باید پر مسکو برید ونه کړي" او په خبره یې د روسیې ولسمشر باید تر ۵۰ ورځو د اوربند یوې هوکړې ته غاړه کیږدي، که نه له بندیزونو سره به مخامخ شي.
امریکا په دې وروستیو کې له اوکراین سره د نویو پوځي مرستو ژمنه وکړه او پرون څرګنده شوه چې یو شمېر پاټرایت توغندي له جرمني اوکراین ته د لېږدېدو په حال کې دي.