د هلمند چارواکي وايي په څو ناامنو ولسواليو کې د وروستيو پوځي عملياتو له کبله شا و خوا دوه نيم سوه دولت-ضد وسله والو ته مرګ ژوبله اوښتې ده.

د هلمند والي نن مازيګر يوه کنفرانس ته وويل، وسله وال په نادعلي، ګرمسېر، ناوې ولسواليو او نورو سيمو کې له ماتې سره مخامخ شويدي.

حيات الله حيات وويل چې دغو ٢٥٠ وسله والو ته د دوو اوونيو په عملياتو کې مرګ-ژوبله اوښتې ده:

"د دښم ن د ٢٥٠ په شا و خوا کې وسلوال وژل شوي يا هم ټپيان دي، په دغو عملياتو کې زموږ ٥٠ تنه ځواکونه هم مړه يا ټپيان دي."

د تلفاتو دغه ارقام خپلواکو سرچينو نه دي تاييد کړي.

دغه کنفرانس ته د وينا پر مهال د لوى درستيز مرستيال ډګر جنرال مراد علي مراد د هلمند له وکيلانو، سياستوالو او نورو بانفوذو شخصيتونو غوښتنه وکړه چې د هلمند د روان وضعيت په کنټرول کې همکاري وکړي.

په وروستيو کې تر نادعلي ولسوالۍ وروسته په ناوې او ګرمسېر ولسواليو کې د جګړو راپورونه ورکول شوي دي.

د لوی اختر په درشل کې پرون د پروان د کرهنې، مالدارۍ او اوبولګولو ریاست خبر ورکړ چې د کانګو ناروغۍ له امله په دغه ولایت کې دوه تنو خپل ژوند له لاسه ورکړی دی او پنځلس تنه نور پرې اخته شوې دي.

دغهَ ریاست پرون دا راپور په داسې وخت کې ورکړ چې په کابل کې انتاني روغتون د تیرې یوې میاشتې په ترڅ کې د کانګو د سلو مشکوکو پیښو د ثتبدیو خبر ورکړ.

د انتاني روغتون مسوولینو په کابل کې رسنیو ته وویل چې د تیرکال په پرتله سږکال د کانګو پیښې له لسو تر پنځلس فیصدو پورې زیاتې شوې دي.

ډاکټران لارښوونه کوي چې د اختر په ورځو کې چې د شنبې په ورځ یې لومړۍ ورځ ده، د څارویو د حلالیدو پرمهال دې خلک دست کش په لاس کړي او ماسک دې وتړي.

کانګو یو ډول وژونکې ناروغي ده چې اخته کس په سخته تبه اخته کیږي او د پوزې له لارې یې ډیره وینه ورسره بهیږي.

د کانګو ویروس د څاروي په پوستکي یا د وړیو لاندې وي، دا ویروس پر حیواناتو اغیز نه کوي خو د حیوان د وینې له لارې انسان ته انتقالیږي او که په وخت یې تشخیص او درملنه ونه شي وژونکې ده.

د تاجکستان د اوبو او انرژۍ وزارت پرون هیله ښکاره کړه چې د کاسا زر پروژې چارې به د راتلونکي میلادي کال تر پایه بشپړې شي او پاکستان ته به زر میګاواټه بریښنا انتقال شي.

د کاسا زر پروژې چارې د افغانستان د جمهوري نظام پرمهال پيل شوې وې چې یو زر او ۳۰۰ میګاواټه برېښنا له قرغیزستان او تاجکستان څخه د افغانستان له لارې پاکستان ته انتقال شي. د شوي تړون له مخې د دې پروژې ۳۰۰ میګاواټه برېښنا به په افغانستان کې لګول کېږي او ۱۰۰۰ میګاواټه به یې پاکستان ته ټرانزيټ شي.

د جرمني د کورنیو چارو وزیر وایي، هیلمن دی چې اروپایي تولنه موافقه وکړي چې هغه رد شوي کډوال چې خپل هیواد ته نه شي تلی، اصلي هیواد ته څیرمه دریم هیواد ته واستول شي.

رویټرز اژانس پرون د جرمني د کورنیو چارو د وزیر الکساندر دوبریندت په وینا خبر ورکړ چې وایي، دریم هیواد ته د رد شویو کډوالو تګلاره هغه وخت اغیزمنه کیدای شي چې ټولې اروپا ته دا وړاندیز د منلو شي.

د جرمني صدراعظم فریدیښ میرز د فبروري تر انتخاباتو مخکې د انتخاباتي کمپاین پرمهال له خپل ولس سره ژمنه کړې وه چې له واک ته رسیدو سره سم به دا هڅه کوي چې د کډوالو کچه راټیټه کړي.

تر اوسه داسې دریم هیوادونه نه دې مشخص شوي چې دې ته چمتو وي چې کډوال ومني.

د افغانستان لپاره د ملګرو ملتونو ځانګړي راپور ورکوونکي ریچارډ بینټ یو ځل بیا د طالبانو له خوا د بدنۍ سزاوو پلي کیدل غندلي دي.

ښاغلي بینټ نن دوشنبې پر خپلې ایکس پاڼې/ پخواني ټویټر لیکلي، "طالبانو تیره اونۍ ۶۳ نارینه او څلور ښځې په عام محضر کې په درو وهلي دي".

بینټ له طالبانو غوښتي چې د دې سزاوو پلي کیدل په فوري ډول ودروي.

د ملګرو ملتونو راپور ورکوونکي د طالبانو له خوا د بدني سزاوو عملي کیدل له نړیوالو قوانینو سرغړونه یاده کې او ویلي دي چې په روان ۲۰۲۵ کال کې د دې سزاوو عملي کیدل د نورو کالونو پرتله زیات شوي دي.

بل پلو، په بدخشان کې د طالبانو سترې محکمې نن دوشنبې یو تن د الکولي مشروباتو په جرم په ۳۹درو او دوه کاله تنفیذي بند محکوم کړی دی.

د طالبانو د حکومت د کار او ټولنیزو وزارت د لوی اختر په مناسبت د راتلونکې اونۍ څلور ورځې عمومي رخصت اعلان کړی دی.

د هغه مکتوب پر بنسټ چې دې وزارت نن دوشنبې رسنیو ته استولی د روانې غبرګولي میاشتې له ۱۷مې تر ۲۰ مې په ټول افغانستان کې عمومي اعلان شوی دی.

د طالبانو حکومت د غبرګولي ۱۶مه عرفه او د شنبې ورځ د غبرګولي ۱۷مه لوی اختر اعلان کړی.

بل پلو، د عربستان په ګډون په ډیرو اسلامي هېوادونو کې پنجشنبې عرفه او جمعه د لوی اختر لومړی ورځ اعلان شوې ده.

په هند کې د سختو بارانونو او ځمکې ښویدونې له کبله ۳۴ کسان مړه شوي دي.

رویترز خبري اژانس نن دوشنبې د هندي چارواکو په حواله ویلي، د هند په شمال ختیځو سیمو کې د تیرو څو ورځو د سختو بارانونو او ځمکه ښویدلې له کبله ۳۴ کسان مړه او یو شمیر نور ټپیان شوي دي.

د چارواکو په خبره، د هیمالیا په سیکیم ایالت او شاوخوا نورو سیمو کې زرګونه سیلانیان بند پاتې چې د ژغورنې هڅې يې روانې دي.

چارواکو په راتلونکو څو ورځو کې د هند په شمال ختیځو سیمو کې د بارانونو له امله د ناڅاپي سیلابونو د راوتو او ځمکې ښویدنې خبرداری ورکړی دی.

بل پلو، د هند په ګاونډ بنګله دیش کې هم د سختو بارانونو له کبله د یوې کورنۍ څلور غړي مړه شوي دي.

د طالبانو د بهرنیو چارو وزارت اعلان کړی چې روسیې په رسمي ډول په مسکو کې د دوی د نوي سفیر نوماندي منلې ده.

دغه وزارت په یوه بیان کې ویلي چې په کابل کې د روسیې سفیر دیمیتري ژیرنوف د یکشنبې په ورځ د طالبانو د بهرنیو چارو وزیر امیر خان متقي ته په دې اړه یو یادښت وسپاره.

دا روښانه نه ده چې څوک به په روسیه کې د طالبانو د سفیر په توګه وټاکل شي.

که څه هم روسیه د طالبانو له رژیم سره ډیپلوماټیکې اړیکې لري، خو لا تر اوسه یې د نړۍ د نورو هیوادونو په څیر په رسمیت نه دی پیژندلی.

د افغانستان مشهورې سندرغاړې او د ښځو د حقونو فعالې اریانا سعید د داف باما د موسیقۍ له نړیوال فستیوال څخه دوه جایزې ترلاسه کړې.

اریانا سعید پرون ناوخته په خپل انسټاګرام پاڼه کې د جایزو اعلان وکړ او لیکلي یې دي: "نه یوازې د 'افغانستان د غوره هنرمندې' د جایزې ترلاسه کول بلکې د باما بشردوستانه جایزه هم یو ویاړ دی چې زه به کلونه پرې ویاړم."

هغې زیاته کړه چې په یاد فستیوال کې یې د افغانستان استازیتوب وکړ.

دا فستیوال د شنبې په ورځ، د مې په ۳۱مه، د جرمني په اوبرهاوسن کې د نړۍ د ګڼو هنرمندانو په ګډون ترسره شو.

د داف باما فستیوال د موسیقۍ نړیوال مراسم دي چې د مختلفو ملیتونو، ژبو او د موسیقۍ د بیلابیلو سبکونو هنرمندان ستايي.

د طالبانو د بهرنیو چارو وزیر امیرخان متقي په همدې موضوع د پاکستان له مرستیال صدراعظم او بهرنیو چارو وزیر اسحق دار سره نن خبرې کړي.

متقي د دې پرېکړې هرکلی کړی او هیله یې ښوولې چې له شارژدافیره د سفیر کچې ته د ډپلوماټیک ماموریت د لوړولو کارونه ژر بشپړ شي.

که څه هم پاکستان له لومړنیو هېوادونو وو چې د طالبانو ډپلوماټ یې ومانه خو لا د سفیر په کچه استازي نه لري بلکې دواړه هېوادونه ډپلوماټیکې چارې د چارسمبالي او شارژدافیر په مټ مخته بیایي.

اسحق دار هم دا پرېکړه ستایلې او ویلي یې دي چې په دې سره به په اقتصاد، امنیت او سوداګرۍ کې د پاک – افغان همکارۍ زیاتې شي.

یوې زلزلې چې شدت یې د ریښتر په کچه ۴ اعشاریه شپږ و، د تخار مرکز تالقان او شاوخوا سیمې لړزولي.

د ولکینو دیسکوري ویبپاڼې د راپور له مخې دغه زلزله تېره نیمه شپه ( د جوزا یولسمه) د تالقان ښار په ۴۴ کیلو متري واټن کې پیښه شوې.

تراوسه د زلزلې د احتمالي زیان په اړه څه نه دي ویل شوي.

د طالبانو د حکومت اړوندو چارواکو هم تراوسه په دې اړه څه نه دي ویلي.