د کابل چاپ نننیو ورځپاڼو خپل مطالب او تبصرې تر ډېره د پرونۍ خونړۍ حملې ویر او د دغې حملې په اړه راولاړو شویو پوښتنو او اندېښنو ته ځانګړي کړي دي.
سرخط
سرخط ورځپاڼې چې د پرونۍ حملې د ویر لپارهیې لومړی مخ له کوم مطلب پرته په تور رنګ چاپ کړی، په خپله سرمقاله کې لیکلي چې له پرونۍ حملې سره باید هوښیارانه چلند وشي.
په سرمقاله کې راغلي، پرونۍ حملې یو ځل بیا وښوده چې ترهګر د تیږې زړه لري او د بېګنا کسانو د وینو په توېیدو هم بند نهدي.
د سرمقالې لیکوال ویلي، پرونۍ حمله د ولس ترمنځ د نفاق او کرکې د رامنځ ته کولو لپاره وشوه، خو چارواکي او په تېره سیاسي ګوندونو او ځوانان باید دغه دسیسه شنډه او په هوښیارۍ سرهیې پر وړاندې چلند وکړي.
د ورځپاڼې په باور، لومړیتوب باید دا وي چې د پرونۍ پېښې ټپيانو ته رسیدهګي وشي او وینه ورکول شي.
کابل پوسټ
کابل پوسټ ورځپاڼې په سرمقاله کې لیکلي، حکومت د حملو د احتمال په اړه د مظاهرې پلانوونکو ته خبرداری ورکړی و، خو د مظاهرې مسئولینو یې پروا نهوه ساتلې.
په سرمقاله کې راغلي، هم د مظاهرې مسئولین ګرم دي چې خبرداري تهیې پام نهدی کړی او هم خپله امنیتي ځواکونه ملامت دي چې یوازې پر سر سري اقداماتو یې اکتفا کړې وه.
د کابل پوسټ په سرمقاله کې دا هم راغلي چې حکومت باید د قربانیانو له کورنیو څخه پوښتنه وکړي چې د کوم دلیل په مقابل کې یې تنکي ځوانان او حتی ماشومان مظاهرو ته بلل شوي و، د سرمقالې لیکوال ویلي، که چېرې د مظاهرې د رابللو دلیل منطقي نهوي، باید مسئولینیې محاکمه شي.
سرنوشت
سرنوشت ورځپاڼې بیا په خپله سرمقاله کې پوښتنه کړې چې پر لاریون د برید پړه د چا پر غاړه ده؟
په سرمقاله کې راغلي، دا زړه بوږنونکی برید هېڅ نهشي توجیه کېدای، خو داعش دښمن دی، وحشي دی او کار یې همدا دی چې پر ځمکه وحشت خپور کړي.
د سرمقالې لیکوال ویلي، د حملې پړه اول پر حکومت او په دویم قدم کې د مظاهرې په تنظیموونکو ده چې امنیتي شرایطیې نهوو درک کړي او دومره لویه مظاهرهیې رابللې وه.
انیس
انیس دولتي ورځپاڼې بیا په خپله سرمقاله کې لیکلي، په اوسنیو شرایطو کې د خلکو غوښتنو ته د رسېدو یوازنۍ لاره خبرې دي.
په سرمقاله کې راغلي، حکومت ډېره هڅه وکړه چې د روښنایي غورځنګ له مسئولینو سره خبرې وکړي، خو د سرمقالې لیکوال ویلي، د روښنایي غورځنګ مسئولینو دې خبرو ته پام ونهکړ او د نامحدوده مظاهرو په رابللو یې ټینګار وکړ.