نړۍ
د امریکا د مشرانو جرګې د ایران په اړه یوه لایحه وړاندې کړه

د امریکا د مشرانو جرګې د دواړو ګوندونو یو شمېر غړېو یوه لایحه وړاندې کړه چې پر اساس یې پر هغو کسانو بندیز لګول کېږي چې د ایران په توغندويي پروګرام کې لاس لري.
دا لایحه د امریکا له ولسمشره غواړي چې د ایران پر ضد د وسلو بندیز ولګوي.
دا لایحه چې پرون د مشرانو جرګې د بهرنیو اړیکو د جرګه ګۍ مشر او د جمهوري غوښتونکي ګوند غړي باب کورکر او مارکو روبیو د ډیموکراټ ګوند له غړېو رابرت مینیندزې او جو منچین سره په ګډه وړاندې کړه، د ایران له لوري د لر واټنه توغندو د پراختیا او له ایرانه او یا ایران ته د متعارفو وسلو د لېږد خلاف بندیزونه زیاتوي.
د دې لایحې هدف دا دی چې ایران ته د تروریستي ډلو د پر له پسې ملاتړ او دغه راز د لرواټنه توغندو د پروګرام د پرمخ بېولو په خاطر سزا ورکړای شي.
امریکا او لوېدیځ متحدان یې د ایران د لرواټنو توغندو پروګرام د ملګروملتو د بندیزونو سرغړونه بولي.
د ورځې تازه خبرونه دلته ولولئ
جرمني تیرکال نژدې درې لکه کډوالو ته تابعیت ورکړی

جرمني په ۲۰۲۴کال کې د ریکارډ په کچه کډوالو ته د دې هېواد تابعیت ورکړی دی.
د جرمني د احصايې فډرال ادارې نن سه شنبې اعلان وکړ چې دغه هېواد تیرکال ۲۹۱زره کډوالو ته تابعیت ورکړی دی چې د ۲۰۲۳کال پرتله ۴۶سلنه زیاتوالی ښيۍ.
د اعلان له مخې د نوي تابعیت ترلاسه کوونکې تر ډیره سوریایان دي.
په جرمني کې میشت درې سلنه افغانانو هم تیرکال د دې هېواد تابعیت ترلاسه کړی دی.
د تابعیت په قانون کې اصلاحات د دې زیاتوالي عمده لامل بلل شوی دی.
د جرمني حکومت د ۲۰۲۳کال په جون میاشت کې د تابعیت اخیستو لپاره د استوګنې شرط له اتو کلونو څخه پنځو کلونو ته راکم کړ او ان درې کالونه يې د ځانګړو مواردو لپاره ټاکلي وو.
که څه هم تیرکال ډیرو کډوالو د جرمني تابعیت ترلاسه کړی خو د جرمني نوی ایتلافي حکومت غواړي بیرته دغه اصلاحات راونغاړي او د تابعیت لپاره د لږ تر لږه پنځه کلن انتظاره موده بیرته رامنځته کړي.
په اتریش کې د یوه ښوونځي دننه په ډزو سره لږ تر لږه ۹ کسان وژل شوي

پولیسو تایید کړې چې پېښه نن په ګراز ښار کې شوې او یوه زده کوونکي دا برید ترسره کړی دی.
د پولیسو په خبره ګڼ کسان ټپيان هم دي چې زده کوونکي او ښوونکي په کې شامل دي.
زده کوونکي او معلمین له ښوونځي ایستل شوي دي.
په اتریش کې داسې پېښې ډېره سابقه نه لري.
یواځې تېره فبروري میاشت د اتریش په جنوب کې یوه بریدګر د چاقو په ګوزارونو سره لږ تر لږه یو کس وواژه او ۵ نور یې ژوبل کړل.
د اسراییلو سمندري ځواکونو په یمن کې د حدیده پر بندر برید کړی دی

د اسراییلو سمندري ځواکونو د لومړی ځل لپاره په یمن کې پر حدیده بندر بریدونه کړې دي.
د اسراییلو پوځ نن سه شنبې ویلي، بریدونه د سمندري ځواکونو توغندي ویشتونکو کښتو کړي دي.
د یمني حوثیانو په واک کې د "المسیره" په نوم یو خبري شبکې هم پر حدیده بندر د بریدونه خبر ورکړی خو په اړه ډیر جزیات خپاره کړې نه دي.
له دې وړاندې اسراییلو د دوشنبې په شپه په انلاین توګه په سیمه کې میشتو یمني وګړو ته خبرداری ورکړی و چې د راس عیسی، حدیده او الصلیف بندرونو څخه ووځي.
د ایران له ملاتړه برخمن د یمن حوثیانو د حماس وسله والې ډلې په ملاتړ په ځلونو پر اسراییلو د توغندیو او بې پیلوټه الوتکو بریدونه کړې دي.
امریکا متحده ایالتونه و اروپايي ټولنه حماس ډله د یو ترهګریز سازمان په توګه پیژني.
د حدیدي بندر له ۲۰۱۴کال راهیسې له کله چې حوثیانو د یمن پلازمینه صنعا نیولې ده، په میلیونو یمني وګړو ته د بشري مرستو د رسولو تر ټولو مهمه لاره ده.
مکسیکو د لسګونو میلیونو ډالرو په ارزښت مخدر مواد نیولي

د مکسیکو حکومت وویل چې دوی د مخدره توکو په لابراتوارونو باندې د چاپو په ترڅ کې له ۵۰ ملیونه ډالرو څخه د ډیر ارزښت میتامفیتامین نیولې دي.
د چارواکو په وینا دا مخدر مواد دوه څلویښت ټنه دي.
دا اعلان په داسې حال کې کیږي چې د فرانس پریس اژانس د راپور له مخې د لاتینې امریکا دغه هیواد د مخدره توکو د قاچاق د مخنیوي لپاره د متحده ایالاتو د ولسمشر ډونالډ ټرمپ له زیاتیدونکي فشار سره مخامخ دی.
د مکسیکو حکومت د دوشنبې په ورځ په یوه بیان کې وویل چې مخدره توکي د لویدیځ ایالت میچواکان په پنځو ځایونو کې د عملیاتو په ترڅ کې نیولې دي.
روسیې او اوکراین ځوان نیول شوي سرتیرې تبادله کړل

روسیې او اوکراین د دوشنبې په ورځ (د جون په ۹مه) په څو بسونو کې له ۲۵ کلونو څخه کم عمره جنګي اسیران تبادله کړل.
دا یوه لویه تبادله ده چې په استانبول کې د تیرې اونۍ د خبرو اترو په پایله کې د یوې موافقې پر بنسټ دوام لري.
روسي چارواکو کییف تورن کړی و چې د جنګي اسیران تبادلې ته زړه نه ښه کوي او د پوځیانو جسدونه نه ورسپاري. دوی ویلي چې روسیې دمخه اوکراین ته د ۶۴۰ بندیانو لیست چمتو کړی دی، چې ټپیان، سخت ناروغه او ځوانان لومړیتوب لري ترڅو د تبادلې پروسه پیل کړي.
اوکراین د جنګي اسیرانو د تبادلې په برخه کې د روسیې تورونه رد کړې دي.
پرتګال د ملتونو جام وګاټه؛ د رونالډو لپاره د احساساتو ډکه بریا

پرتګال د اروپايي ملتونو د فوټبال اتلولي وګټله.
د اروپايي ملتونو د فوټبال د لیګ پایلوبه د پرتګال او هسپانیې تر منځ د یکشنبې په شپه د مونیخ په الیانز ارینا سټډیوم کې وشوه.
دا لوبه په ټاکلو نوي دقیقو کې ۲ – ۲ مساوي شوه او په اضافي وختونو کې هم پایله همداسې پاتې شوه.
دا په زړه پورې لوبه بالاخره پنالټي شوټونو ته ورسېده چېرته چې پرتګال وتوانېد ۵ پر ۳ خپل سیال مات کړي.
دا د اروپايي ملتونو د فوټبال په لیګ کې د پرتګال د ملي ټیم دویم وار اتلولي وه.
د یکشنبې شپې په لوبه کې د هسپانیې لپاره مارتین زوبیمیندي او میکل اویارزابل ګولونه ووهل.
د پرتګال لپاره نونو میندیز لومړی ګول ترسره کړی وو او دویم ګول د نړۍ وتلي فوټبال کریستیانو رونالډو په ۶۱مه دقیقه کې ترسره کړ.
جرمني کې پولیسو یوه بریدګره ښځه ووژله

د جرمني پولیسو یوه ښځه وروسته له هغه په مونیخ ښار کې په ډزو وویشتله چې په دوو نورو کسانو یې د چاقو حمله کوله.
دې دېرش کلنې ښځه وروسته په روغتون کې ساه ورکړې.
د جرمني خبري اژانس ډي پي اې راپور ورکړ چې د شنبې په ورځ دې ښځې په ترزینویزه سیمه کې پر یوه سړي او یوې ښځې د چاقو حمله وکړه.
د بایرن ایالت د پولیسو ویاند وویل چې د بریدګرې ښځې له خوا دا سړی او ښځه سطحي ژوبل شوي.
د برید انګېزه لا روښانه نه ده.
د اروپايي ملتونو د فوټبال پایلوبه کې هسپانیه او پرتګال سره مخ دي

هسپانیه او پرتګال به نن شپه د اروپايي ملتونو د فوټبال اتلولۍ لیګ پایلوبه کې سره مخ شي.
دا په زړه پورې لوبه د افغانستان په وخت د شپې په ۱۱:۳۰ بجو پیلیږي.
تر لوبې مخکې ګڼو خلکو د فوټبال له وتلي ستوري کریستیانو رونالډو سره د ځوان او تکړه لوبغاړي لامین یامال د مخ کېدو په اړه څرګندونې او مقایسې کړي دي.
رونالډو بیا په یوه کنفرانس کې وویل چې پر لامین باید د خلکو زیات فشار نه وي او هغه پرېښودل شي چې خپله لوبه وکړي ځکه ډېر استعداد لري.
فرانسه او جرمني به هم د دریم مقام لپاره سیالي وکړي.
د دوی لوبه بیا د افغانستان په وخت د ماښام په پنځه نیمو پيلیږي.
کلفورنیا کې د کډوالو د نیولو ضد مظاهرې په تاوتریخوالي اوښتي

د امریکا ولسمشر ډونالډ ټرمپ پرون شنبه په کلفورنیا ایالت کې د کډوالۍ د قوانینو ضد پراخو مظاهرو د کنټرول لپاره د ملي ګارد دوه زره سرتیري واستول.
اسوشیتید پریس خبري اژانس لیکلي چې د کلفورنیا په لاس انجلس ښار کې دویمه پرله پسې ورځ هم خلکو مظاهره وکړه.
دغه مظاهرې د جمعې په ورځ وروسته له هغه پيل شوې چې د امریکا د کډوالۍ او ګمرک ادارې کارکوونکو ۴۴ تنه د کډوالۍ نړیوالو قوانینو د سرغړونې په تور په یو لړ عملیاتو کې ونیول.
په خپرو شویو ویډیوګانو کې ښکاري چې پولیس له مظاهره چیانو سره په شخړه اوښتي او د هغوی په ضد اوښکې بهونکی ګاز کاروي.
په امریکا کې د کډوالو نیول داسې مهال پیل شوي چې د ډونالډ ټرمپ اداره غواړي د خپلو ټاکنیزو کمپاینونو هغه ژمنه پر ځای کړي چې د کډوالو د ډله ییز اخراج په اړه یې کړې وه.
غزه کې تازه ۳۶ فلسطینیان او یو لوړپوړی اسلامپاله مشر اسد ابو شریعه وژل شوی دی

د غزې د مدني دفاع په نوم یوه ځایي بنسټ ویلي چې اسراییلي سرتیرو پرون ۳۶ تنه فلسطینیان وژلي دي.
فرانس پریس خبري اژانس د شنبې په ورځ د دغه بنسټ په حواله ویلي، شپږ تنه هغه مهال په ډزو ووژل شول چې د امریکا له ملاتړه برخمنې یوې موسسې له خوا د مرستو اخیستو ته راټول شوي وو.
د اسراییل پوځ فرانس پریس ته ویلي، د دوی سرتیرو په رفح کې هغه مهال مرستې ته په راټولو شویو زرګونه کسانو " اخطاریه ډزې " وکړې چې د دوی سرتیرو د خطر احساس وکړ.
غزه کې د نورو وژل شویو فلسطینانو په اړه خبر کې جزیات نه دي ورکړل شوي.
د اسراییل پوځ د شنبې په ورځ ادعا وکړه چې د غزې په عملیاتو کې يې د اسد ابو شریعه په نوم حماس ته د یوې نژدې اسلامپاله ډلې مشر وژلی دی.
د روسیې تاس خبري اژانس بیا لیکلي چې حماس د ابو شریعه وژل تایید کړي دي.
حماس چې د ۲۰۲۳ کال د اکتوبر په ۷مه یې پر اسراییلو پراخ برید وکړ او له کبله یې د غزې جګړه پيل شوه، د امریکا او اروپایي ټولنې له خوا د ترهګرو په توګه پیژندل کیږي.