د اروپا د جام د لوبو په لړۍ کې نن شپه درې لوبې په پام کې دي.
لومړۍ لوبه د انګلستان او ویلز ترمنځ د کابل په وخت د مازیګر په پنځه نیمو بجو، دوهمه لوبه د اوکراین او شمالي ایرلنډ ترمنځ د شپې په اته نیمو بجو او دریمه لوبه د جرمني او پولنډ ترمنځ د شپې په یوولس نیمو بجو په پام کې دي.
د اروپا د فوټبال د ملي ټیمونو د دوهمو لوبو لړۍ پرون پیل شوه او تر دې دمه یوازې فرانسې له دوو بریاوو وروسته شپږ امتیازونه ګټلي دي.
د فرانسې دوهمه لوبه له البانیا سره وه چې دوه د صفر په وړاندې یې ترې وګټله.
په نورو لوبو کې: روسیې چې لومړنۍ لوبه یې له انګلستان سره یو د یو په وړاندې مساوي کړې وه، تېره شپه د سلواکیا په وړاندې دوه د یو په وړاندې ماتې وخوړه.
همدا راز سویس چې خپله لومړۍ لوبه یې یو د صفر په وړاندې له البانیا څخه ګټلې وه، د تېرې شپې په لوبه کې له رومانیا سره یو د یو په وړاندې مساوي پاتې شو.