انترنشنل بیزنس ټایمز ورځپاڼې لیکلي چې په روان ۲۰۱۶ میلادي کال کې به د افغانستان د زعفرانو حاصل ۴ ټنو ته ورسېږي.
د ورځپاڼې له مخې، افغان چارواکي وايي چې کروندګر به ۴ زره کېلو زعفران تولید کړي او د کوکنارو ځای به پرې ونیسي.
دوی هیله لري زعفران چې اوس یې کښت په افغانستان کې مخ پر زیاتېدو دی، په ټول هېواد کې دود شي.
چارواکي وايي چې دوی د زعفرانو د حاصل زیاتېدو اټکل د تېر کال تولید ته په پام کوي.
انترنشنل بیزنس ټایمز د متخصصانو په قول وايي چې د زعفرانو د تولید زیاتېدا به نه یوازې افغان کروندګر وهڅوي چې د کوکنارو له کرلو لاس واخلي بلکې له افغانستان سره به هم مرسته وکړي چې په ځان د بسیا کېدو لور ته نېږدې شي.
دغه راز به د افغانستان صادرات ډېر کړي.
ابزرور:
د بریتانیا ابزرور ورځپاڼې د ترکیې او یونان ترمنځ د اوبو په خطرناکو لارو اروپا ته د افغانانو د مهاجرت په اړه لیکنه خپره کړې.
ورځپاڼې د فیروز مظفري کیسه خپره کړې چې له کابله ترکیې ته ځي او هره ورځ خپل ورور فرید ته د ټلیفون له لارې د خیریت حال ورکوي.
تر هغې شېبې پوري چې مظفري په یوه کوچنۍ بېړۍ کې سپرېږي او له ترکیې د یونان په لوري خوځېږي. ورور یې د انتظار او ډار شېبې شمېري خو دوستان ورته وايي چې ممکن د مظفري د ټلیفون چارج خلاص شوی وي.
بالاخره څرګندېږي چې د مظفري بېړۍ په اوبو کې ډوبېږي د کورنۍ ۱۱ نور غړي یې هم په اوبو کې ډوبېږي.
اندي پندنټ:
اندیپندنټ ورځپاڼې د یوې ښځې له لوري د طالبانو د یوه قوماندان د وژل کېدو راپور خپور کړی دی.
ورځپاڼه د افغان پولیس چارواکو او د والي د ویاند په قول وايي چې دا پېښه د تخار ولایت په خواجه بهاالدین کې شوې ده.
دوی ویلي چې طالب قوماندان غوښتل چې یوه کور ته ننوځي خو څرنګه چې په خپل سر د چا کور ته د نارینه ننوتل د افغاني دود خلاف عمل دی، ښځې قوماندان وویشت او ویې واژه.
ورځپاڼې د قوماندان نوم نه دی ښودلی.
نیویارک ټایمز:
نیویارک ټایمز ورځپاڼې د هلمند په اړه لیکنه خپره کړې.
ورځپاڼې د هلمند د وضعیت د څېړلو ترڅنګ د عبدالجبار قهرمان څرګندونې رااخیستي چې په هلمند کې د افغان امنیتي ځواکونو همږغي په غاړه لري.
قهرمان وايي چې په هلمند کې دې نتیجې ته رسېدلی چې سوله د جګړې له لارې نه شي راتلای.
قهرمان وايي، هیله لري چې په هلمند کې به بدلون راوړي.
ده وویل، د هیلې یو علت یې دا پښتو شعر دی:
چې غوټې پسې وهې په لاس به درشي
چا ویل چې په دریاب کې ګوهر نشته.