د استرالیا د پلازمېنې کانبیرا والي د افغانستان د کرکټ له ټیم څخه د خپل هېواد ملاتړ اعلان کړ.
استرالیا ته د ازادۍ راډیو د استول شوي خبریال د راپورله مخې د کانبیرا والي پرون د افغانستان د کرکټ له ملي ټیم سره په کتنه کې په دې اړه خبرې وکړې.
د افغانستان د کرکټ ملي ټیم د نړېوال جام په لوبوکې د ګډون لپاره استرالیا ته رسېدلې ده.
دا لوبې د شنبې په ورځ پیل شوې او په پام کې ده چې افغان لوبډله خپله لومړۍ لوبه د چارشنبې په ورځ له بنګلدېش سره وکړي.
د نړېوال جام د لوبو په لړۍ کې ټاکل شوې ده چې نن په بي ګروپ کې ایرلنډ او ویسټ انډیز لوبه وکړي.
پرون د اې ګروپ په سیاليو کې جنوبي افریقا او زیمبابوې لوبه وکړه چې په نتیجه کې یې جنوبي افریقا زیمبابوې ته د ۱۱۲ یوسل او دولسو منډو په توپیر ماتې ورکړه.
همدا راز د بي ګروپ په بله سیالي کې چې د هند او پاکستان ترمنځ وه، لوبه د اوه شپېته منډو په توپیر پاکستان وبایلله.
د کرکټ د نړېوال جام لوبې چې په استرالیا او نیوزیلنډ کې ترسره کېږي او څوارلس ټیمونه ګډون په کې لري، شپږ اونۍ دوام کوي.