Украинанын Запорожье облусунда 11-январдын таңында Орусиянын дрон чабуулунан бир аял мүрт кетти. Бул тууралуу облус администрациясынын башчысы Иван Фёдоров маалымдады.
Анын сөзүнө караганда, учкучсуз учак беш адам кетип бараткан автоунаага тийген. Анын кесепетинен 47 жаштагы аял окуя болгон жерден каза болуп, калган төрт киши ооруканага жеткирилген. Алардын биринин абалы оор деп бааланууда.
Украинанын Аскердик-аба күчтөрү орус армиясы түн ичинде 74 учкучсуз учак учурганын билдирди. Алардын 47си он бир аймактан атып түшүрүлгөн. Орусиянын Коргоо министрлиги Украинага жасалган аба чабуулдарына комментарий берген жок.
Майдандан бир нече чакырым турган Запорожьеге орус аскерлери утур-утур сокку уруп келет. Жаңы жылдын түнүндө да калаа аткыланган.
Орус армиясынын 8-январдын кечинде Запорожье шаарындагы аба чабуулунан кеминде 13 кишинин өмүрү кыйылган, жараат алгандардын саны 100дөн ашкан.
Далилдерге карабай, Орусия кошуна өлкөсүнүн карапайым адамдары, оорукана, бала бакча, энергетика объектилери өңдүү жарандык жайлары бутага алынганын танат.
Кошмо Штаттардын жаңы шайланган президенти Дональд Трамп Орусиянын лидери Владимир Путин менен жолугушууга даярдык жүрүп жатканын билдирди. Ал жолугушуу качан болорун тактаган жок.
"Ал жолуккусу келип жатыптыр. Биз даярдык көрүүдөбүз", - деди шайланган президент. Ал ошондой эле Путин өз каалоосун ачык айтканын кошумчалады.
"Биз бул согушка чекит коюшубуз керек", - деди Трамп Флоридадагы Мар-а-Лаго резиденциясында республикачыл губернаторлор менен кездешүү алдында журналисттердин суроолоруна жооп берип жатып.
Кремль азырынча Трамптын билдирүүсүнө комментарий бере элек. 8-январда Кремлдин маалымат катчысы Дмитрий Песков Путин Трамптын байланышка чыгуу ниетин кубаттай турганын, бирок азырынча эч кандай сунуш түшө электигин айткан.
Песков Трамптын расмий кызматка киришүүсүн күтө туруу керектигин кошумчалаган.
Трамп былтыр шайлоо өнөктүгү маалында кызматка киришкенден кийинки 24 саатта Украинадагы согушка чекит коёрун билдирген. Эми ал жакынкы алты ай ичинде аскердик аракеттерди токтото аларына үмүттөнүп жатканын айтууда.
“Бул алты айдан эртерээк деле болот деген үмүттөмүн”, - деди Трамп 7-январдагы маалымат жыйынында журналисттердин суроолоруна жооп берип жатып.
Буга чейин Украинанын президенти Владимир Зеленский Дональд Трамптын "күтүүсүз, болжолдоого мүмкүн болбогон мүнөзү" Орусия менен согушка чекит коюуга жардам бериши ыктымал экенин билдирген.
"Трамптын мүнөзү абдан күчтүү, ал күтүүсүз, болжолдоого мүмкүн эмес чечимдерге бара алат. Мен анын дал ушундай мүнөзүн Орусияга карата колдонушун абдан каалайт элем", - деген украин президенти 2-январда.
Кошмо Штаттардын жаңы шайланган президентинин Украина жана Орусия боюнча чабарманы болуп дайындала турган атайын өкүлү Кит Келлог Дональд Трамп согушту токтотуу маселесинде Киевдин кызыкчылыгын эске алып, адилеттүү чечим кабыл алынышын көздөй турганын жана куралдуу жаңжалга 100 күндүн ичинде чекит коюларын айткан.
Москва Украинага согуш ачкандан бери фронтто Орусия тарапта согушкан 88 миңден көп аскер набыт болгонун журналисттер такташты. "Би-Би-Синин" орус кызматы жана "Медиазона" басылмасы ыктыярчылар менен биргеликте жүргүзгөн эсепке ылайык, орус армиясы согушта алты миңден көп тандалма аскеринен ажырады. Бул категорияга журналисттер аба-десанттык бөлүктөрдү, деңиз аскерлерин, Коргоо министрлигине жана Росгвардияга караштуу атайын бөлүктөрдү, аскер учкучтарын киргизишкен. Алардын арасынан баарынан көп жоготууга аба-десанттык бөлүктөр учураган.
Андан тышкары Башкы штабдын негизги башкармалыгына (ГРУ) караштуу атайын кызматтын 580 аскери окко учкан. Алардын ар бир бешинчиси офицер болгон. "Би-Би-Си" белгилегендей, бул бөлүктүн аскерлерин даярдоого бир нече жыл сарпталат.
Ошондой эле кеминде 267 учкучтун өмүрү кыйылганы аныкталды. Журналисттер бул маалыматтарды ачык булактардан, көрүстөндөрдөн, жарыяланган некрологдордон топтошкон. Алар согушта өлгөндөрдүн реалдуу саны мындан алда канча жогору экенин белгилешет. Анткени соңку айларда набыт болгондордун сөөгү дагы эле согуш талааларында жаткан болушу мүмкүн.
Москва менен Киев согуштагы жоготуулары тууралуу так маалымат берүүдөн карманып келишет.
Буга чейин "Медиазонанын" жана "Би-Би-Синин" орус кызматынын жардамы менен "Азаттык" Украинадагы согушта өлгөн теги кыргызстандыктардын аты-жөнүн тактаган.
АКШ Украинага 500 миллион долларга жакын аскердик жардам берилерин жарыялады. Бул тууралуу Пентагондун башчысы Ллойд Остин бейшембиде Киевдин өнөктөштөрүнүн Германиянын “Рамштайн” базасында өткөн жыйында билдирди.
Министр жаңы пакетке “Украинанын абадан коргонуу системасы үчүн ракеталар, көбүрөөк ок-дары, аба-жер системасынын ракеталары жана украиналык F-16 учактарын колдоо үчүн башка жабдыктар кирерин” айтты.
“Украинанын эркин жана коопсуз жашоосу, адилет дүйнө орнотуу үчүн бар аракет көрүүгө жигердүүбүз. Биздин биргелешкен аракетибиз уланууга тийиш”, - деп билдирди Остин.
Бул - АКШда шайланган президент Дональд Трамптын бийликке келүүсү алдында Рамштайн форматындагы акыркы жыйын болду. Ага украин президенти Владимир Зеленский да катышты.
Украинаны коргоо боюнча контакт тобу 2022-жылы АКШнын эгидасы менен Киевге берилген аскердик жардамды координациялоо үчүн түзүлгөн. Ага 50дөн ашуун мамлекет кирет, басымдуусу НАТОнун мүчөлөрү.
Трамп согушка чекит коюуга убада кылганы менен Киевге берилген жардамдын көлөмүн сындап келатат. Урушту токтотуу планынын чоо-жайын да жарыялай элек.