Борбордук шайлоо комиссиясынын саат 23:00гө карата маалыматы боюнча, шайлоонун алдын ала жыйынтыгы дээрлик 98% белгилүү болду.
Бул маалыматка караганда, бүгүнкү парламенттик шайлоодо “Биримдик” партиясы добуштардын 24,53%, “Мекеним Кыргызстан” 23,9%, “Кыргызстан” 8,74%, “Бүтүн Кыргызстан” 7,09% алып, жети пайыздык босогодон өттү.
“Мекенчил” партиясында добуштардын 6,85%, “Республикада” 5,81%, “Ата-Мекенде” 4,04%, “Ыйман нурунда” 3,35%, “Бир Болдо” 3,03%, “Чоң казатта” 2,33%, “Замандашта” 2,15%, “Социал-демократтарда” 2,12%, “Реформада” 1,63%, “Мекен ынтымагында” 0,63%, “Ордодо” 0,22% жана “Ооганстан согушунун ардагерлери жана ушул сыяктуу кагылышууларга катышкандардын саясий партиясында” 0,17%.
Добуш бергендердин 1,8% баарына каршы добуш беришти.
"Республика" партиясынын кайрылуусу
"Республика" партиясынын өкүлдөрү 4-октябрдагы парламенттик шайлоонун баштапкы жыйынтыгы күмөндүү деп эсептейт. Шайлоонун алдын ала жыйынтыктары жарыялангандан кийин аталган партия лидери Мирлан Жээнчороев, талапкерлер Алтынай Өмүрбекова жана Руслан Казакбаев журналисттерге маалымат беришти.
Алар шайлоодо мыйзам бузуулар орун алганын айтышты. Шайлоонун алдын ала жыйынтыгы күмөндүү экенин, партия аны тааныйбы же жокпу бардык добушканалардан протоколдор келип, акыркы маалымат чыккандан кийин жарыялай турганын билдиришти.
Партия лидери Мирлан Жээнчороев бүткүл республика боюнча добуш сатып алуу, административдик ресурс колдонуу, шайлоочуларды ташуу, добуш берүү эрежесинин бузулганы боюнча фактылар тиешелүү органдарга жибериле турганын айтты.
"Эбегейсиз, массалык түрдө акча таратуу боюнча фактыларды айтып атышат. Алардын баарын БШК менен укук коргоо органдарына жиберебиз", - деди Жээнчороев.
Борбордук шайлоо комиссиясынын алдын ала маалыматына караганда, бүгүнкү парламенттик шайлоодо ат салышкан 16 партиянын төртөө гана босого чектен өтүштү.
“Биримдик” партиясы добуштардын 24,53%, “Мекеним Кыргызстан” 23,9%, “Кыргызстан” 8,74%, “Бүтүн Кыргызстан” 7,09% алып, жети пайыздык босогодон өттү. “Мекенчил” партиясында добуштардын 6,85%, “Республикада” 5,81%, “Ата-Мекенде” 4,04%, “Ыйман нурунда” 3,35%, “Бир Болдо” 3,03%, “Чоң казатта” 2,33%, “Замандашта” 2,15%, “Социал-демократтарда” 2,12%, “Реформада” 1,63%, “Мекен ынтымагында” 0,63%, “Ордодо” 0,22% жана “Ооганстан согушунун ардагерлери жана ушул сыяктуу кагылышууларга катышкандардын саясий партиясында” 0,17%. Добуш бергендердин 1,8% баарына каршы добуш беришкен.