Орусиянын Хабаровск шаарында иштеген кыргызстандык айдоочулар ОМОНдун зомбулугуна кабылганына арызданышууда. «Азаттыкка» кайрылган жарандар 80 чакты кыргызстандыкты 12-декабрдын кечинде күч кызматкерлери автопарктан алып кетип, 3-4 саат бою ур-токмокко алганын айтышты. Хабаровсктогу консул Кадырбек Мырзабаев 17 жарандан арыз түшкөнүн тастыктады. «Азаттыктын» өзбек кызматы дагы 20дай өзбекстандык ушундай эле арыз менен кайрылганын маалымдады.
