Жанар Акаев: Кечээ түйүнчөгүн түйүп, кайсы өлкөгө качсам деп тургандардын бүгүн үнү катуу чыгып калыптыр. Криминалга каршы күрөш жарыялаш керек. Депутаттарды коркутуп жатса, бул эмне деген шумдук? Эртеңден баштап криминалга каршы согуш жарыялаш керек. Азыр жаштарды камап атышат. Темирлан Султанбековдун күнөөсү жок. Аларды камаса, аянттагы 20 миң кишинин баарын камасын. Алар жакшы үмүт менен чыгышкан. Ортодон бийликти көксөгөндөр аралашып кеткенин аңдабай калдык.
Дастан Бекешев: Криминалга каршы күрөш жарыялагыла. Саясий куугунтук токтосун. Бүгүн мен кудайга тобо деп турам. Мени кудай сактаган экен. Строковага окшоп кошулуп алсам эмне болмок?
Айнура Осмонова: Башаламандыкка жол бергендер жазалансын.
Жогорку Кеңештин жаңы шайланган төрагасы Канатбек Исаев президент Сооронбай Жээнбековдун кызматтан мөөнөтүнөн мурда кетишин колдобойт. Бул тууралуу Исаев парламенттин кезексиз жыйынында билдирди. Анын айтымында, учурда өкмөт башчынын шайланышы боюнча мыйзамдык маселелер жаралууда.
“Ушундай учурда президент кетсе Жогорку Кеңештин төрагасы анын милдетин кантип аткарат? Биздин мөөнөтүбүз бүтүп бара жатат. Ошол себептен биз консенсуска барып президенттен суранышыбыз керек. Туруктуулук, мыйзамдуу нукка кайтуу өкмөттү түзүү гана эмес, бул - шайлоону өткөрүү, мыйзамдарды толук кандуу иштетүү, укук коргоо органдарын калыбына келтирүү. Ошондуктан, стабилдүүлүк орногон соң балким президент бул маселеге кайтып келээр”, - деди Исаев.