Алтынчы чакырылыштагы Жогорку Кеңештин Конституциялык мыйзамдар, мамлекеттик түзүлүш, сот-укуктук маселелери жана Жогорку Кеңештин регламенти боюнча комитети 16-октябрдагы жыйында шайлоо мыйзамына сунуш кылынган өзгөртүүлөрдү биринчи окуудан өткөрдү.
Документти жалпы жыйындын кароосуна жөнөттү. Бул тууралуу парламент депутаты, аталган комитеттин мүчөсү Айнуру Алтыбаева «Азаттыкка» билдирди.
Комитет мүчөлөрү парламенттин бүгүнкү чечими менен Бишкекте өзгөчө абал режими жоюлганына байланыштуу «Президентти жана Жогорку Кеңештин депутаттарын шайлоо жөнүндөгү» конституциялык мыйзамга сунуш кылынган өзгөртүүлөрдү караганы белгилүү болду.
Буга чейин парламенттеги Алтынбек Сулайманов баш болгон бир катар депутаттар шайлоо босогосун 7 пайыздан 3 пайызга төмөндөтүү, 5 миллион сомдук күрөөнү 1 миллион сомго чейин азайтуу жана форма №2 тартиби менен добуш берүү ыкмасын жокко чыгаруу боюнча өзгөртүүлөрдү аталган мыйзамга киргизүүнү сунуш кылган.
Азыркы мыйзам боюнча Кыргызстанда парламентке өтүш үчүн шайлоого катышкан партиялар жалпы добуштардын жети пайызынан көбүн алышы зарыл. 4-октябрдагы кезектеги парламенттик шайлоодо мындай чектен 16 партиянын төртөө гана өтө алган. Эртеси күнү Бишкекте башталган нааразылык акциясынан кийин башталган жапырт тополоң өлкөнү саясий кризиске алып келген.
Депутат Алтыбаева премьер-министрди тарапкерлерин таратууга чакырды
Бүгүн, 16-октябрда «Ала-Арча» мамлекеттик резиденциясында президенттин кызматтан кетишине байланышкан маселе каралган жыйында сөз сүйлөгөн парламент депутаты Айнуру Алтыбаева учурда президенттин милдетин аткара баштаган премьер-министр Садыр Жапаровго кайрылып, Бишкекте топтолгон тарапкерлерин үйлөрүнө таратууга чакырды.
Депутат ар кайсы аймактардан аялдардан кайрылуулар болуп жатканын айтып, митингге чогулгандар тарашы керек деп эсептейт.
14-октябрда президенттин жарлыгы менен өкмөт башчылыкка бекитилген Садыр Жапаровдун тарапкерлери бүгүн да Өкмөт Үйүнүн алдында топтолушту. Чогулгандар журналисттерге парламенттин жыйынына байланыштуу Жапаровду колдоо максатында келгенин билдиришти.
Алар 14-15-октябрда Бишкектеги Эски аянтта, «Ысык-Көл» мейманканасынын алдында митинг өткөрүшүп, анда ар кандай талаптарды айтышкан.
4-октябрдагы парламенттик шайлоонун жыйынтыгына каршы нааразылык акциясынан кийин Кыргызстанда саясий кризис курчуп кеткен. Бишкекте ошондон бери митингдер дээрлик токтой элек.