Жээнбеков Жапаровду жана өкмөттү дайындоо тууралуу жарлыкка кол койду
Президент Сооронбай Жээнбеков өкмөт башчысын жана мүчөлөрүн дайындоо тууралуу жарлыкка кол койду. Жарлык президенттин сайтына жарыяланды.
Жогорку Кеңештин 14-октябрдагы чукул жыйынында Садыр Жапаров Кыргызстандын өкмөт башчылыгына бир добуштан шайланып, өкмөттүн сунушталган курамы жана түзүмү жактырылган. Жапаров депутаттардын алдында сүйлөп жатып өкмөттүн курамында 15-20% өзгөрүү болорун билдирген.
— Жапаров Садыр Нургожоевич Кыргыз Республикасынын Премьер-министри кызматына;
— Новиков Артем Эдуардович Кыргыз Республикасынын биринчи вице-премьер-министри кызматына;
— Мамытканов Максат Сүйүналиевич Кыргыз Республикасынын вице-премьер-министри кызматына;
— Исмаилова Аида Жекшенбаевна Кыргыз Республикасынын вице-премьер-министри кызматына;
— Сабиров Равшанбек Азатович Кыргыз Республикасынын вице-премьер-министри кызматына;
— Аманбаев Бактыбек Абдилашимович Кыргыз Республикасынын Өкмөтүнүн Аппаратынын жетекчиси — министри кызматына;
— Казакбаев Руслан Айтбаевич Кыргыз Республикасынын тышкы иштер министри кызматына;
— Ниязбеков Улан Омоканович Кыргыз Республикасынын ички иштер министри кызматына;
— Жаманкулов Марат Тургунбаевич Кыргыз Республикасынын юстиция министри кызматына;
— Мукашев Кыялбек Белекович Кыргыз Республикасынын каржы министри кызматына;
— Муканбетов Санжар Турдукожоевич Кыргыз Республикасынын Экономика министри кызматына;
— Чодуев Эркинбек Урайымович Кыргыз Республикасынын Айыл чарба, тамак-аш өнөр жайы жана мелиорация министри кызматына;
— Бердалиев Бакыт Чырмашбаевич Кыргыз Республикасынын транспорт жана жолдор министри кызматына;
— Ажикеев Бообек Эргешович Кыргыз Республикасынын өзгөчө кырдаалдар министри кызматына;
— Бейшеналиев Алмазбек Бейшеналиевич Кыргыз Республикасынын билим берүү жана илим министри кызматына;
— Бейшеналиев Алымкадыр Савирдинович Кыргыз Республикасынын саламаттыкты сактоо министри кызматына;
— Кадырбеков Нуржигит Кадырбекович Кыргыз Республикасынын маданият, маалымат жана туризм министри кызматына;
— Кочкоров Улукбек Тойчубаевич Кыргыз Республикасынын эмгек жана социалдык өнүгүү министри кызматына;
— Сагынбаев Жыргалбек Калмуратович Кыргыз Республикасынын өнөр жай, энергетика жана жер казынасын пайдалануу мамлекеттик комитетинин төрагасы кызматына;
— Исмаилов Алтынбек Жапарович Кыргыз Республикасынын маалыматтык технологиялар жана байланыш мамлекеттик комитетинин төрагасы кызматына дайындалышты.
4-октябрдагы парламенттик шайлоодон кийин Кыргызстанда саясий кризис башталган. Буга чейин парламенттин бир катар депутаттары эки жолу чукул жыйынга чогулуп, өкмөт башчылыкка 6-октябрга караган түнү абактан бошотулган мурдагы депутат Садыр Жапаровду бекиткенин жарыялаган. Бирок ошол чечимдердин мыйзамдуулугу суроо жараткандыктан бүгүн маселе Жогорку Кеңеште кайрадан каралган.
Жогорку Кеңештин мурдагы депутаты Равшан Жээнбеков Кыргызстанда түзүлгөн кырдаалдан чыгуунун, коомду бириктирүүнүн жана абалды турукташтыруунун жолдорун сунуш кылды.
Жээнбековдун пикиринде, бийликтин алгачкы кадамы - саясий куугунтуктоону токтотушу зарыл. Экинчи кадам катары ал соттор бийликтин буюртмасы менен эмес, калыс иштеши керек экенин билдирди.
Мындан тышкары Жээнбеков күч түзүмдөрү саясатчыларды жана жарандык активисттерди куугунтуктоосун токтотушу зарыл болорун белгилеп, 5-октябрдагы окуя камоо, куугунтуктоо жана коркутуп-үркүтүү өлкөнүн жана бийликтин көйгөйлөрүн чечпей турганын көрсөткөнүн кошумчалады.
Ошону менен катар саясатчы парламенттин жаңы төрагасы, жаңы өкмөт башчы жана президент өзгөчө ой жүгүрткөн жарандык активисттерге, саясий оппоненттерине, журналисттерге жана жалпыга маалымдоо каражаттарына сый мамилени сөз менен эмес, иш жүзүндө көрсөтүшү зарыл экенин белгиледи.
Жээнбеков Кой-Таш окуясы боюнча айыпталып, 2019-жылдын 12-декабрында камакка алынган. Ал Бишкектеги №1 тергөө абагында отурган. «Жарандык көзөмөл комитети» уюму аны саясий туткун деп тааныган.
Адвокат: Темирлан Султанбековду сот үй камагына чыгарды
Шаардык сот «Социал-демократтар» партиясынын мүчөсү Темирлан Султанбековду үй камагына чыгарууга макул болду. Бул тууралуу 14-октябрда «Азаттыкка» анын адвокаты Чынара Жакупбекова билдирди:
«Үй камагына чыкты. Азыр чечимди алып, милициянын убактылуу кармоочу жайынан чыгарып келебиз. Мыйзам боюнча, мөөнөтү 10-декабрга чейин болуш керек».
22 жаштагы Темирлан Султанбеков 4-октябрдагы парламенттик шайлоого катышкан. Ал Бишкектеги жапырт башаламандыкка байланыштуу 10-октябрда козголгон кылмыш ишинин негизинде Кой-Таш айылында кармалган.
11-октябрдан тартып ачкачылык жарыялаганын журналисттерге айткан.
12-октябрда Бишкектин Биринчи май райондук соту Султанбековду №1 тергөө абагына эки айга камоону чечкен.
Жаш саясатчы кармоо учурунда сабалганын жана кыйноого кабылганын 12-октябрда Кыйноого каршы улуттук борбордун мүчөлөрү менен жолугушууда билдирген.
Султанбеков бошотулушу керек экенин бир топ саясатчылар айтып чыгышкан жана бул суроо жаңы шайланган өкмөт башчыга да, парламент спикерине да берилген.
Депутат Акаев Садыр Жапаровду тарапкерлерин тыюуга чакырды
Жогорку Кеңештин 14-октябрдагы кезексиз сессиясында КСДП фракциясынын депутаты, 4-октябрдагы парламенттик шайлоодо «Ата Мекен» партиясынан талапкер болгон Жанарбек Акаев премьер-министр Садыр Жапаровго кайрылып, өкмөткө сын айткан оппозициячыл саясатчыларды куугунтуктабай, алардын сынана көңүл буруп иш алып барууга чакырды.
«Бүгүн биз сизге кемчиликтерди ачык айтып, ката кетирсеңиз көзүңүзгө сайын көрсөтүп турушубуз керек. Оппозиция сөзсүз керек. Сын айтып койгон адамды куугунтуктагандардын тагдыры эмне болгонун билесиз. Эгер сиз туура иштеп, өлкөдө өнүгүү болсо, биз сизди кош колдоп колдоого даярбыз. Бирок кемчилик кетирсеңиз аны сындап турушубуз керек. Мактап-мактап, жардан ары түртүп тургандардан абайлашыңыз керек. Туруктуулук үчүн биз сизди колдоп беребиз. Эми легитимдүү премьер-министр болосуз. Азыр көпчүлүк эл сизди колдоп турат. Муну тана албайбыз. Ошол эле убакта көчөгө 20 миңдеген жаштар, эл, 13 саясий партиянын өкүлдөрү, саясий күчтөр чогулуп, калыстыкты талап кылып чыкпаганда, сиз азыр түрмөдө болот элеңиз. Ошолорду душман көрбөңүз», - деген Жанарбек Акаев окуяда жаракат алган миңден ашык адамга компенсация берүү маселесин кароого үндөдү.
Садыр Жапаров компенсация маселеси каралып жатканын билдирди.
Мындан тышкары Жанарбек Акаев Садыр Жапаровду тарапкерлерине кайрылып, ар кандай радикалдуу коркутуп-үркүтүүнү токтотууга чакырды.
«Мына, Аида Камчыбековна туура маселени айтты. Сиз бүгүндөн калбай тарапкерлериңизге кайрылып, «менин ишимди сындап аткандар болсо аларга калыс мамиле кылгыла, ар кандай радикалдуу күчтөр менен коркуткан туура эмес» деп, өзүңүздүн сөзүңүздү айтып койсоңуз, саясий күчтөр да, баары ыраазы болот эле», - деди ал.
Садыр Жапаров сын айткандарды колдой турганын билдирип, «туура эмес кылсам сындагыла, сын айткан сайын адам түзөлөт» деп жооп берди.