Садык Шер-Нияз: Урматтуу төрага. Оор кырдаалда кызматка келдиңиз. Дагы ар кандай суроолор болот. Кыргыздын эң мыкты чыгаандары сизге ишеним көрсөтүп отурат. Сиз кошоматтан алыс болсоңуз экен. Сиз жасакерликтен алыс болсоңуз экен. Көр дүнүйө дегенден алыс болсоңуз экен.
Эл аралык мамиледе уят болуп турат. Кээ бир легитимдештирүүнү жолго салыңыз. Кургак жерге тамчы болуңуз, зөөкүрлөргө камчы болуңуз.
Биз чимкирик деген атка кондук. Себеби, биз түшкөн буйруктарды ляппай деп аткарып жүрдүк. Ага ошол кездеги төрөга да кол кабыш кылып жүрдү.
Биз сизге ишеничти так аткарат деп үмүт артабыз. Сиз түз, бекем болуңуз. Туугандуу эмес, ыймандуу бий болуңуз. Тарых астында өз вазийпаңызды так аткарып бериңиз.
Алтынбек Сулайманов: Президент, парламент, өкмөт башчы үчөөңөрдөн суранам, 6-ноябрга чейин шайлоону жарыялагыла. Азыр тиреше турган мезгил эмес. 5-октябрда эмне үчүн ушундай болуп кетти. Ошол күнү 30 миңдей адам аянтка чыкты. Ошону укпай койдуңар. Биринчи №2 жок кылуу керек, шайлоо босогосун 3% пайыздык чекке түшүрүү керек. Бир айлык угуу деген акылдуу сөзүңөрдү токтоткула. Эл уксун. Эл талап кылып жатат. Бүрсүгүнү ушуну карап бериңиз. Келбегендер эл душманы болот.
Жогорку Кеңештин депутаттары спикерликке Канат Исаевди шайлашты.
Канат Исаев: Мамлекетте кырдаал оңой эмес. Парламент өткөн-кеткен окуялардан сабак алалы. Алдыда шайлоо бар. Саясий көз караштарыбыз бөлүнүп-жарылбайлы. Алтынчы чакырылыш тууралуу көп сөз айтылды. Балким бул биздин популисттик билдирүүлөрдү жасабаганыбыз үчүн болду.
Парламент төрагалыгына Канатбек Исаевдин талапкерлиги каралууда
Жогорку Кеңештеги “Кыргызстан” фракциясы лидери Канатбек Исаевдин талапкерлигин спикерликке сунуш кылды. Бул сунушту бардык фракциялар колдоп, башка сунуш түшкөн жок. Депутаттар талапкерди адегенде бириккен комитетте карап, андан кийин жалпы сессияга чыгарышты. Жыйындын жүрүшүндө депутат Дастан Бекешев суроосуна жооп берип жатып Исаев парламенттик кайра шайлоого катышуу ниетин билдирип, ал жагдайга жараша чечилерин белгиледи:
"Балким, блок-блок болуп партиялар биригет. Бая күнү бир топ депутаттар отурдук, биргелешип шайлоого кетпейлиби деп. Өзүм жеке чечим кабыл албайм. Партиянын саясий кеңеши бар”.
6-октябрда парламент депутаттарынын бир бөлүгү чогулуп, Дастанбек Жумабековду спикерликтен бошотуп, анын ордуна Мыктыбек Абдылдаевди шайлаган. Абдылдаев бул кызматка дайындалышынын «мыйзамдуулугу шек жаратып жатканы үчүн» 10-октябрдагы кезексиз жыйында баш тартып, милдетти «легитимдүү вице- спикер» деп башкарууну Мирлан Бакировго өткөрүп берген.
4-октябрда Кыргызстанда кезектеги парламенттик шайлоо өткөн. Анын жыйынтыгына нааразы болгон он чакты партия Бишкекте митинг өткөргөн. 6-октябрга караган түнү митингчилер президенттик аппарат жана парламент жайгашкан имаратка кирип барышкан. Бул окуядан кийин президент ишин улантууда, өкмөттүн жетекчилиги кызматтан кетти. Жаңы өкмөттү дайындоо аракети боюнча орток пикир табыла элек.