Президент эл аралык коомчулукка ишенимдүү маалымат берүүнү тапшырды
Президент Сооронбай Жээнбеков 13-октябрда тышкы иштер министринин милдетин аткаруучу Чыңгыз Айдарбековду кабыл алды.
Президенттин сайтындагы кабарга караганда, жолугушууда Чыңгыз Айдарбеков өлкөдөгү акыркы окуялар боюнча эл аралык уюмдардын жана өнөктөш өлкөлөрдүн позициясы жөнүндө маалымат берди. Ал тышкы дүйнө Кыргызстандагы жаңылыктарга кунт коюп көңүл буруп, өзү менен ар дайым байланышта болуп, кырдаалдын өнүгүшүнө терең тынчсыздануусун билдирип турганын айтты.
Маалыматка караганда, Айдарбеков БУУнун Кыргызстандагы туруктуу координатору Озонниа Ожиело, элчи, Евробиримдик өкүлчүлүгүнүн башчысы Эдуард Ауэр менен болгон жолугушуулары жөнүндө да айтып берди.
Бул жолугушууларда БУУнун жана Евробиримдиктин өкүлдөрүнө Кыргызстан үчүн Конституциянын талаптарын сактоо менен өлкөдөгү саясий күчтөрдүн ортосундагы кеңири саясий диалог аркылуу укуктук алкакка тез арада кайтып келүү маанилүү экени айтылган.
Мындан сырткары, Айдарбековдун билдирүүсүндө бул жолугушууларда учурда түзүлгөн кырдаалды жөнгө салыш үчүн укуктук негизде бардык аракеттер көрүлүп жатканы тууралуу сөз болуп, кайрадан өтө турган парламенттик шайлоого техникалык жактан колдоо көрсөтүү мүмкүнчүлүктөрү талкууланган.
Айдарбековдун айтымында, эл аралык уюмдардын жана чет мамлекеттердин өкүлдөрү бийликтин өлкөдөгү коомдук-саясий кырдаалды турукташтыруу боюнча аракеттерин колдогон, зарыл болгон жардам көрсөтүүгө даяр экенин билдиришкен.
Президент Сооронбай Жээнбеков чет элдик өнөктөштөрдүн колдоосуна ыраазычылык билдирип, учурдагы татаал саясий кырдаалда бүткүл эл аралык коомчулукту ишенимдүү маалымат менен камсыз кылууга өзгөчө көңүл бурулушу керек экенин белгиледи.
Буга чейин БУУ жана Евробиримдик Кыргызстандагы бийликтин мыйзамдуу өкүлү деп президент Сооронбай Жээнбековду гана тааный тургандыгы тууралуу маалымат тараткан.
Мирлан Бакиров: Токтомго кол коюуга эч ким мажбурлаган жок
Жогорку Кеңештин вице-спикери, 10-октябрдагы кезексиз сессияны алып барган депутат Мирлан Бакиров өкмөттүн курамын жана программасын бекиткен токтом тууралуу «Азаттыкка» комментарий берди. Ал Жогорку Кеңештин коллегиалдуу чечимин бекиткен токтомго жоопкерчилик менен кол койгонун, эч ким мажбурлабаганын билдирди:
«Кабыл алган токтомдорду кайрадан иштеп чыгып, оңдоп-түздөп юридикалык жагын жалпы бөлүм, экспертизалык бөлүм карап, колдорун коюп келгенден кийин ошол отурумду алып барган төраганын колун коюп берүү менин милдетим болду».
Вице-спикер ошондой эле жыйынды алып баруу укугун өзүнө өткөрүп берген Мыктыбек Абдылдаевдин сөзүнө таянып, анда кворум болгонун, ишеним катка, депутаттардын санына байланышкан дооматтар регламентте жок экенин белгиледи.
Мирлан Бакировдун пикиринде азыр президенттин жана Жогорку Кеңештин гана бийлиги легитимдүү. Ошондуктан, парламенттик кайра шайлоо өтүп, өкмөт толук иштегенге чейин президент Жээнбеков кетүү жөнүндө оюнан кайтып турушу керек. Ал эми азыркы убактылуу өкмөт мыйзам боюнча Жогорку Кеңештин токтомунун негизинде президенттин жарлыгы чыгып, ант бергенден кийин толук курамда ишке кирише алат.
БУУ: Бийликтин мыйзамдуу өкүлү деп Жээнбековду тааныйбыз
Бириккен Улуттар Уюму (БУУ) Кыргызстандагы конституциялык бийликтин мыйзамдуу өкүлү деп президент Сооронбай Жээнбековду гана тааныйт. Бул тууралуу 12-октябрда тышкы иштер министри Чыңгыз Айдарбеков менен телефон аркылуу сүйлөшүүдө БУУнун баш катчысынын Борбор Азия боюнча атайын өкүлү Наталья Герман билдирди.
Тышкы иштер министрлигинин (ТИМ) басма сөз кызматы кабарлагандай, БУУ өкүлү бул уюм Кыргызстандын ишенимдүү өнөктөшү болуп келгенин жана кызматташтыгы улана берерин белгилеп, өлкөдө түзүлгөн кырдаалдан тынч жол менен чыгууга чакырды.
Герман президент мыйзамдын негизинде, бардык саясий күчтөрдүн колдоосу менен туура чечимдерди кабыл аларына үмүт бар экенин айтты. БУУнун баш катчысы Антониу Гутерриш Кыргызстанда болуп жаткан окуяларга кылдат көз салып жатканын белгилеп, кризистен чыгуу жолдорун табууга, жаңы парламенттик шайлоо өткөрүүгө жана экономиканы тезинен турукташтырууга жардам берүүгө даярдыгын билдирди.
Министр Айдарбеков БУУнун өкүлүнө ыраазычылык айтып, президент Жээнбеков Кыргызстанда болуп жаткан саясий процесстерди мыйзам нугуна бурууга бардык аракеттерди көрүп жатканын кошумчалады.
Шыкмаматов: Жээнбеков менен Жапаров сүйлөшүүгө тийиш
«Кырдаал аз болсо да турукташып келе жатат, бирок дагы түрдүү интригалар токтобосо, кыйроо алдында турат». Мындай пикирин экс-депутат Алмамбет Шыкмаматов «Акипресс» агенттигине билдирди. Ал учурда эң башкы маселе тынчтык жана туруктуулук экенин баса белгиледи:
«Президент менен Жапаров тирешпей, бир столго отуруп, сүйлөшүшү керек. Аларга Роза Отунбаева арбитр болуп бере алат. Садыр Жапаровду шайлашты. «Кворум жок» деп атышат, алтынчы чакырым беш жыл бою эле кворумсуз иштеп келген. Элдин баарынын эсинде, бул. Мурда унчукпай жүрүп эле, эми кворумду көрө калыштыбы?! Ошондуктан, азыр папка бөлүштүрүү, кландашып мушташуу эмес, азыр эң башкысы – тынчтык жана туруктуулук. Бизде эки саясий фигура: президент менен премьер. Артында миңдеген адамдар турган премьер-министр бар. Мен муну шайлоо учурунда эл кыдырганда көрдүм. Бардык жерден «Садыр Жапаровду түрмөдөн чыгарасыңарбы?» деген суроону берип жатышты».
Шыкмаматов тараптар сүйлөшүү менен шайлоонун маселесин чечүүгө тийиш экенин, учурдагы эң маанилүү – парламенттик шайлоону өткөрүүнү боюнча сүйлөшүү зарыл болорун белгиледи.
Алмамбет Шыкмаматов Жогорку Кеңештин 6-чакырылышына «Ата Мекен» партиясынан депутат болуп келген. Партия лидери Өмүрбек Текебаев камалгандан кийин фракция лидерлигин колуна алган. Текебаев түрмөдөн чыккан соң, пикир келишпестиктерден улам, фракциядан чыгып, мандатын тапшырган.
Жетинчи чакырылыштагы парламенттик шайлоого «Бир Бол» партиясынын тизмесин жетектеп чыкты.