Жээнбековдун инаугурациясынан түз эфир
Жаңы шайланган президенттин кызматына расмий киришүүсүнө арналган салтанат учурунда коопсуздукту жана коомдук тартипти камсыз кылуу максатында Чүй жана Бишкектин милиция кызматкерлери 23-ноябрдан тарта күчөтүлгөн тартипте иштеп жатат. Бул тууралуу ИИМдин басма сөз кызматкери Эрнис Осмонбаев "Азаттык" радиосуна билдирди:
- Салтанаттуу аземди өткөрүүдө коомдук тартипти жана коопсуздукту сактоого эки миңден ашуун милиция кызматкерлери тартылды. Алар 23-ноябрдан тарта күчөтүлгөн тартипте иштеп жатышат.
Эрнис Осмонбаевдин маалыматы боюнча, Чүй жана Бишкектин ички иштер бөлүмдөрү коопсуздукту камсыздоо үчүн алдын ала профилактикалык иш-чараларды да жүргүздү.
Мурдагы премьер-министр, бийликтеги Социал-демократтар партиясынын талапкери Сооронбай Жээнбеков 15-октябрдагы президенттик шайлоодо 54% добуш менен утуп чыккан. Ал бүгүн ант берип, кызматына киришет.