Туура тамактануу - ден соолуктун кепили (2)
Кыргызстанда кош бойлуу аялдардын 62%ке жакыны йоддун жетишсиздигинен улам ар кандай оорудан жабыр тартышат. Мектеп жашындагы балдардын 44% да йод жетишпей оорушат. Буга эмне себеп? Табигый азык-түлүгү мол Кыргызстанда калк эмне үчүн витамин жетишсиздигинен жабыр тартат? Же тамактануу маданиятын өзгөртүү зарылдыгы бышып жеттиби? "Азаттыктын" "Арай көз чарай" талкуусу мына ушул туура тамактануу көйгөйүнө арналды. Талкууга Саламаттыкты сактоо министрлигинин ооруларды алдын алуу жана мамлекеттик санитардык-эпидемиологиялык көзөмөл департаментинин балдар жана өспүрүмдөр бөлүмүнүн адиси Мария Кушубакова, Кыргыз-түрк "Манас" университетинин тамак-аш инженерлиги бөлүмүнүн доценти Жамила Сманалиева жана ЮСАИД-Спринг долбоорунун адиси Сайкал Бозова катышты.