Азимбек Бекназаров президент Сооронбай Жээнбековдун президенттик мөөнөтүндөгү бир жылдык ишине баа берип жатып кендерди иштетүү маселесин көтөрдү. Ал "кен байлыктарды колдонуу маселесин чечүүдө Жогорку Кеңеш менен өкмөт өзүнүн жүзүн көрсөтө турчу мезгил келди" деди.
- Сооронбай Жээнбеков ары жагымсыз, ары чечкиндүү кадамдардын бирин жасады. Ал кадам - аны президенттикке сунуштаган жана түздөн-түз колдогон экс-президент Алмазбек Атамбаевдин таасиринен биротоло бошонуу. Мындай кадам кыргыз менталитетинде – бир жагынан “ичкен кудугуңа түкүрбө” болсо, экинчиси – “бир адамдын, бир партиянын жетеленме президенти эмес, нукура элдик президент болуу” деп кабыл алынды, - деди Бекназаров.
Азимбек Бекназаров саясий туткундар боюнча маселе көтөрдү. "Атамбаевдин убагында саясий туткун болгондордун иши кайра каралышы керек", -деди ал.
Бекназаров 2010-жылы бийлик алмашканда бир катар саясатчылардын иши кайрадан каралганын айтып, башкы прокурор Өткүрбек Жамшитовго кайрылды.
Жогорку Кеңештин экс-депутаты Равшан Жээнбеков бийлик бутактарынын тең салмактуулугу, өлкөнүн келечеги, экономикалык маселер боюнча доклад жасап жатат. Ал курултайды өткөрүүгө бийлик менен диалогго барганын айтты.
Ал бул жолку курултай башкача өтүп жатканын, буга чейинки иш-чараларда бут тосуулар, провакациялар болуп келсе бул жолу андай терс көрүнүштөр жок экенин белгиледи.
Равшан Жээнбеков: Биз эркин мамлекет курушубуз керек. Бир дагы президентке, бир дагы партияга бийликти монополияга айлантып, бир колго жол бербейли. Түштүк Кореяда былтыр парламент президентке импичмент жарыялады. Түштүк Корея президенттик мамлекет, парламенттик эмес. Бизде ошондой парламент барбы? Ошол парламентти колдогон күч органдары барбы? Албетте жок.