Аэропортто кармалган 10 адам эки суткага камалды
Мындай чечимди Сокулук райондук соту чыгарганын "Ата Мекен" партиясынын катчылыгы маалымдады. Алар "милицияга баш ийбегени үчүн" административдик жоопкерчиликке тартылган. Кармалган он адам соттун чечимине ылайык, эки сутка Сокулук РИИБисинде болушат.
Бүгүн таңда "Ата Мекен" партиясынын жаштар канатынын өкүлдөрү партия лидери Өмүрбек Текебаевди тосуп алуу үчүн "Манас" аба бекетине барганда Сокулук районунун милициясы кармап, алып кеткен.
Жалпысынан 14 адам райондук милиция бөлүмүнө жеткирилип, кийин төрт журналист бошотулган.
Партия катчылыгы милиция мыйзамды одоно бузуп, адамдарды кармап кеткенин билдирип, соттун чечими менен макул болбой, доо арыз менен кайрылмай болду.
Бабанов Текебаевдин камалышы тууралуу пикирин билдирди
Өмүрбек Текебаевге карата айып ачык угузулгандан соң, күч структуралары аны суракка алышы керек. Бирок, күнөө коюудан мурун күч органдары ар бир факты боюнча кылдат иликтөө жүргүзүшү зарыл. Мындай пикирин “Республика – Ата Журт” фракциясынын лидери Өмүрбек Бабанов билдирди:
- Текебаевди камакка алуу ашыкча болуп калды. Менимче, ал бардык коюлган айыпты эске алып, тергөө менен ачык кызматташууга даяр. Анын чет өлкөдө калбай Кыргызстанга учуп келиши жогорудагы айтылгандарга далил.
Өмүрбек Бабанов “Азаттыкка” билдиргендей, бардык тарап укуктук негизден ашпай иш жүргүзүшү керек жана чындык мыйзам аркылуу аныкталышы шарт.
Базар-Коргондо Текебаевди колдогон митинг өтүүдө
Базар-Коргон айылындагы райондук акимчиликтин алдында парламенттеги "Ата Мекен" фракциясынын лидери, депутат Өмүрбек Текебаевдин тарапкерлеринин митинги өтүп жатат. Анын катышуучулары бийликтен Текебаевди бошотууну талап кылышууда. Аны менен катар "атамекенчи" депутаттар Аида Саляновага, Алмамбет Шыкмаматовго карата саясий куугунтукту, КТРК баштаган мамлекеттик телеканалдар тарабынан бир беткей каралоону токтотуу талабын коюшту. Эгерде бул талаптар аткарылбаса, мөөнөтсүз акция баштала турганын "Ата Мекен" партиясынын Жалал-Абад облусундагы координатору Кубатбек Артыков "Азаттык" радиосуна билдирди:
- Айтылган талап аткарылбаса, бүгүн саат 16:00дө Ош-Бишкек жолун тосууга чейин барабыз.
Артыков кошумчалагандай, Базар-Коргондогу митингге Текебаевдин 200дөй тарапкери катышууда.
Айрым депутаттар кезексиз сессияга чогулуу демилгесин көтөрүүдө
Жогорку Кеңеш чукул жыйынга чогулуп, “Ата Мекен” фракциясынын лидери Өмүрбек Текебаевди эмне үчүн күч менен кармап кеткенин расмий органдардан сурашыбыз керек. Мындай пикирин КСДП фракциясынын депутаты Жанар Акаев өзүнүн "Фейсбук" баракчасына жазды. Ал учурда бир нече депутат кезексиз сессияга чогулуу тууралуу маселени сүйлөшүп жатканын кошумчалады.
- Албетте, Өмүрбек Текебаев күнөөлүү же күнөөсүз экенин сот далилдейт, тергөө иштери мыйзамга ылайык болушу шарт. Бирок чет элдик жарандардын сырттан туруп берген көрсөтмөсү менен белгилүү саясий ишмерди, оппозициялык фракциянын лидерин түндө камакка алуу - одоно ката. Ошого карабастан азыр бардык саясий күчтөр өлкөдөгү кырдаалды курчутууга кызыкдар болбошу керек, - деп жазды депутат Акаев.
Бир катар активисттер да Жогорку Кеңеш депутаттарын кезексиз жыйынга чогулууга чакырып, кол топтой баштады.