Кыргызстанда бүгүн Конституцияны өзгөртүү боюнча референдум жана жергиликтүү кеңештерге шайлоо өттү. Кыргызстанда жергиликтүү кеңештерге шайлоо 22 шаарда болду. Ага жалпысынан 35 саясий партия катышты. Ал эми 389 айылдык кеңешке 18 миңден ашуун талапкер катталган. 3938 талапкер саясий партиялардан, калганы өзүн-өзү көрсөткөн талапкерлер. Ушул эле күнү Конституцияга өзгөртүү киргизүү боюнча референдум да өттү. Баш мыйзамга президенттин, өкмөт башчынын, депутаттардын, соттордун ыйгарым милдеттерине жана адам укуктарына байланышкан 26 өзгөртүү киргизилди.
Талас: №6108 шайлоо участогу жарым саатка кеч ачылды
Буга участоктогу добуш берүү аппараты иштебей калганы себеп болду. Кабарчыбыздын маалыматы боюнча, жарым саатта отузга чукул киши чогулуп, күтүп калышкан. Айрым шайлоочулар бул көрүнүшкө нааразылыгын билдиришти.
Бул участоктон өкмөттүн Таластагы өкүлү да добуш бермек.
Талас шаарында он шайлоо участогу бар.
