11-июлда Бишкек, Ош, Токмокто шаардык кеңешке шайлоо өттү.
Саясий өнөктүк добуш сатып алуу өңдүү мыйзам бузуулар менен коштолуп, милицияга бир катар арыз түштү.
10-июлда ден соолугуна байланыштуу же башка себептерден улам добушканага келе албаган шайлоочулар добуш берген.
Борбордук шайлоо комиссиясынын маалыматына караганда, Бишкекте 426 699, Ошто 152 718, Токмокто 38 100 шайлоочу бар.
Кыргызстан боюнча шайлоочулардын жалпы саны 617 517.
11-апрелде Кыргызстандагы 28 шаардык, 420 айылдык кеңешке шайлоо өткөн. Добуш сатып алуу жана административдик ресурс колдонуу фактылары аныкталып, май айында Бишкек, Ош жана Токмок шаардык кеңештерине өткөн шайлоонун жыйынтыктары жокко чыгарылган. Үч шаарда кайра шайлоо 11-июлга белгиленген.
Шайлоо тууралуу талкууну түз эфирден көрүңүз.
Борбордук шайлоо комиссиясы үч шаардагы кайра шайлоого саат кечки алтыга чейин 155 707 адам (25,22%) катышканын билдирди.
Алдын ала эсепке ылайык, Бишкекте 85 411 (20.02%), Ошто 56 610 (37,07%), ал эми Токмокто 13 686 ( 35,27%) шайлоочу келди.
Үч шаардагы кайра шайлоого 26 партиядан 2200дөн көп талапкер катышып жатат.
