Улуттук коопсуздук кызматы (УКМК) 10-июлда добуш сатып алууга аракет кылган деген айып менен “Эмгек” партиясынын К.Е.А аттуу өкүлү кармалганын билдирди. Бул факты Кылмыштардын жана жоруктардын бирдиктүү реестрине Кылмыш-жаза кодексинин 192 -беренеси (добуш сатып алуу) менен катталып, тергеп-иликтөө башталды.
“Кармалган К.Э.А. "Эмгек" партиясынын Р.у.Т. аттуу талапкеринин көрсөтмөсүнө ылайык, МТУ-2де шайлоочуларга 1000 сомдон таратып жаткан. Тинтүү учурунда анын жанынан 10 миң сом жана шайлоочулардын акча алганы тууралуу белгиси коюлган тизме табылган”, деп айтылат маалыматта.
"Эмгек" партиясы буга байланыштуу азырынча комментарий бере элек.
Ош шаарындагы №5273 шайлоо тилкесинин алдында шайлоочуларды тизмектеп отурган аялдар байкоочуларга аны көрсөтүүнү каалашкан жок. Шайлоо тилкесинин төрайымы Мавлюда Нишанова бул тилкеде эч кандай мыйзам бузуу катталбаганын айтты.
Министрлер кабинетинин төрагасы Улукбек Марипов №1032 шайлоо тилкесинде добуш берди.