Борбордук шайлоо комиссиясы үч шаардагы кайра шайлоого саат кечки алтыга чейин 155 707 адам (25,22%) катышканын билдирди.
Алдын ала эсепке ылайык, Бишкекте 85 411 (20.02%), Ошто 56 610 (37,07%), ал эми Токмокто 13 686 ( 35,27%) шайлоочу келди.
Үч шаардагы кайра шайлоого 26 партиядан 2200дөн көп талапкер катышып жатат.
Шайлоо тууралуу талкууну түз эфирден көрүңүз.
Бул тууралуу Ички иштер министрлигинин Тергөө кызматынын башчысы Султан Макилов билдирди. Кармалгандардын жанынан 20 миң сом табылганын айтты. Макилов канча адам кармалганын тактаган жок.
Бул факт Кылмыштардын жана жоруктардын бирдиктүү реестрине катталып, тергеп-иликтөө уланып жатат.
Милициянын маалыматына ылайык, добуш сатып алууга байланыштуу Бишкекте 11, шайлоочуларды ташуу тууралуу үч арыз түшкөн. Токмокто болсо шайлоодогу мыйзам бузуу тууралуу тогуз, ал эми Ошто беш билдирүү алынган. Алардын айрымдары кылмыштын курамы жок деген негизде иликтенген эмес.
Мунун алдында шайлоого байкоо жүргүзгөн "Жалпы иш" коомдук фонду добуш берүү күнү түшкө чейин Бишкек менен Ош шаарларында мыйзам бузулган 22 учур катталганын билдирген. Уюм Токмок шаарында мындай факты болбогонун маалымдаган.