Ош шаарындагы №5273 шайлоо тилкесинин алдында шайлоочуларды тизмектеп отурган аялдар байкоочуларга аны көрсөтүүнү каалашкан жок. Шайлоо тилкесинин төрайымы Мавлюда Нишанова бул тилкеде эч кандай мыйзам бузуу катталбаганын айтты.
Улуттук коопсуздук кызматы (УКМК) 10-июлда добуш сатып алууга аракет кылган деген айып менен “Эмгек” партиясынын К.Е.А аттуу өкүлү кармалганын билдирди. Бул факты Кылмыштардын жана жоруктардын бирдиктүү реестрине Кылмыш-жаза кодексинин 192 -беренеси (добуш сатып алуу) менен катталып, тергеп-иликтөө башталды.
“Кармалган К.Э.А. "Эмгек" партиясынын Р.у.Т. аттуу талапкеринин көрсөтмөсүнө ылайык, МТУ-2де шайлоочуларга 1000 сомдон таратып жаткан. Тинтүү учурунда анын жанынан 10 миң сом жана шайлоочулардын акча алганы тууралуу белгиси коюлган тизме табылган”, деп айтылат маалыматта.
"Эмгек" партиясы буга байланыштуу азырынча комментарий бере элек.
Ош шаарында шайлоодон четтетилген "Ынтымак" саясий партиясынын талапкери Толгонай Амирова 11-июлда журналисттерге маалымат жыйын куруп, шайлоо ыплас өтүп жатканын айтты. Ошондой эле, ага негизсиз иш козголгонун кошумчалады.
Амированы Ош шаардык милициясы добуш сатып алууга шек санап жатат.
Ал милициянын доосун четке кагып, негизсиз иш козголгонун белгиледи.
"Мага эч кандай далили жок иш козгоп коюшту. Милиция башында күбө катары чакырган, кийин шектүү кылып койду. Ушундай иштерден улам биздин партия өз эрки менен шайлоодон чыгып кетти", - деди ал.
Борбордук шайлоо комиссиясы (БШК) 10-июлга караган түнү өткөргөн жыйынында "Ынтымак" партиясын Ош шаардык кеңешине кайра шайлоодон четтеткен.
