Наталья Никитенко: Бүгүн бийлик монополияга, узурпацияга бет алды. Бүгүн Жапаров "эл президенттик башкарууну каалап атат" деп жатат. Бирок ал элдин баарынын оюн сурадыбы? Албетте, мен эл арасындагы парламентке таарынычты түшүнөм. Бирок октябрда эл митингге ошону талап кылып чыккан эмес да. Эл парламентаризмди сактап калууга, шайлоонун жыйынтыгына каршы чыкпады беле. Жаман башталыш сөзсүз жаман бүтөт. Азыр Бакиевдин юристтери, кадрлары иштеп жатканы билинип калды. Азыркы бийликке Бакиевдин режими кантип бүткөнүн эстеп койгула деп айткым келет.
Элдар Абакиров: Кыргызстанга бажы, күч органдарындагы жана сот реформасы керек экенин айткым келет. Диктаторлук бийлик болгон жерде эркин экономиканын жолу буулат. Эркин экономиканын арты менен азыр чакан бизнес иштеп жатат. Диктаторго эркиндик берсек, экономикалык эркиндик токтойт, жумушсуздук күчөйт.
Улан Үсөйүн: 5-октябрда биз митингге башка максат менен чыктык эле. Аны бурмалап, уурдап алышты. Жекшембиде Баш мыйзамдын жаңы долбооруна каршы жаштардын тынчтык маршы өтөт. Эч бир саясий топко, уюмдарга сөз берилбейт. Ураандар гана айтылат.
Сания Токтогазиева: Конституциялык реформа абсолюттук түрдө мыйзамсыз. Азыр иштеп жаткан парламенттин 6-чакырылышы мыйзамсыз иштеп жатат. Бул чакырылыштын конституциялык реформа кылууга толугу менен акысы жок. Азыркы Баш мыйзамдын жаңы долбоору элге жасалма таңууланып жатат. Биз долбоордун авторлору ким экенин да билбейбиз. Бул долбоордо демократиялык принциптерге дал келбеген, авторитаризмди бекемдөөгө гана жол ачкан беренелер бар экен. Парламент азыр бийлик вакууму болбошу үчүн гана иштеп жатат. Мындай учурда алардын маанилүү мыйзамдарды кабыл алууга акысы жок. Конституциялык палата мыйзамдык вазийпасын аткарып, Венеция комиссиясын угушу керек. Аны кылгандан кийин парламенттик шайлоо өтүшү зарыл. Конституциялык реформаны жаңы шайланып келген парламенттин 7-чакырылышы гана өткөрүүгө тийиш. Ошондо гана мыйзамдуу болот.