Чолпон Жакупова: Караңгылык тойгузду. Бул караңгылыкты мыйзамды жактоочулар колдонгону кечиримсиз. Эгер буга унчукпасак, бизди алар 18-кылымга сүйрөп барышат.
Мира Жангарачева: Мен очоктун жанында тургандан ырахат алам. Бирок ал үчүн мен эмнеге таяк жешим керек? Менин кызымды эмнеге бирөө урушу керек? Биз светтик өлкө болчубуз. Азыр эмнеге айландык? Кол салгандар жөн эле балдар эмес. Бул атайын даярдалган топ. Бийлик зомбулукту токтотушу керек. Аял-эркек кол кармашып бирге жүрүшү керек. Аял урган жигиттердин балдары азыр чоңоюп жаткан кыздардын күйөөсү болот. Тепкилеп өлтүрөт. Булар эртеңки кайната эмеспи.
Аялдарды зомбулуктан коргоо митинги
Роза Отунбаева: Мен ички иштер министри отставкага кетиши керек деп эсептейм. Дүйнөлүк медиа бул көрүнүштү жазып жатканда кетиши керек. Биз ушул абалга жетүүгө он жылдап иштегенбиз. Эми биз ошол эмгекке бутун сүрткөнгө жол беришибиз керекпи? Биз он жылдап демократиялуу коомго баруу үчүн күрөшкөнбүз. Бир күндө ошол абройду төккөнгө, Кыргызстанды каралаганга жол бербешибиз керек.
Атыр Абдрахматова: Милиция кызматкерлери коркунучтун булагы болуп калды. Кыргыз коомунда кыз-келиндерге мамиле кандай экенин милиция кызматкерлери көрсөтүп койду. Булар атайын уюштурулган. Митингге антимитинг уюштуруп келген. Бирок кыз-келиндердин маршын эмнеге саясатка айландырышканын мен түшүнбөй турам.